Mika 6:1-16
6 Taiaoka ma ongora n te bwai ae e taekinna Iehova.
Teirake ao uota te tangitang nako matan taiani maunga,Ao ke a ongo bwanaam taian tabuki.+
2 Ongora ngkami aika maunga n ana tangitang Iehova,Ao ngkami aika aan te aonnaba aika matoatoa,+Bwa iai ana tangitang Iehova ni kaaitaraia ana aomata.
E na kauntaeka ni kaitaraa Iteraera+ ni kangai:
3 “Au aomata tera ae I a tia ni karaoia nakoimi?
Tera ae I kakuaingkami iai?+
Kaotioti ni kaitaraai.
4 Bwa I kairingkami ni kaotinakoingkami man te aba are Aikubita.+
I a manga kabooingkami man te auti n toronaki,+Ao I kanakoa Mote ma Aaron ao Miriam n rimoami.+
5 Taiaoka au aomata ma uringa te baere e iangoa karaoana Baraka are Ueani Moaba,+Ao ana kaeka Baraam are natini Beora nakoina,+Ao te baere riki mai Titim+ ni karokoa Kirekara,+Bwa kam aonga n atai ana mwakuri aika raraoi Iehova.”
6 N na roko ma tera i matan Iehova?
N na bobaraaki ma tera i matan te Atua ae mena n te tabo ae rietata?
N na roko i matana ma karea ni kabuekaki aika bwanin,Ao kaao ataei aika kaka teuana aia ririki?+
7 E na kukurei Iehova n taian tiibu mwaane aika nga ma nga,Ao karaanga ni bwaa aika tatabebwi tenga?+
Te koaua bwa N na anga au karimoa te mwaane ibukin au karitei,Ao uaan rabwatau ibukin au bure?+
8 E a tia n tuangko te bwai ae raoiroi ngkoe ae te aomata.
Ao tera ae e tangiria* Iehova mairoum?
Tii bwainan te kaetitaeka ae riai,*+ kawakinan te kakaonimaki ni koaua,*+Ao te nakonako ma Atuam+ ma te nanorinano!+
9 E wewete bwanaan Iehova nakon te kaawa.
A na maaka aram te koraki ake iai irouia te wanawana.*
Mutiakina te kai ao te aomata are bairea te tuuaa.+
10 Te koaua bwa bon iai naba ngkai baika kakawaki aika reke mani mwakuri aika bubuaka n aia auti aomata aika buakaka,Ao te bwai ni baire ae riribaaki ae te eba* ae aki koro mwaitina?
11 E kona n itiaki aroaroni maiuu* ngkana iai irou te kainikatine ae buakaka,Ao te baeki ae kanoana atibu n tau rawawata aika mwamwanaa te aba?+
12 Bwa a onrake n te iowawa ana rorobuaka neiei aika kaubwai,Ao a tataekini keewe kaain neienne,+Ao a mwamwanaa te aba neweia.+
13 “Mangaia ae N na kaikoakiko n oreiko,+Ni kamaroaeko ibukin am bure.
14 Ko na amwarake ma ko na aki rauaki,Ko na namakina te baki i nanom.+
Ao te bwai ane ko kamwaingnga ko na bon aki kona n uotianako ni kawakinna,Ao te baere ko uotianako N na bon anga nakon te kabaang.
15 Ko na uniki koraa ma ko na aki taia.
Ko na toutoui oriwa ma ko na aki kabongana te oera,Ao ko na karaoa te wain ae boou, ma akea te wain ae ko na moi iai.+
16 Bwa kam kawakin ana tua Omri ao aia mwakuri ni kabane kaain ana utu Aaba.+
Ao kam nakonako n aron ae boraoi ma aia taeka n reirei.
Anne bukina ae N na karaoingkami bwa te bwai ni kakamaaku,Ao kaain neienne bwa te bwai ni katiitii.+
Ao ane kam na kaaitara ma aia kakaniko botannaomata.”+
Taiani Kabwarabwara Mai Nano
^ Ke, “bwaina te akoi ao kakaonimaki n am tangira.” Ebera, “tangira te tangira ae kona n onimakinaki.”
^ Ke, “bwainan te eti; bwainan te riai.”
^ Ke, “tuatua.”
^ Ke, “te wanawana ae manena.”
^ Ke, “akea au bure.”
