Ruka 15:1-32
15 Ao a ikoikotaki i rarikin Iesu taan rikoa te taekiti ma taani bure ni kabane bwa a na ongora irouna.+
2 Ao a wirikiriki Baritaio* ao taani koroboki* ni kangai: “E butimwaeiia taani bure te aomata aei ma n amwamwarake ma ngaiia.”
3 E taekina ngkanne te kaikonaki aei nakoia ni kangai:
4 “Antai i buakomi ae 100 ana tiibu, ao ngkana e bua temanna mai iai, ao tiaki e na kitania ake 99 n te rereua ao n nako ni kakaaea are e bua ni karokoa rekena?+
5 Ao ngke e a kunea, ao e aonnangaia ma te kimwareirei.
6 Ao ngke e a roko ni mwengana ao e weteiia raoraona ma kaain rarikina, ao e kangai nakoia, ‘Kam na kimwareirei ma ngai, bwa I a kunea au tiibu are bua.’+
7 I tuangingkami bwa n aron naba anne, e na bati riki te kimwareirei i karawa ibukin te tia bure ae tii temanna ae raira nanona,+ nakon te kimwareirei ibukia ake 99 ake a raoiroi ake a aki kainnanoa te rairannano.
8 “Ke tera aron te aine ae iai ana mwane ae tebwina te turakemwa,* ae ngkana e bua teuana ana turakemwa,* ao tiaki e na kauraa te taura ma n iaakina ana auti ao ni kakaaea raoi ni karokoa rekena?
9 Ao ngke e a kunea, ao e weteiia raoraona* ma kaain rarikina ao e kangai, ‘Kam na kimwareirei ma ngai, bwa I a kunea te turakemwa* are I kabuaa.’
10 I tuangingkami bwa n aron naba anne, e na ueke te kimwareirei irouia ana anera te Atua ibukin te tia bure ae tii temanna ae raira nanona.”+
11 Ao e taku: “Iai temanna te aomata ae uoman natina mwaane.
12 Ao e taku are te karimwi nakon tamana, ‘Tamau, ko na anganai tibwau man am bwai.’ Mangaia are e tibwai ana bwai nakoia.
13 Tabebong imwina ao e a ikotii ana bwai ni kabane te nati are te karimwi ao e a mwananga nakon te aba ae raroanako, ao ikanne are e a bakataei iai ana bwai n te maiu ni kaibwabwaru.*
14 Ngke a a bane ana bwai, ao e a roko te rongo ae korakora n te aba anne ni kabutaa, ao e a rotaki n te kainnano.
15 N tokina, ao e a reke angana n nimta temanna kaain te aba anne, ao e kammwakuria n ana tawaana bwa e na tararuai ana nanai ni beeki.+
16 Ao e kani kakanuaia ni kanaia beeki, ao akea ae e anganganna kanana.
17 “Ngke e a oki ana iango, ao e taku, ‘Ai batira ana tia mwakuri tamau aika kau amwarake, ao ngai I a kaani mate ikai n te rongo!
18 N na teirake ao N na mwananga nakon tamau ao N na kangai nakoina: “Tamau, I bure nako karawa ao nakoim.
19 I a aki tau n aranaki bwa natim. Karikai bwa temanna naba am tia mwakuri.”’
20 Mangaia are e teirake ao e a nakon tamana. Ngke e a ria, ao e a noria tamana ao e korakora nanoangaana, ao e biri n rabwatia,* ao e kaboria ma ngaia.
21 E taku ngkanne te nati nakon tamana, ‘Tamau, I bure nako karawa ao nakoim.+ I a aki tau n aranaki bwa natim.’
22 Ma e taku te tama nakoia ana toro, ‘Kawaekoaingkami n uotaamai te kauaatao ae te kabanea n tamaroa, ao karinna i aona, ao karina te mwamwa i baina ao kaau i waena.
23 Uotaamai naba te kao te teei ae kamarikaaki ao tiringnga, ao ti na amwarake ni bukamaru,
24 bwa e a tia ni mate natiu aei ma e a manga maiu,+ e bua ao e a manga reke.’ Ao e a boo atin te kukurei.
25 “Ao e mena natina are te karimoa n te tawaana, ao ngke e a oki ao e a uakaan ma te auti, ao e a ongo te katangitang ma te mwaie.
26 Mangaia are e wetea temanna te toro ao e titirakinna bwa tera ae riki.
27 E taku nakoina, ‘E a roko tarim, ao e tiringa te kao te teei ae kamarikaaki tamam, ibukina bwa e okiria tarim ao e marurung.’*
28 Ma e un ao e rawa n rin. Ai ngaia are e a otinako tamana ni bubutiia.
29 E kaeka ma n taku nakon tamana, ‘Noria! I a tia n toro iroum i nanon ririki aika bati, ao akea te tai teuana ae I riaon iai baike ko tua, ma ko tuai man anganai te kooti ae ataei bwa N na kimwareirei iai ma raoraou.
30 Ma e a tibwa manga roko natim aei ae e a tia ni bakataei* am bwai irouia aine aika kakabooaki, ao ko tiringa te kao te teei ae kamarikaaki ibukina.’
31 E taku ngkanne nakoina, ‘Natiu, ko memena irou n taai nako, ao au bwai ni kabane bon am bwai.
32 Ma ti riai ni bukamaru ao ni kimwareirei, bwa e a tia ni mate tarim aei ma e a manga maiu, e bua ao e a manga reke.’”
Taiani Kabwarabwara Mai Nano
^ Nora Nanon Taeka.
^ Nora Nanon Taeka.
^ Ke, “raoraona aika aine.”
^ Ke, “ni bakatae; n aki tarabwai.”
^ Kuriiti, “ni bwaka i roroana.”
^ Ke, “e maiu.”
^ Kuriiti, “kabwauti.”
