Itaia 59:1-21
59 Noria! E aki rangi ni kororo bain Iehova n te aro ae e a aki kona ni kakamaiu,+Ao e aki rangi ni bono* taningana n te aro ae e a aki kona n ongo.+
2 Tiaki ngaia anne, bon ami kairua ae karaurenakoingkami ma Atuami.+
Bon ami bure ae e kairia bwa e na karabai matana mairoumi,Ao n rawa n ongo iroumi.+
3 Bwa a kabarekaaki nanoni baimi n te raraa+Ao tabonibaimi n te bure.
A taekini baika kewe riami+ ao a wirikirikia te buakaka newemi.
4 Akea ae e wewete ibukin te raoiroi,+Ao akea ae e nakon te boowi ma te koaua.
A onimakina te bwai ae akea bongana+ ao a taekina te bwai ae akea uaana.
A bikoukoua te kangaanga ao a bungia te bwai ae karuanikai.+
5 A karaurei bunnimoaia naeta aika boitin naakai,Ao a rarangaa ngaon ten takareau.+
E na mate ane e kang bunnimoaia,Ao te bunnimoa are tabwenaua e na raure bwa te naeta ae te baiba.
6 E na aki riki ngaon ten takareau bwa te kunnikai,Ao a na aki rabunia n te baere a karaoia.+
A karuanikai aia mwakuri,Ao a mena i nanoni baia mwakuri n iowawa.+
7 A biribiri waeia nakoni karaoan ae buakaka,Ao a kawaekoaia bwa a na katutua raraan te aomata ae akea ana bure.+
Aia iango bon iango aika karuanikai.
E mena te uruaki ma te karawawata i nanoni kawaia.+
8 A aki ataa kawain te raoi,Ao akea te kaetitaeka ae riai ni kawaia.+
A kabwaouai kawaia.
Akea ae e toutoui ae e na ataa te raoi.+
9 Anne bukina ae e raroanako iai te kaetitaeka ae riai mairoura,Ao e aki ooira te raoiroi.
Ti teimatoa ni kantaningaa te oota ma noria! bon te rotongitong,Ti kantaningaa te oota ma ti teimatoa n nakonako n te roo.+
10 Ti riringa te oo ni kakaae n aroia mataki.
Ti teimatoa n riringi bwaai ni kakaae n aroia te koraki aika akea mataia.+
Ti tatanako ngke e kirokiro tawanou n aron ae kaanga rotongitongin te tairiki,Ao kaanga maate ngaira i buakoia aomata aika korakora.
11 Ti bane n teimatoa ni bekorara n aroia beeaAo ti tangitang n nanokawaki n aroia taobe.
Ti kantaningaa te kaetitaeka ae riai, ma bon akea,Ti kantaningaa te kakamaiu, ma e raroanako mairoura.
12 Bwa a bati ara karitei i matam,+Ao a kaotioti ni kaaitaraira ara bure teuana ma teuana.+
Bwa a mena ara karitei iroura,Ti atai raoi ara kairua.+
13 Ti bure nakon Iehova ma ni kakeaaAo ti katannako mairoun Atuara.
Ti taekina te karawawata ma te karitei,+Ti bikoukoui n te nano taeka aika kewe ao ti wirikirikii taeka aika kewe aikai.+
14 E a kaokaki te kaetitaeka ae riai,+Ao e tei te raoiroi mai kiraroa.+
Bwa e tatanako te koaua* ni maraen te kaawa,Ao e aki kona n rin te bwai ae eti.
15 E a maunanako te koaua,*+Ao e kuribwaiaki ane e rairakinako man ae buakaka.
E nora aei Iehova ao e aki kukurei,*Bwa ai akea te kaetitaeka ae riai.+
16 E noria bwa ai akea te aomata,Ao e kubanako ngkai akea temanna ae kani bubutii ibukia,Ngaia are e a karokoa te kakamaiu* anganibaina,Ao e boutokaia raoiroina.
17 Ao e karina te raoiroi i aona bwa kaanga te kunnikai ni buakaAo te bwara ni buaka ae te kamaiuaki* i aon atuna.+
E karina te kunnikai ni karekekai bwa oneana+Ao e niria n te ingaingannano bwa kaanga te kunnikai ae te kooti.*
18 E na angania kaniwangaia ibukin te bwai are a karaoia:+
Ae te un nakoia taani kakaitaraa, ao te karekekai nakoia akana kairiribai nakoina.+
Ao e na angania abamwakoro te bae a riai n anganaki.
19 A na maaka aran Iehova mani bungin taai,Ao mimitongina man otin taai,Bwa e na roko Iehova n aron te karaanga ae korakora raanganaAe e karangaa taamneina.
20 “E na roko+ i Tion te tia Manga Kabooia,+Nakoia te koraki ake i aban Iakoba ake a rairaki man te bure,”+ bon ana taeka Iehova.
21 “Ni kaineti ngkanne ma ngai, aio au berita ma ngaiia,”+ bon ana taeka Iehova. “A na aki kona ni kanakoaki mai wim, mai wia natim,* ke mai wia tibum,* taamneiu are mena i aom ma au taeka ake I kaaki i wim,” bon ana taeka Iehova, “mangkai ao n aki toki.”
Taiani Kabwarabwara Mai Nano
^ Ebera, “tinebu.”
^ Ke, “bwainan te koaua.”
^ Ke, “bwainan te koaua.”
^ Ebera, “ao e buakaka i matana.”
^ Ke, “bon ana tokanikai.”
^ Ke, “te kooti ae akea baina.”
^ Ke, “tokanikai.”
^ Ebera, “am kariki.”
^ Ebera, “aia kariki am kariki.”
