Mika 7:1-20
7 Ai kananoangara ngai! Bwa I a riki bwa ai aron te aomataAe aki reke irouna teuana te amwi ni kureebe bwa kanana,Ke te biiku ae kangkang ae I* bwaruia,Imwin taiakin uaanikai aika rereke n tain te kabuebueAo te karemrem imwin taiakin te kureebe.
2 E a tia ni mauna* man te aonnaba te aomata ae kakaonimaki ni koaua,Ao akea te aomata ae raoiroi i buakoia aomata.+
A bane ni kakaran ibukin te katuturaraa.+
Ao e kamwanea tarina temanna ma temanna n te karaun.
3 A mwaatai baia ni karaoan ae buakaka.+
E kairoroa te bwai teuana te toka,Ao e bubutii te kaniwanga te tia moti,+Ao te aomata ae kakannato e kaotii baike e* mataaiakin,+Ao a ikotaki ni mwakuria.*
4 Ane te kabanea n raoiroi irouia kaanga ai aron aroka aika kateketeke,Ao ane moan te eti irouia e kammaraki riki nakon te oo ae te aroka ae kateketeke.
E na roko aia bong am tia tantani ao ni kaetaki taekam.+
Ane a na nako nanoia ngkai.+
5 Tai onimakina raomKe n onimakina raoraom ni kaan.+
Tarataraa raoi te bwai ae ko taekinna nakon ane e wene i bwanibwanim.
6 Bwa te nati te mwaane e na ribaa tamana,Ao e na teirake te nati te aine ni kaitaraa tinana,+Ao buun te nati te mwaane e na kaitaraa tinani buuna.+
E na riki te aomata bwa aia kairiribai kaaini batana.+
7 Ma N na teimatoa ngai n tantani n tataningaa Iehova.+
N na kaota te nano ni kan tataninga* ibukin te Atua ae te tia kamaiuai.+
E na ongo irou Atuau.+
8 Tai kimwareirei ibukiu ngkoe ae te tia kairiribai nakoiu.*
E ngae ngke I bwaka ma N na manga teirake.
E ngae ngke I maeka n te rotongitong, ma e na riki Iehova bwa au oota.
9 N na kekeiaki i aan unin Iehova,Bwa I a tia ni bure nakoina,+Ni karokoa te tai are e tei iai ibukin au tangitang ma ni karokoa te kaetitaeka ae riai ibukiu.
E na kaotinakoai nakon te oota,Ao N na nora raoiroina.
10 E na noria naba te tia kairiribai nakoiu,Ao e na rabunaki n te maamaa neiere kangai nakoiu:
“E nga Iehova ae Atuam?”+
A na tataraa neiei matau.
E nang toutouaki ngkai neiei n ai aroni bokabokan taiani kawai.
11 E na riki bwa te bong ibukini katean oom aika taian atibu.
E na kararoaaki riki te tia* n te bong anne.
12 Ane a na roko iroum aomata n te bong anneMai Aturia ao mani kaawa ake i Aikubita,Ao mai Aikubita ni karokoa te Karaanga,*Man taari teuana nakon taari teuana, ao man te maunga teuana nakon te maunga teuana.+
13 Ao e na kamaroaeaki te aba ibukia kaaina,Bwa mwin te baere a a tia ni karaoia.*
14 Kawakinia am aomata n am kai bwa kaanga tiibu ngaiia, ae te nanai ae tibwangam,+Ae maeka n tii ngaia n te buakonikai, i nukan te tabo are a unikaki iai kainnamwarake.
Ke a amwamwarake i Batian ao i Kireata+ n aroni boong ake rimoa.
15 “N na kaotii baika kamimi nakoia,N aroni boong ake ko otinako iai man te aba are Aikubita.+
16 Ane a na noria natannaomata ao a na maamaa, n aki ongei korakoraia ni kabane.+
Ane a na kaaki baia i aoni wia,Ao a na bono taningaia.
17 A na newenewea te tano n aroia naeta,+Ao a na otinako man aia nono ma te rurubenebene, n aroia manin te aonnaba aika kawakawa.
Ane a na rinnako ma te maakunrang nakon Iehova ae Atuara,Ao a na maakuko.”+
18 Antai te Atua ae ai aromAe kabwarai aia kairua nikiraia ana aomata,*+ ao ni mwanuokin aia bure?+
E na aki un n aki toki,Bwa e kimwareirei n te tangira ae koaua.*+
19 Ane e na manga nanoangaira,+ ao e na tokanikai i aon* ara kairua.
Ko na tewenakoi aia bure ni kabane i kabini marawa.+
20 Ko na kaota te kakaonimaki nakon Iakoba,Ao te tangira ae koaua* nakon Aberaam,N aron are ko taetae n tuea iai nakoia ara bakatibu ni boong ake rimoa.+
Taiani Kabwarabwara Mai Nano
^ Ebera, ne’phesh, nora Nanon Taeka.
^ Ke, “bua.”
^ Ebera, ne’phesh, nora Nanon Taeka.
^ Ebera, “a ikotaki n rarangaia.”
^ Ke, “N na tataninga ma te taotaonakinnano.”
^ N te taetae n Ebera ao te taeka ibukin “te tia kairiribai” bon taekan te aine.
^ Ke tao, “e na raroanako te tua.”
^ Ae taekan te Iuberetiti.
^ Ebera, “Ibukin uaan aia mwakuri.”
^ Ebera, “tibwangana.”
^ Ke, “te tangira ae kona n onimakinaki.”
^ Ke, “toutoua; kataenikaia.”
^ Ke, “te tangira ae kona n onimakinaki.”