Itaia 57:1-21
57 E mate ane e raoiroi,Ma akea ae e mutiakina aei.
A uotakinako* mwaane aika kakaonimaki ni koaua,+Ao akea ae e ataia bwa e a uotakinako te aomata ae raoiroiIbukin* te kabuanibwai.
2 E a rin i nanon te rau.
A a motirawa i aoni nneia ni wene* akana nakonako ni kabane ma te eti.
3 “Ma ni kaineti ma ngkami, nakomai kaaningkami,Ngkami aika natin te aine ae te tia tabunea,Ngkami aika natin te tia wene ni kimoa ao te aine ae kakabooaki ibukin te wene ni bure:
4 Antai ae kam bwainingareia?
Antai ae kam kauremangangaai wimi nakoina ma ni kaotinakoi newemi?
Tiaki bon natin te bure ngkami,Ae natin te mwamwanaa te aba,+
5 Ake te koraki ake a iraanako korakoran nanoia ni kaibwabwaru i buakon aroka aika bubura,+Ao i aan nako kaai aika manguroro,+Ake a kamateia ataei i nanon taiani mwarua,+Ao i aan tabwenani bwaa aika rietata?
6 Ko a tia n rinei atibun te mwarua aika maran.+
Eng, bon tibwangam baikai.
Ko kabwaroa naba te karea ae te moi i aoni baikai ao ko anga bwaai n tituaraoi.+
Te koaua bwa I riai n rauaki* ni baikai?
7 Ko katauraoa nnem ni wene i aon taubukin te maunga ae rietata,+Ao ko waerake nako iai bwa ko na angakarea.+
8 Ko katea am kanuringa i akun te mataroa ma bouan te mataroa.
Ko kitanai ao ko buuta karabaam.
Ko waerake ao ko kamwawaa nnem ni wene.
Ao ko karaoa te berita ma ngaiia.
Ko tangiria n ibuobuoka ma ngaiia nneia ni wene,+Ao ko karekea taraan ana bwai ni kakariki te mwaane.*
9 Ko ruo nakoni Mereka* ma te bwaaAo te boiarara ae bati.
Ko kanakoia am tia tei nako kiraroa,Bwa ko aonga n ruo nakon te Ruanimate.*
10 Ko korakai n touani kawaim aika bati,Ma ko aki kangai, ‘E kabwaranano!’
E boboou korakoram.
Anne bukina ae ko aki bwarannano* iai.
11 Antai ae ko maakunrang irouna ao ni maakuaNgkai ko a moana kewem?+
Ko aki roko n te uringai.+
Akea te bwai ae ko mutiakinna i nanom.+
Tiaki I teimatoa ni kainabwabu ao n aki tabe ma am mwakuri?+
Mangaia ae ko bon aki kaota maakakiu.
12 N na kaota am baka n raoiroi+ ao am mwakuri,+Ao a na aki kakabwaiako.+
13 Ngkana ko tang ni kani buokaki,Ao ko na aki kamaiuaki n am bouannanti akana ko ikoikotii.+
A na bane n ubaranako n te ang,A na ukakinako n tii te ikeike,Ma e na abana te aba ane e kamanoa irouAo e na bwaibwai n au maunga ae tabu.+
14 E na taekinaki ae kangai, ‘Karaoa te kawai, karaoia! Katauraoa te kawai!+
Kanakoi bwaai n tutuki mani kawaia au aomata.’”
15 Bwa e kangai ana taeka Teuare Rangi n Rietata,Are e maiu* n aki toki+ ma n tabu arana:+
“I maeka n te tabo ae rietata ma n tabu,+Ma te koraki naba aika karawawataaki nanoia* ma n nanorinano,Bwa N na kaoka korakoran nanoia akana mangori,Ao ni kaoka korakoran nanoia akana karawawataaki.+
16 Bwa N na aki kaaitaraia n aki toki,Ke n teimatoa n un.+
Bwa ane e na mamaara te korakora ae te maiu are iroun te aomata ibukiu,+Ao maan naba aika ikeike ake I karaoi.
17 I un n arona ae bure n ukoukora te raka ae reke n te babakanikawai,+Ngaia are I a oreia, I karabaa matau, ao I un.
Ma e teimatoa n nakonako bwa te tia karitei,+ n irira oin nanona.
18 I a tia n nori aroarona,Ma N na kamarurungnga+ ao ni kairiria,+Ao ni kaoka* te kabebeteaki nakoina+ ao nakoia ana koraki aika nanokawaki.”+
19 “I karikii taeka ni karaoiroi n te ria.
E na anganaki te aomata ae raroanako ao te aomata ae kaan te rau ae teimatoa,”+ bon ana taeka Iehova,“Ao N na kamarurungnga.”
20 “Ma akana buakaka kaanga ai aron taari ae mareburebu, ae aki kona n raoi,Ao a teimatoa naona n tetewerake uteuten taari ma te riburibu.
21 “Akea te rau,” bon ana taeka Atuau, “irouia akana buakaka.”+
Taiani Kabwarabwara Mai Nano
^ Ae taekan te mate.
^ Ke tao, “Man.”
^ Ae i nanon te ruanimate.
^ Ke, “I riai ni kabebeteaki.”
^ Tao e kaineti nakon taromauriani bouannanti.
^ Ke tao, “te uea.”
^ Ke, “Tiore,” ae taekan ruanimaten te botannaomata. Nora Nanon Taeka.
^ Ebera, “nimamate.”
^ Ke, “maeka.”
^ Nora Nanon Taeka, “Taamnei.”
^ Ke, “ni kabooa mwina n.”
