Taani Motikitaeka 12:1-15
12 A weteaki ngkanne mwaane aika tibun Eberaim ao a mwananga nako Tabon* ao a taku nakon Iebeta: “Bukin tera ngke ko aki weteira bwa ti na iriko ni mwananga ni buakania tibun Ammon?+ Ti na kabueka am auti ni kabwakaa ao ko mena i nanona.”
2 Ma e taku Iebeta nakoia: “I kairiribai ngai ma au aomata ma tibun Ammon. I weteingkami ibukini buokau, ma kam aki kamaiuai mai nanoni baia.
3 Ngke I noria bwa kam aki roko ni kamaiuai, ao I a iangoia bwa N na karuanikaia maiuu* ao n nako ni buakania tibun Ammon,+ ao e anga ngaiia Iehova nakoiu. Mangaia ae bukin tera ngkai kam roko irou n te bong aei bwa kam na ekainako?”
4 Ao Iebeta e ikotiia mwaaneni Kireata ni kabane+ ao a buakania tibun Eberaim, ao a tokanikai mwaaneni Kireata i aoia tibun Eberaim ake a kangai: “E ngae ngke kam maeka ngkami aika I-Kireata n aia aono tibun Eberaim ma tibuni Manate, ma bon taan tiotionako ngkami mai abaia tibun Eberaim.”
5 A taui kaoran te Ioretan+ tibuni Kireata, imwaia tibun Eberaim, ao ngke a kataia mwaane aika tibun Eberaim ni birinako, ao a taku, “Kariaia bwa ti na nakon te itera are teuana,” ao a titirakina temanna ma temanna mwaane aika tibuni Kireata ni kangai, “Ngkoe tibun Eberaim?” Ngkana e kaeka ni kangai, “Tiaki!”
6 ao a kangai nakoina, “Taiaoka ma taekina Tiuboreta.” Ma e kangai: “Tiboreta,” bwa kioina ngke e aki kona ni kaeta raoi atongana. Ao a taua ma ni kamatea ni kaoran nako te Ioretan. Mangaia are a bwaka tibun Eberaim aika 42,000 n te tai anne.
7 E momotiki taekaia tibun Iteraera Iebeta i nanon onoua te ririki, ao imwin anne e mate Iebeta are te I-Kireata ao e kaiiaki n ana kaawa i Kireata.
8 E momotiki taekaia tibun Iteraera Ibetan are te I-Betereem imwin teuanne.+
9 Iai natina mwaane aika 30 ao natina aine aika 30. E kanakoia natina aine bwa a na mare ma mwaane aika tiaki kaain ana utu, ao e kairiia naati aine aika 30 bwa a na mare ma natina mwaane. E momotiki taekaia tibun Iteraera i nanon itiua te ririki.
10 Ao e mate Ibetan ao e kaiiaki i Betereem.
11 E momotiki taekaia tibun Iteraera Eron are tibun Teburun imwin teuanne, e momotiki taekaia tibun Iteraera i nanon tebwina te ririki.
12 Ao e mate Eron are tibun Teburun ao e kaiiaki i Aiiaron i abaia tibun Teburun.
13 E momotiki taekaia tibun Iteraera Abeton are natin Irera are te I-Biraton imwin teuanne.
14 Iai natina mwaane aika 40 ao tibuna mwaane aika 30 aika totoka i aoia taongki aika 70. E momotiki taekaia tibun Iteraera i nanoni wanua te ririki.
15 Ao e mate Abeton are natin Irera are te I-Biraton, ao e kaiiaki i Biraton i abaia tibun Eberaim n aia maunga tibun Amareka.+
Taiani Kabwarabwara Mai Nano
^ Ke tao, “nakon te itera are mai meang.”
^ Ebera, ne’phesh, nora Nanon Taeka.
