Mwakuri 17:1-34
17 A a mwananga ngkai n rinanon Ambibori ao Aboronia ni kaea Tetaronike,+ ike e mena iai aia tinakoka* I-Iutaia.
2 Mangaia are ni kaineti ma kateini Bauro,+ e rinnako nakoia ao e reireinia man te Koroboki ae Tabu+ i nanon tenua te bongi n taabati,
3 ni kabwarabwaraa nakoia ni kakoauai mani baika koreaki bwa e riai marakin+ te Kristo ma mangautina mai buakoia maate,+ ni kangai: “Boni ngaia te Kristo, ae Iesu ae I taekinna nakoimi.”
4 N tokina, ao a a riki tabeman mai buakoia bwa taan onimaki, ao a a reitaki ma Bauro ao Tira.+ A rangi ni mwaitikurikuri naba kaaini Kuriiti ake a a taromauria te Atua, n ikotaki naba ma aine aika bati ake a kakannato riki.
5 Ma a bakantang+ I-Iutaia ao a ikotiia mwaane tabeman aika bubuaka ake a bon aoaoriia n te tabo ni mwakete, ao a ikotiia bwa te koraki n akiako, ao a a kakiriweia kaain te kaawa. A ninia ana auti Iaton ao a ukoukoriia Bauro ma Tira bwa a na katikiia nako matan te koraki n akiako.
6 Ngke a aikoa kuneia ao a a katika Iaton ma taari tabeman nakoia taan tautaeka n te kaawa, ao a takarua ni kangai: “A a roko naba ikai aomata aikai ake a kakiriwea* te aonnaba ni kabutaa,+
7 ao e butimwaeiia Iaton bwa ana iruwa. A bane aomata aikai ni kaaitarai ana tua Kaitara* n taekinna bwa iai riki te uea bwa Iesu.”+
8 Ao a kiriwe te koraki ma taan taua taekan te kaawa ngke a ongo baikai,
9 ao imwin reken te mwane ae tau mairoun Iaton ibukini kainaomataana ma naake raona, ao a a tibwa kanakoia.
10 Ao a ienikuri taari ngke e a bong ni kanakoia Bauro ma Tira nako Beroia. Ngke a a roko, ao a a rin n aia tinakoka I-Iutaia.
11 A raraoi riki nanoia I-Iutaia ake i Beroia nakoia ake i Tetaronike, bwa a butimwaea ana taeka te Atua ma te ingaingannano ae moan te korakora, ao a ukeuke raoi n te Koroboki ae Tabu n te bong ae koraki bwa a koaua baikekei ke a aki.
12 Mangaia are a bati i buakoia ake a a riki bwa taan onimaki, ao a bati naba aine ma mwaane tabeman aika kaaini Kuriiti aika kakannato ake a a onimaki.
13 Ma ngke a a ongo I-Iutaia ake i Tetaronike bwa e tataekinaki naba ana taeka te Atua i Beroia irouni Bauro, ao a a manga nako ikekei ni kaunia ma ni kakiriweia te koraki ae bati.+
14 A ienikuri ngkanne taari ni kanakoa Bauro nakon te matabaiawa,+ ma a tiku ikekei Tira ma Timoteo.
15 Ma naake a raona Bauro a iria ni karokoa rokona i Atenai, ao a a kitanna ngke e tuangia Bauro bwa a na kawaekoaia Tira ma Timoteo+ nakoina.
16 Ao ngke e tataningaiia Bauro i Atenai, ao e maraki nanona ngke e nora te kaawa bwa e buta n taiani bouannanti.
17 Mangaia are e a reireinia I-Iutaia n aia tinakoka, ao aomata riki tabemwaang ake a taromauria te Atua, ao e reirei naba ni katoabong nakoia te koraki ake a mena n te tabo ni mwakete.
18 Ma a a kauntaeka ma ngaia tabeman kaain te koraki n Ebikourio* ao n Tetoiko* ake taani karioiango, ao a kangai tabeman: “Tera ae e kan taekinna te tia bwarantiko aei?” A taku ake tabemwaang: “Kaanga te tia taekinia atua aika ianena.” A taekina aei ibukina bwa e tataekina te rongorongo ae raoiroi ae taekan Iesu ma te mangauti.+
19 Mangaia are a taua ao a kairia nakon te Areiobako* ao a taku: “Ti kona n ataia bwa tera te reirei ae boou aei ae ko taekinna?
20 Bwa ko taekini baika boou i taningara aika ti mimi iai, ao ti kan atai nanoia.”
21 Ni koauana, ngkana a kaaki botuia kaain Atenai ni kabane ma ianena ake iai,* ao akea te bwai ae a kani kakaraoia, ma tii tataekinani baika boou, ke a ongongora iai.
22 E a tei ngkai Bauro i buakoia kaain te Areiobako+ ao e taku:
“Mwaanen Atenai, I noria bwa e bati riki kani karineaia atua* iroumi nakoia aomata ake tabemwaang.+
23 Bwa n aron anne, ngke I nakonako n ami kaawa ma n taratarai raoi baike kam taromaurii, ao I nora naba te baonikarea ae koreaki i aona ae kangai, ‘Nakon te Atua ae Aki Ataaki.’ Ai ngaia ae I a taekina nakoimi te Atua aei, are kam aki ataia are kam taromauria.
24 Te Atua are karaoa te aonnaba ma bwaai ni kabane ake iai, boni ngaia Ueani karawa ma aonnaba+ ae e aki mamaeka i nanon tembora aika karaoaki ni baia aomata,+
25 ao e aki naba buokaki irouia aomata bwa aongkoa e kainnanoa te bwai teuana,+ ibukina bwa boni ngaia ae anga te maiu ma te ikeike+ ao bwaai ni kabane nakoia aomata nako.
26 Ao e karaoiia natannaomata nako mairoun te aomata ae tii temanna+ bwa a na maeka ni kabutaa te aonnaba,+ ao e rinei taai aika baireaki ma ni bairei tiaia ni maeka aomata,+
27 bwa a aonga n ukoukora te Atua, ma ni kakorakoraia bwa a aonga ni kunea.+ Ma ni koauana, e bon aki raroa mairoura n tatabemanira nako.
28 Bwa boni ngaia ae ti maiu irouna ao ti kakammwakuri, ao iai ngaira, n aron are a taekinna tabeman ami taani kario ni kangai, ‘Bwa bon natina* naba ngaira.’
29 “Mangaia ae ngkai ti a ataia bwa natin* te Atua+ ngaira, ti aki riai n iangoa te Atua bwa kaanga te koora ke te tirewa ke te atibu, ae ai aron te bwai ae karaoaki ni baia aomata+ ni kaineti ma te bwai are a boni karioa karaoana.
30 Ni koauana, e aki mutiakin taai ake a ronnano+ iai aomata te Atua, ma e tuangia ngkai aomata ni kabane n taabo nako bwa a riai n rairi nanoia,
31 ibukina bwa e a tia n namata te bong are e na motika iai taekan+ te aonnaba ni kabutaa n te raoiroi, iroun te aomata are e mwiokoia, ao e kaota kakoauaana nakoia aomata nako ngke e kautia mai buakoia maate.”+
32 Ao ngke a ongo taekan te mangauti mai buakoia maate, ao a a kakaniko+ tabeman, ma a taku ake tabeman: “Ti na manga ongora riki iroum taekan aei.”
33 Ai ngaia are e a kitania Bauro,
34 ma iai mwaane tabeman ake a raonna ao a a riki bwa taan onimaki. I buakoia naakai bon Rionutio ae te tia moti ni boowin te Areiobako, ao te aine ae arana Tamariti ao tabeman riki i rarikia naakai.
Taiani Kabwarabwara Mai Nano
^ Nora Nanon Taeka.
^ Ke, “kauekea te kangaanga n.”
^ Nora Nanon Taeka.
^ Nora Nanon Taeka.
^ Nora Nanon Taeka.
^ Nora Nanon Taeka.
^ Ke, “ake a roko.”
^ Kuriiti, “maakakia taimonio.” Kaaini Kuriiti rimoa a iangoia taimonio bwa kaanga atua aika raoiroi ke a buakaka.
^ Ke, “kanoana.”
^ Ke, “kanoan.”
