Otea 2:1-23
2 “Kam na kangai nakoia tarimi, ‘Au aomata!’*+
Ao kangai nakoia mwaanemi, ‘Bon te aine ngkoe ae ko nanoangaaki!’*+
2 Kam na bukina tinami, bukinna,Bwa bon tiaki buu neienne,+ ao tiaki buuna ngai.
E riai ni kaaki mairouna arona ni kakabooaki ibukin te wene ni bure,*Ao ana wene ni kimoa mai marenani mammana.
3 Bwa I kaawa ni buuta karabaana ao ni karaoia nakon arona n te bong are e bungiaki iai,Ao ni karaoia bwa kaanga te rereua,Ao ni karikia bwa te aba ae akea te ran iai,Ao ni karaoia bwa e na mate n te bora n taka.
4 N na aki nanoangaiia natina mwaane,Bwa bon naati aika reke man arona ni kakabooaki.*
5 Bwa e a tia tinaia n riki bwa te aine ae kakabooaki.*+
E a tia ni karaoa te aro ae kamaamaa neiere bikoukouia,+ bwa e taku,‘N na rimwia naake au tangira aika korakora aia kaibwabwaru,+Ake te koraki ake a anganai kanau te kariki ma au ran,Ao kunnikaiu ae buraen te tiibu ma au rinen, ao au oera ma nimau.’
6 Mangaia ae N na tuka kawain neiei n te oo ae te aroka ae kateketeke,Ao N na katea te oo ae te atibu n tukia iai,Bwa e aonga n aki kona n reke kawaina.
7 E na rimwia naake ana tangira aika korakora aia kaibwabwaru ma e na aki ooiia.+
E na ukoukoriia ma a na aki reke irouna.
Imwina ao e na kangai, ‘N nang okira teuare moani buu,+Bwa e nakoraoi riki arou n te tai arei nakon ae ngkai.’+
8 E aki ataia ae boni ngai are I anganna te uita,*+ te wain ae boou, ao te oera.
Ao boni ngai are I anganna te tirewa ae bati ma te koora,Ake a kabonganai ibukini Baara.+
9 ‘Mangaia ae N na oki ao n uotaanako au uita n tain te tai,Ao au wain ae boou n tain ikotakina,+Ao N na katikaanako kunnikaiu ae buraen te tiibu ao au rinen ake a rabuna bwain rabwatan neiei ae riai ni karabaaki.
10 N nang kaotii ngkai bwain rabwatan neiei aika riai ni karabaaki bwa a na noria raoi naake ana tangira ake a korakora aia kaibwabwaru,Ao akea te mwaane temanna ae e na kamaiua neiei mai nanoni baiu.+
11 N na katoka kimwareirein neiei ni kabane,Ana toa nako,+ bongin nako otin namwakaina, ana bongi n taabati, ao ana bongi n toa nako.
12 Ao N na urui arokan neiei aika kureebe ao arokana aika biiku, ake e kangai ibukia:
“Boni boou baikai aika a anganai naake au tangira ake a korakora aia kaibwabwaru,”N na oniki nakon taiani buakonikai,Ao a na kang manin te tawaana aika moaanti.
13 N na kaeta taekan neiei n ekianako ibukini boong ake e anga iai taiani karea nakoni bouannantin nako Baara,+Ngke e katamaroaa n ana mwamwa ao ni bwaai ni katamaroa, ao e kaeiia naake ana tangira ake a korakora aia kaibwabwaru.
Ao boni ngai ae e mwaninga taekau,’+ bon ana taeka Iehova.
14 ‘Mangaia ae N na anaa nanon neiei,Ao N na kairia nakon te rereua,Ao N na tataetae n anaa nanona.
15 N na manga kaoki ana nne ni kureebe nakoina ni moa man te tai anne,+Ao e na rinnako n rinanon te Mwarua* ae Akora+ nakon te aba ae reke iai te kantaninga.
Ane e na kaeka neiei ikanne n aron are n ana bongi n roro n rikirake,N aron are n te bong are e otinako iai man te aba are Aikubita.+
16 Ao n te bong anne,’ bon ana taeka Iehova,‘Ane e na atongai ni kangai, Buu teuaei, ao e na aki manga atongai ni kangai, Au toka.’*
17 ‘N na kanakoi araia bouannantin nako Baara mai win neiei,+Ao a na aki manga uringaki araia.+
18 N te bong anne ao N na karaoa te berita ibukia ma manin te tawaana aika moaanti,+Ao mannikiba ake i annang, ao baika kawakawa i aontano,+Ao N na kanakoa man te aba te kainikatebe ao te kabaang ao te buaka,+Ao N na kaweneia* ma te mweraoi.+
19 N na kainrouai ma ngkoe n aki toki,Ao N na kainrouai ma ngkoe n te raoiroi ao n te kaetitaeka ae riai,N te tangira ae koaua* ao n te nanoanga.+
20 N na kainrouai ma ngkoe n te kakaonimaki,Ao ko na bon ataa Iehova.’+
21 ‘N te bong anne ao N na kaeka,’ bon ana taeka Iehova,‘N na kaekaa karawa,Ao karawa e na kaekaa te aonnaba.+
22 Ao te aonnaba e na kaekaa te uita ma te wain ae boou ao te oera,Ao ane a na kaekaa Ietireera*+ baikai.
23 N na unika neiei i bon ibukiu n te aonnaba n aron te koraa,+Ao N na nanoangaa neiere aki nanoangaaki,*N na kangai nakoia te koraki ake tiaki au aomata:* “Bon au aomata ngkami,”+Ao ane a na kangai: “Bon Atuara ngkoe.”’”+
Taiani Kabwarabwara Mai Nano
^ Ke, “wewene ni bure; wene ni bure ma aomata aika kakaokoro.”
^ Ke, “wewene ni bure; wene ni bure ma aomata aika kakaokoro.”
^ Ke, “wewene ni bure (wene ni bure ma aomata aika kakaokoro).”
^ Ke, e kona n nanona “te baare.”
^ Ke, “te Tabo ae Aoraoi ae Mena n te Mwarua.”
^ Ke, “Au Baara.”
^ Ke, “kamaiuia.”
^ Ke, “te tangira ae kona n onimakinaki.”
^ Ae nanona, “E na Unika te Koraa te Atua.”
