Itaia 49:1-26
49 Ongora irou ngkami aika abamwakoro,Ao kakauongo ngkami aika natannaomata aika kam raroanako.+
E weteai Iehova imwaini bungiakiu.*+
E atonga arau man te tai are I mena iai i nanoni biroton tinau.
2 E karaoa wiu bwa kaanga te kabaang ae kakang.
E katanai i aan nuuni baina.+
E karaoai bwa kanoan te kainikatebe ae karaneaneaaki.
E karabaai i nanoni nneni kanoan ana kainikatebe.
3 E taku nakoiu: “Bon au toro ngkoe ae Iteraera,+Ae N na kaotiota tamaroau rinanom.”+
4 Ma I taku: “I korakai ibukin te akea.
I kabanebuakaa korakorau ibukin te bwai ae akea uaana ae matebuaka.
Ma e boni mena motikan taekau iroun Iehova*Ao boon au mwakuri* iroun Atuau.”+
5 Ao Iehova, are Teuare karaoai bwa ana toro mai nanon te biroto,E tuangai ngkai bwa N na kaoka Iakoba nakoina,Bwa a aonga n ikotaki nakoina kaain Iteraera.+
N na karineaki i matan IehovaAo e na riki Atuau bwa korakorau.
6 Ao e taku: “E aki naba tau ae au toro ngkoeBwa ko na kateirakeia ana baronga IakobaAo ni kaokiia ake a kawakinaki i buakoia kaain Iteraera.
I anganako naba ngkoe bwa ootaia natannaomata,+Bwa e aonga n rotii tabon aonnaba au kakamaiu.”+
7 E kangai ana taeka Iehova ae te tia Manga Kabooa Iteraera, ae Teuare Tabu irouna,+ nakon teuare ribaaki,+ nakon teuare taboribaaki iroun te natannaomata, nakon aia toro taan tautaeka:
“A na noria ueea ao a na teirake,Ao a na bobaraaki natinuea mwaaneIbukin Iehova ae kakaonimaki,+Ae Teuare Tabu iroun Iteraera, are e a tia n rineiko.”+
8 E kangai ana taeka Iehova:
“I kaekako n tain akoan* te aba+Ao I buokiko n te bong ni kamaiu.+
I teimatoa ni kawakiniko bwa N na anga ngkoe bwa te berita ibukia aomata,+Bwa e na manga kaokaki te aba nakon aronaAo a na manga aban abaia ake a kamaroaeaki,+
9 Bwa N na kangai nakoia aomata aika taiani bure, ‘Otinako!’+
Ao nakoia ake n te rotongitong,+ ‘Kaotingkami!’
A na amwamwarake n taiani kawai,Ao e na mena aia tawaana i rarikini kawai nako aika uruaki.*
10 A na aki bora ni baki ke ni bora n taka,+Ao a na aki naba bwakaraki n te kabuebue ke n te riringa,+Bwa e na kairiia Teuare nanoangaiia,+Ao e na kaiririia i rarikini koburake n ran.+
11 N na karaoi au maunga ni kabane bwa te kawai,Ao a na karietaaki au kawai aika totouaki.+
12 Noria! A roko baikai mai kiraroa,+Ao noria! boni mai meang ao mai maeao baikai,Ao boni man te aba ae Tinim baikai.”+
13 Takarua ni kimwareirei ngkoe ae karawa, ao kimwareirei ngkoe ae te aonnaba.+
Ke a kakatonga ma n tang ni kimwareirei taiani maunga.+
Bwa e a tia Iehova ni karaui nanoia ana aomata+Ao e nanoangaiia ana aomata ake a karawawataaki.+
14 Ma e teimatoa ni kangai Tion:
“E kitanai Iehova+ ao e mwanuokinai Iehova.”+
15 E kona te aine ni mwanuokina natina ae mammaKe n aki nanoangaa natini birotona?
E ngae ngkana a mwaninga aine aikai ma ngai N na bon aki mwanuokiniko.+
16 Noria! I korea aram ni kaaria i nanoni baiu.
A mena n taai nako am oo i matau.
17 A ienikuri n oki natim mwaane.
A na nako mairoum te koraki ake a uruko ni kabwakako ao ni kamaroaeko.
18 Euti matam ao taratara nako.
A a ikotaki ni kabane.+
A a roko nakoim.
“Ngkai bon iai ngai,” bon ana taeka Iehova,“Ao ko na karinia ni kabane i aom bwa kaanga bwaai ni katamaroa,Ao ko na kabaeia i aom n aron ae e karaoia te tia mare te aine.
19 E ngae ngke a kamaroaeaki ngkoa am tabo ao akea kaaia, ao e uruaki abam,+Ma e na rangi n ribwa ngkai ibukia taani maekanna,+Ao a na raroanako+ te koraki ake a kabwautiko.+
20 A na kangai nakoim natim mwaane aika ko bungia imwini mateia natim,‘E a rangi n ribwa te tabo aei ibukira.
Karekea nnera ni maeka ikai.’+
21 Ao ko na kangai i nanom,‘Antai tamaia ataei aika I a anganaki aikai,
Ngkai bon te aine ngai ae a mate natiu ao I kanoabo,Ao I riki bwa te taenikai ao I kairaki nako bwa te bure?
Antai ae kaikawaiia?+
Noria! I tiku n tii ngai,+Mangaia ae a roko mai ia naakai?’”+
22 E kangai ana taeka te Uea ae Moan te Rietata ae Iehova:
“Noria! N na katea baiu nakoia natannaomata,Ao N na tabekaarake au kanikina* nakoia botannaomata.+
A na uotiia natim mwaane i anganibaia*Ao a na aonnangaiia natim aine.+
23 A na riki ueea bwa taani kawakiniko,+Ao aia natinuea aine bwa taan tararuaiko.
A na bobaraaki nakoim nako aontano+Ao n newenewea bubuni waem,+Ao ane ko na ataia ae bon Iehova ngai.
A na aki kamaamaeaki te koraki ake a kabotoi aia kantaninga i aou.”+
24 A kona n anaaki mairoun te aomata ae korakora te koraki ake a a kamani kairakinako,Ke a kona ni kamaiuaki te koraki ake a kataenikaiaki iroun te tia karawawataa te aba?
25 Ma e kangai ana taeka Iehova:
“A na kairakinako naba te koraki ake a kataenikaiaki iroun te aomata ae korakora,+Ao a na kamaiuaki te koraki ake a kairakinako iroun te tia karawawataa te aba.+
N na ekiianako te koraki akana ekikonako,+Ao N na kamaiuia natim mwaane.
26 N na karaoiia taani bwainikiriniko bwa a na kana oin irikoia,Ao a na koro ni manging n oin raraaia n aron ae kaanga n te wain ae karewe.
Ao a na ataia aomata* ni kabane bwa bon Iehova ngai,+Ae am tia Kamaiu+ ao te tia Manga Kabooko,+ae Teuare Mwaaka ae Atuan Iakoba.”+
Taiani Kabwarabwara Mai Nano
^ Ebera, “man te biroto.”
^ Ke, “e na anganai Iehova te kaetitaeka ae riai.”
^ Ke, “kaniwangau.”
^ Ke, “tabeakinan.”
^ Ke tao, “tabuki aika akea aroka iai.”
^ Ebera, “bwanibwania.”
^ Ke, “kai ae te kanikina.”
^ Ebera, “iriko.”
