Otea 1:1-11
1 Ana taeka Iehova are roko iroun Otea* are natini Beeri n ana bong Utia,+ Iotam,+ Aati,+ ao Etekia,+ ake uean Iuta,+ ao n ana bong Ieroboam+ are natin Ioaati+ are uean Iteraera.
2 Ngke e a taetae Iehova rinanon Otea, ao e kangai Iehova nakon Otea: “Naako, ao ko na mare ma te aine ae e na riki bwa te aine ae kakabooaki ibukin te wene ni bure,* ao a na reke natim man aron neienne ni kakabooaki,* ibukina bwa e a rairakinako raoi te aba aei mairoun Iehova ibukin aroia ni kakabooaki.”*+
3 Mangaia are e nako teuaei ao e mare ma Komera are natin Tiberaim, ao e a bikoukou neiei ao e bungia natin teuaei ae te mwaane.
4 Ao e taku Iehova nakoina: “Aranna bwa Ietireera,* bwa teutana riki te tai ao N nang kaeta taekan ana utu Ieu+ n ekianako, ibukin te mwakuri ni katuturaraa nakon Ietireera,* ao N na karokoa n tokina te tautaeka n uea ae Iteraera.+
5 N te bong anne ao N na otea aia kainikatebe kaain Iteraera n te Mwarua* i Ietireera.”
6 E a manga bikoukou riki neiei ao e bungia te nati te aine. Ao e taku te Atua nakon teuaei: “Aranna bwa Roruama,* bwa N nang aki manga nanoangaiia+ tibun Iteraera, ibukina bwa N na boni kakioianako.+
7 Ma N na nanoangaiia tibun Iuta,+ ao N na kamaiuia ngai ae Iehova ae Atuaia.+ N na aki kamaiuia n te kainikatebe, ke n te kabaang, ke n te buaka, ke n taian aoti, ke irouia taan toka i aoia aoti.”+
8 Imwini kakorirakin Roruama, ao e a manga bikoukou neiei ao e bungia te nati te mwaane.
9 Ao e taku te Atua: “Aranna bwa Roami,* ibukina bwa ai tiaki au aomata ngkami ao ai tiaki Atuami ngai.
10 “Ao mwaitiia tibun Iteraera e na riki n aron tanoni biken taari ae aki kona ni warekaki ke n ataaki mwaitina.+ Ao n te tabo are e taekinaki iai ae kangai nakoia, ‘Ai tiaki au aomata+ ngkami,’ e na bon taekinaki iai nakoia ae kangai, ‘Bon natin te Atua ae maiu ngkami.’+
11 Ao a na ikotaki ni kabane kaain Iuta ma kaain Iteraera n te nano ae tii teuana,+ ao a na rinea te tia kairiri ae tii temanna i bon ibukia, ao a na waerake n otinako man te aba, bwa bon te bong ae kakawaki ana bong Ietireera.+
Taiani Kabwarabwara Mai Nano
^ Kauarerekean Otiaia, ae nanona, “Kamaiuaki Iroun Iah; E a Tia Iah ni Kakamaiu.”
^ Ke, “wewene ni bure; wene ni bure ma aomata aika kakaokoro.”
^ Ke, “wewene ni bure; wene ni bure ma aomata aika kakaokoro.”
^ Ke, “wewene ni bure; wene ni bure ma aomata aika kakaokoro.”
^ Ae nanona, “E na Unika te Koraa te Atua.”
^ Te kaawa n uea, ike a mamaeka iai aia uea tibun Iteraera ake mai meang, e ngae ngke bon Tamaria kautun aia kaawa. Nora 1Ue. 21:1.”
^ Ke, “te Tabo ae Aoraoi ae Mena n te Mwarua.”
^ Ae nanona, “Aki Nanoangaaki.”
^ Ae nanona, “Tiaki Au Aomata.”
