Ruta 2:1-23
2 Ao iai ana koraki Naomi mairouni buuna, ae rangi ni kaubwai. Aran teuaei Boati,+ ao bon temanna i buakoia ana utu Erimereka.
2 E taku Ruta are te I-Moaba nakon Naomi: “Taiaoka ma kanakoai nakon taian tawaana, bwa N na karemrem+ i buakon taian amwi ni baare imwin ane e reke akoau irouna.” Mangaia are e taku Naomi nakoina: “Naako natiu.”
3 Ngaia are e a nako neiei ao e a karemrem n te tawaana imwia taan tai. Ma e aki ataia ae e a roko ni mwakoron abani Boati,+ ae temanna i buakoia ana utu Erimereka.+
4 E a tii roko naba Boati mai Betereem ao e taku nakoia taan tai: “Ke e mena iroumi Iehova.” Ao a kaeka ni kangai: “Ke e kakabwaiako Iehova.”
5 Ao e titirakina te rorobuaka n ataei are mataniwia taan tai Boati ni kangai: “Antai ana ateiaine arei?”
6 E kaeka te rorobuaka n ataei are mataniwia taan tai ni kangai: “Te ateiaine arei bon te I-Moaba+ are e oki rikaaki ma Naomi man tawaana ake i Moaba.+
7 E titiraki neiei ni kangai, ‘Taiaoka, I kona ni karemrem+ ao n rikoriko i buakon nikiran amwi ni baare* ake a tiku imwia taan tai?’ Ao e a bon teitei naba mangke e roko ngke ingabong ni karokoa ae e a tibwa tekateka ngkai ni motirawa teutana n te tabo ni katantan.”
8 E taku ngkanne Boati nakon Ruta: “Kakauongo natiu. Tai nako ni karemrem n te tawaana riki teuana, ao tai nako nakon te tabo riki teuana. Memena i rarikia au ateiaine.+
9 Tarataraa te tawaana are a nako n tai iai ao iriia. I a tia n tua nakoia rorobuaka n ataei bwa a na aki kumeiko.* Ngkana ko taka, ao naako nakoni kaatibu n ran akekei ao moi man are a itia rorobuaka n ataei.”
10 Ao e katorobubua neiei ni bobaraaki i aontano ao e taku nakon teuaei: “I kangaa ni karekea akoau i matam, ao e aera bwa ko mutiakinai, ngkai bon te ianena ngai?”+
11 E kaekaa neiei ni kangai Boati: “I kaongoaki bwaninin rongorongoni bwaai ni kabane ake ko karaoi ibukin tinani buum imwini mateni buum, ao arom ngke ko kitana tamam ma tinam ao abaia am koraki, n nakon te natannaomata ae ko aki ataia mai mwaina.+
12 E bia anganiko Iehova kaniwangam ibukin te baere ko a tia ni karaoia,+ ao e bia reke boom ae kororaoi* mairoun Iehova ae Atuan Iteraera, are ko a tia n nakomai n ukoukora kamanoam i aani baina ni kiba.”+
13 Ao e kaeka neiei ni kangai: “E bia reke akoau i matam au toka, bwa ko a tia ni kabebeteai ma n taetae ni karaua nanon* am toro, e ngae ngke bon tiaki ngai temanna i buakoia am toro.”
14 E taku Boati nakon neiei n tain te amwarake: “Nakomai ikai, amwarake teutana n te kariki, ao kateboa am mwakoro ni kariki n te beneka.”* Mangaia are e a tekateka i rarikia taan tai. Ao e angan neiei tabeua baare aika umunaki, ao e amwarake neiei ao e rauaki, ao iai nikirani kanana.
15 Ngke e a teirake neiei bwa e na karemrem,+ ao e tua Boati nakoia ana rorobuaka n ataei ni kangai: “Kariaia neienne bwa e na karemrem naba i buakon nikiran taian amwi* ni baare, ao tai bwainikirinna.+
16 Kam riai naba n taraia raoi bwa kam na koutii tabeua amwi ni baare man taiani bwabwati ibukina, ao katikui imwimi bwa e na karemrem iai, ao tai taekina te bwai teuana ni katokia.”
17 Mangaia are e teimatoa ni karemrem n te tawaana ni karokoa ae tairiki.+ Ngke e orea are e a tia ni karemmwa, ao e reke mai iai tao teuana te eba* ni baare.
18 Ao e uotia nakon te kaawa, ao tinani buuna e nora are e a tia ni karemmwa. E kaotinakoa naba Ruta te amwarake are e katuka nikirana+ ngke e a nuai, ao e anganna.
19 E taku ngkanne tinani buuna nakoina: “Ko karemrem ia n te bong aei? Ko mwakuri ia? E bia kakabwaiaaki te aomata ane mutiakiniko.”+ Mangaia are e tuanga tinani buuna taekan te aomata are e mwakuri irouna, ni kangai: “Aran te mwaane are I mwakuri irouna n te bong aei boni Boati.”
20 Ao e taku Naomi nakoni buun natina: “E bia kakabwaiaaki iroun Iehova, ae e aki bwaka ana tangira ae koaua* nakoia akana maiu ma akana mate.”+ E reitia ni kangai Naomi: “Ara koraki teuanne.+ Bon temanna i buakoia naake a riai ni manga kabooira.”*+
21 Ao e taku Ruta are te I-Moaba: “E taku naba nakoiu, ‘Memena i rarikia au tia tai ni karokoa tian au mwakuri n tai irouia.’”+
22 Mangaia are e taku Naomi nakon Ruta are buun natina: “E raoiroi riki ibukim natiu bwa ko na airiri ma ana ateiaine, nakon ae ko na bwainikirinaki n te tawaana teuana.”
23 Mangaia are e memena i rarikia ana ateiaine Boati ma ni karemrem ni karokoa tokin taiakin te baare+ ao taiakin te uita. Ao e teimatoa ni maeka ma tinani buuna.+
Taiani Kabwarabwara Mai Nano
^ Ke tao, “bwabwati.”
^ Ke, “tabareiko.”
^ Ke, “te kaniwanga ae tabwanin raoi.”
^ Ebera, “taetae nakon nanon.”
^ Te moi ae kamangingi. Taetae n Ingiriti, “vinegar.”
^ Ke tao, “bwabwati.”
^ Ke, “tangira ae kona n onimakinaki.”
^ Ke, “temanna i buakoia ara koraki ae iai riaina ni manga kabooira (kainaomataira).”
