Mika 1:1-16
1 Ana taeka Iehova ae roko irouni Mika*+ are kaaini Moreteta, n ana bong Iotam,+ Aati,+ ao Etekia,+ ake uean Iuta,+ ae e noria n te miitara ae kaineti ma Tamaria ao Ierutarem, ae kangai:
2 “Ongora ngkami aika botannaomata ni kabane!
Kakauongo ngkoe ae te aonnaba ma kanoam,Ao ke e riki te Uea ae Moan te Rietata ae Iehova bwa te tia kakoaua ni kaaitaraingkami,+Ae Iehova man ana tembora ae tabu.
3 Bwa noria! E a otinako Iehova man ana tabo.
E na ruo ma n toutoui taabo aika rietata aika n te aonnaba.
4 A na ran taiani maunga i aana,+Ao a na bwenaua mwarua*N aron te nenea* ae mena i taun te ai,Ao n aron raan aika raanganako n te rabee ae katati.
5 Baikai ni kabane bon ibukin ana karitei Iakoba,Ibukin aia bure tibun Iteraera.+
Antai ae e na bukinaki n ana karitei Iakoba?
Tiaki bon Tamaria?+
Ao antai ae e na bukinaki ibukin taabo aika rietata ake i Iuta?+
Tiaki bon Ierutarem?
6 N na karaoa Tamaria bwa te kaawa ae urubekebeke n te tawaana,Ae te tabo n ununiki ibukin taiani nne ni kureebe.
N na karenakoi* atibun neiei nako nanon te mwarua,Ao N na kaotii aana.
7 A na bane ni kamanatuaaki ni kamaeinikunaki ana bouannanti neiei aika kaaraki,+Ao a na bane ni kabuekaki n te ai bwaai n tituaraoi ake e kabooaki iai neiei.*+
N na kamaunai ana bouannanti ni kabane.
Bwa e karekei baikai neiei mani boona ni kakabooaki n te wene ni bure,
Ao a nangi manga riki ngkai bwa booia aine aika kakabooaki.”
8 N na tanginiwenei ma ni mangoo n tang ibukin aei.+
N na nakonako n akea au kau ao n akea kunnikaiu.+
E na riki tanginiweneiu bwa ai aron tanginiweneia tiakaore,*Ao mangoou n tang bwa ai aroni mangooia n tang aotireti.*
9 Bwa e a aki kona ni kamaoaki manekan neiei.+
E a rokoroko i Iuta.+
E a butanako te aoraki aei nakoni mataroan aia oo au aomata, nako Ierutarem.+
10 “Tai katanoataa i Kate,Ao tai tang naba teutana.
Rabinobino i buakon te tano i Betareabera.*
11 Mwananga n akea kunnikaimi ao ni maamaa ngkami aika kaain* Tabira.
A tuai n otinako kaain* Taanan.
E na boo te tanginiwenei i Betaetera ao ane e na anaa te tabo ni kamanomano ni kanakoa mairoumi.
12 Bwa a tataningaa te bwai ae raoiroi kaaini* Marota,Ma e ruo te bwai ae buakaka mairoun Iehova nakoni mataroan oon Ierutarem.
13 Kabaea te kaa ni buaka ma aoti aika birimwaaka ngkami aika kaain* Rakiti.+
Boni ngkoe ae ko moani karika te bure nakon natin Tion te aine,Bwa a kuneaki i nanom ana karitei Iteraera.+
14 Mangaia ae ko na anga bwaintangira ni karaure* nakoni Moretetakate.
Boni bwaai ni mwamwanaa te aba autin Aketiba+ nakoia uean Iteraera.
15 N na karokoa iroumi te tia kataenikaia te aba,*+ ngkami aika kaaini* Maretiaa.+
E na rokoroko i Aruram+ karinean Iteraera.
16 Kamaraingkami ao korei irannatumi ibukia natimi aika kam nabenabeiia.
Kamaraingkami n aron te ikare,Bwa a a tia ni kairakinako mairoumi bwa taenikai.”+
Taiani Kabwarabwara Mai Nano
^ Kauarerekeani Mikaere ke Mikaia, ae nanona, “Antai ae ai aron Iehova?”
^ Ke, “taabo aika aoraoi aika mena n te mwarua.”
^ N taraana ao e kaineti aei ma te bwai ae a karaoia manibeeru bwa nneni kawakinan aia karewe, ao e kai ran te baei.
^ Ebera, “kabwaroi.”
^ Ke, “boona ni kabane ake e kabooaki iai ibukin te wene ni bure.”
^ Nora Nanon Taeka, “Maan.”
^ Nora Nanon Taeka, “Maan.”
^ Ke, “n ana auti Aibera.”
^ Ebera, “te aine ae kaain.”
^ Ebera, “te aine ae kaain.”
^ Ebera, “te aine ae kaain.”
^ Ebera, “te aine ae kaain.”
^ Ke, “ni kaboo.”
^ Ke, “te tia taui aia bwai aomata.”
^ Ebera, “te aine ae kaain.”
