Taani Motikitaeka 10:1-18
10 Imwin ana tai Abimereka ao e a teirake Tora ae natini Bua are natin Toto bwa e na kamaiuia tibun Iteraera,+ ae temanna mai buakoia tibun Itakara. E maeka i Tiamira n aonon Eberaim ae maungaunga.
2 E momotiki taekaia tibun Iteraera i nanon 23 te ririki. Ao imwina e a mate ao e kaiiaki i Tiamira.
3 Imwin teuaei ao e a teirake Iaira ae te I-Kireata ao e momotiki taekaia tibun Iteraera i nanon 22 te ririki.
4 Iai natina mwaane aika 30 aika totoka i aoia taongki aika 30 ao iai aia kaawa aika 30, ae a aranaki bwa Awotaiaira+ ni karokoa te bong aei, ao a mena n te aba ae Kireata.
5 Imwin anne ao e mate Iaira ao e kaiiaki i Kamon.
6 Ao a a manga karaoa naba ae buakaka tibun Iteraera i matan Iehova,+ ao a a moanna n toro irouia taiani Baara,+ bouannantin nako Nei Atitoreta, atuan Aram,* atuan Titon, atuani Moaba,+ atuaia tibun Ammon,+ ao atuaia I-Biritia.+ A kitana Iehova ao a aki toro irouna.
7 Ao e urarake unin Iehova irouia tibun Iteraera, ao e anga ngaiia* nako nanoni baia I-Biritia ao tibun Ammon.+
8 Mangaia are a oreiia ma ni karawawataia tibun Iteraera n te aro ae korakora n te ririki anne, a karawawataia tibun Iteraera ni kabane i nanon 18 te ririki, ake n iteran te Ioretan are abaia ngkoa taian Amoraite i Kireata.
9 Ao a rinanon naba te Ioretan nakon iterana tibun Ammon bwa a na buakana te baronga are Iuta, Beniamin, ao te baronga are Eberaim, ao a a rangi ni karawawataaki tibun Iteraera.
10 Ao a wetea Iehova tibun Iteraera ibukini buokaia+ ao a kangai: “Ti boni bure nakoim, bwa ti kitana Atuara ao n toro irouia taiani Baara.”+
11 Ma e taku Iehova nakoia tibun Iteraera: “Tiaki I a tia ni kamaiuingkami mai Aikubita,+ ao mairouia taian Amoraite,+ tibun Ammon, I-Biritia,+
12 I-Titon, tibun Amareka, ao tibuni Mirian, ngke a karawawataingkami? Ngke kam takarua n tang nakoiu ao I kamaiuingkami mai nanoni baia.
13 Ma kam kitanai ao kam toro irouia atua riki tabeman.+ Anne bukina ae N nang aki manga kamaiuingkami.+
14 Naako nakoia atua ake kam a tia n rineiia, ao weteiia bwa a na buokingkami.+ Ke a kamaiuingkami, n ami tai n rawawata.”+
15 Ma a taku tibun Iteraera nakon Iehova: “Ti boni bure. Karaoa nakoira ae e raoiroi i matam. Kamaiuira taiaoka n te bong aei.”
16 Ao a kanakoi atua aika ianena mai buakoia ao a toro iroun Iehova,+ n te aro are e a aikoa kona moan rawawataia tibun Iteraera.+
17 Imwina riki ao a weteaki tibun Ammon+ bwa a na ikotaki ao a katea aia kaembwa i Kireata. Mangaia are a a ikotaki tibun Iteraera ao a katea aia kaembwa i Mitiba.
18 A kakarabakau i bon i marenaia kaaini Kireata ao tokana ni kangai: “Antai ae e na kairiri ni buakanaia tibun Ammon?+ Ke e riki bwa te mataniwi i aoia kaaini Kireata ni kabane.”
