Otea 9:1-17
9 “Tai kimwareirei ngkoe ae Iteraera,+Ao tai kakatonga n ai aroia botannaomata.
Bwa ko tiotionako mairoun Atuam ibukin arom ni kakabooaki ibukin te wene ni bure.*+
Ko taatangira te boo ae reke mani kakabooakim ibukin te wene ni bure n taabo ni kaaki kun ni uita.+
2 Ma e na aki kaamwarakeia naakai te tabo ni kaaki kun ni uita ao te nne ni kamanti kureebe,Ao e na akea te wain ae boou ibukin neiei.+
3 A na aki teimatoa ni maeka i aban Iehova,+Ma n oneani mwin anne e na okira Aikubita Eberaim,Ao a na kana te bwai ae kamwara i Aturia.+
4 A na aki manga kabwaroa te karea ae te wain nakon Iehova,+Ao e na aki kukurei n aia angakarea.+
Tii te arona ngaiia ma te amwarake ae kanaki n tain te nanokawaki.
A na bane ni kamwaraeia i bon irouia te koraki ake a kanna.
Bwa kanaia bon tii ibukia,Ao e na aki uotaki nakon ana auti Iehova.
5 Tera ae kam na karaoia n te bong ni botaki,*Ni bongin ana toa Iehova?
6 Bwa noria! ane a na birinako ibukin te kamaunanakoaki.+
E na ikotiia Aikubita+ ao e na kaiia Membiti.+
A na bwainaki aia bwai aika rangi ni kakawaki aika tirewa irouia uteute aika kateketeke,Ao a na mena aroka aika kateketeke n aia umwanrianna.
7 A na roko boongi n tutuo,+Ao a na roko boong ni karekekai,Ao e na ataia Iteraera.
E na riki n nanobaba aia burabeti ao e na rangirang teuare kairaki ana taeka rinanon te taamnei,Ibukina bwa a bati am bure, ao e a bati te riribai nakoim.”
8 Bon raon Atuau+ ana tia tantani+ Eberaim.
Ma ngkai, a a bane n riki kawaia ana burabeti+ bwa kaanga ana bwai ni kamwane te tia kamwaneia mannikiba,Ao e mena te riribai n ana auti Atuan te burabeti anne.
9 A iinako n te kamaunaaki n aroni bongini Kibea.+
E na uringa aia kairua ao ni katuuaaeia ibukin aia bure.+
10 “I kunea Iteraera n aroni kureebe n te rereua.+
I noriia am bakatibu n aroni moan uaan te aroka ae te biiku.
Ma a nakoni Baara-beore,+Ao a katabuia i bon irouia nakon te bwai ae kanuka,*+Ao a a kamwara n ai aron te baere a tangiria.
11 E kibanako karinean Eberaim n aron te mannikiba.
Ai akea te bung, akea te bikoukou, ao akea te taorake.+
12 E ngae naba ngkana a kaikawaiia ataei,Ma N na anaiia mairouia ni karokoa ae ai akea te aomata n tiku.+
Eng, ke e reke kaia ngkana I tannako mairouia!+
13 Kaanga ai aron Turo+ irou Eberaim ae unikaki n te tawaana,Ma e riai ngkai Eberaim ni kaotinakoia natina mwaane nakon te kamateaki.”
14 Iehova, angania te baere ko riai n angania,Te biroto ae a bwabwaka naati ake iai, ma mamma aika akea rania.*
15 “A mena buakakaia ni kabane i Kirekara,+ bwa I ribaiia ikanne.
N na kakioianako man au auti ibukin aia mwakuri aika bubuaka.+
N na aki manga tangiriia,+Bwa a bane n imanono aia toka.
16 E na kaikoakaki Eberaim.+
A na kamwautakatakaaki wakaaia, ao a na aki karikiuaa.
E ngae ngke a bung, ma N na kamateia kanoaia ake a nabenabeiia.”
17 E na rawa Atuau nakoia,Bwa a aki ongo irouna,+Ao a na riki bwa taan tiotionako i buakoia natannaomata.+
Taiani Kabwarabwara Mai Nano
^ Ke, “wewene ni bure; wene ni bure ma aomata aika kakaokoro.”
^ Ke, “ami baka n amwarake aika baireaki.”
^ Ke, “te atua ae kanuka.”
^ Ke, “mwautakataka.”