Naum 3:1-19
3 Ke e reke kain te kaawa ae katuturaraa!
E on neiei n te mwamwanaa te aba ao n te iraa.
E aki kona n ae e na akea konan neiei!
2 Iai karongoaan te kai ni kataere ao kekeruaatain taiani wira,Ao te aoti ae biribiri ma te kaa ni buaka ae rurunga.
3 Te tia toka i aon te aoti, te kabaang ae raititi, ao te kainiwai ae raneanea,Aomata aika kamateaki aika mwaitikurikuri, ao rabwataia maate aika bwarikoriko.
E a aki kona ni warekaki mwaitin rabwataia aomata aika mate.
A teimatoa n tatanako naakai i aon rabwataia aomata aika mate.
4 E riki aei ibukin ana mwakuri ni wewene ni bure aika bati te aine ae kakabooaki,Ae te aine ae baaraoi ao e tamaroa, ae te tia tabunea ae mwaatai,Ae e kamwaneia natannaomata n arona ni kakabooaki ibukin te wene ni bure, ao utu nako n ana tabunea.
5 “Noria! I a ekikonako,”* bon ana taeka Iehova ae Atuaia taanga ni buaka,*+“N na ietaarake ririm nako aon ubum,Ao N na kariaia natannaomata bwa a na nora bwain rabwatam ae riai ni karabaaki,Ao tautaeka n uea a na nora kamaamaeam.
6 Ao N na tewenakoi baika kamwara i aom,Ao N na karaoiko bwa ko na koro n ribaaki,Ao N na karaoiko bwa te bwai ni kamataku.+
7 A na birinako mairoum aomata nako akana noriko+ ao a na kangai,‘E a uruakaki Ninewe!
Antai ae e na kaota nanoangaan neiei?’
N na kuneia ia taani karaua nanom?
8 Ko raoiroi riki nakon Noamon*+ are tekateka i rarikini kawain nako ranin te Naire?+
E otabwaniniaki neienne n raan.
Kaubwain neienne bon taari ao oona bon taari.
9 Nibwani korakorana ae bati bon Itiobia ao Aikubita naba.
Taani buokiko+ boni Buta+ ao I-Ribua.
10 Ma e bon riki naba neienne bwa te taenikai,+E irinako bwa te taenikai.
A tiringaki naba natina n te aro ae iowawa i tutani kawai nako.*
A karaoa te ananga ni katekeraoi ibukia ana rorobuaka aika karineaki,Ao a bane ana rorobuaka aika kakannato ni kabaeaki ni bwaai ni kabaewae.
11 Ko na koro ni manging naba,+Ao ko na nako ni karabako.
Ko na ukoukora kamanoam mairouia taani kairiribai.
12 Titeboo am nono ni kabane ma kaai aika biiku ma moan uaaia aika tawaa.
Ngkana a ioaki ao a na mrara nako nanoni wia taani kabwauti.
13 Noria! Titeboo am taanga ni buaka ma aine akana i nanom.
A na tangaina n ukinako mataroan oon abam imwaia aiam.
E na kabueki kaini kamatoaani mataroan am oo te ai.
14 Itia te ran ao katauraoi imwain te tai n otabwaniniaki!+
Kamatoai am nono.
Ruuo rikaaki nakon te bokaboka ao toutoua te tano ae riburibu,Ao karaoi taiani buriki.
15 E na kabuekiko naba ikanne te ai.
E na koreiko ni kabwakako te kabaang.+
E na kabwautiko n aroia rokati aika ataei ngkana a kabwauti aroka.+
Kabatiako n aroia rokati aika ataei!
Eng, kabatiako n aroia rokati!
16 Ko kabatiaia riki am tia iokinibwai nakon itoini karawa.
E kuota kunna te rokati ae ataei ao e kibanako.
17 Titeboo am tia tantani ma rokati,Ao titeboo am mataniwi ma te nna n rokati.
A katania i nanon taian oo aika atibu n te bong ni kamwaitoro,Ma ngkana e oti taai ao a kibanako,Ao akea temanna ae ataa mwia.
18 Ngkoe ae uean Aturia, a nimatutu am tia kawakintiibu,Ao a tiku n aia auti am bwaanuea.
A uamaenako am aomata riaoni maunga,Ao akea temanna ae ikotiia ni kabane.+
19 Bon akea kabebeteani karawawataam.
E a aki kona ni kamaoaki ikoakim.
A na bane aomata ake a ongo rongorongom n uboi baia,+Bwa antai ae e tuai ni karawawataaki n iowawaam ae teimatoa?”+
Taiani Kabwarabwara Mai Nano
^ Ae taekan Ninewe.
^ Ke, “Tabaota.” Nora Nanon Taeka.
^ Ae taekan Tebeti.
^ Ebera, “i taboni kawai ni kabane.”