Taani Motikitaeka 18:1-31
18 Ni boong akanne ao bon akea te uea i Iteraera.+ Ao ni boong akanne ao aia baronga tibun Tan+ a ukoukora tibwangaia ae a na maeka iai, ibukina bwa e tuai man reke irouia tibwangaia i buakoia aia baronga tibun Iteraera, ni karokoa te tai anne.+
2 A kanakoia mwaane aika niman tibun Tan mai buakoia aia utu, aika mwaane aika konabwai, mai Toraa ao Etitaora,+ bwa a na karaba n tuoa te aba ao n neweabaia. A taku nakoia: “Naako neweabaa te aba.” Ngke a roko n aonon Eberaim ae maungaunga n ana auti Mika,+ ao a tiku ikekei n te tairiki arei.
3 Ngke a a uakaan ma ana auti Mika, ao a a kinaa bwanaan* te rorobuaka n ataei are tibun Rewi, mangaia are a nakoina ao a titirakinna ni kangai: “Antai ae kairiko n nakomai? Tera ae ko karaoia n te tabo aei? Tera ae e a rekenako iai tikum ikai?”
4 E kaekaia ni kangai: “E karaoa aei ao arei ibukiu Mika ao e kabooai bwa N na beku bwa te ibonga ibukina.”+
5 A taku ngkanne nakoina: “Taiaoka n titirakina te Atua bwa e na nakoraoi mwanangara ke e na aki.”
6 E taku nakoia te ibonga arei: “Naako ma te rau. E mena Iehova iroumi ni mwanangami.”
7 Mangaia are a reitaanako mwanangaia mwaane ake niman ao a a roko i Raiti.+ A nori aroia ni maeka aomata ake iai bwa a onimakinia i bon irouia n aroia I-Titon. A rau ao akea tabeaiangaia,+ ao akea te aomata ae karawawataa te aba ae mena i abaia bwa e na aki karauia. A raroanako ma I-Titon ao akea irekerekeia ma te korakina.
8 Ngke a okiriia tariia i Toraa ao i Etitaora,+ ao a taku tariia akekei nakoia: “E uara?”
9 A kaeka ni kangai: “Ti a nako ni waerake n ekiianako, bwa ti a tia n noria ae e rangi n raoiroi te aba arei. E aera ngkai kam baenikai? Tai tabwara n nako n abana te aba arei.
10 Ngkana kam roko ao ane kam na noriia aomata aika akea tabeaiangaia,+ ao e mwawaawa te aba. E a tia te Atua n anga nako nanoni baimi, ae te tabo ae aki tare n te bwai teuana.”+
11 A a mwananga ngkanne mai Toraa ao Etitaora mwaane aika 600 aika taubobonga nakon te buaka, man aia utu tibun Tan.+
12 A waerake ao a kaembwa i Kiriataearim+ i abaia tibun Iuta. Anne bukina ae e aranaki iai te tabo anne bwa Maanetan*+ ni karokoa te bong aei, are i maeaoni Kiriataearim.
13 A mwananga mai ikanne nakon aonon Eberaim ae maungaunga, ao a a roko n ana auti Mika.+
14 Ao a taku mwaane ake niman ake a nako ni karaba n tuoa te aba ae Raiti+ nakoia tariia: “Kam ataia ae iai te ebota, bouannanti aika terebim,* te bouannanti ae kaaraki, ao te bouannanti ae te biti,*+ i nanon auti aikai? Iangoa te bwai ae kam riai ni karaoia.”
15 Mangaia are a motirawa ikekei ao a kawara ana auti te rorobuaka n ataei are tibun Rewi,+ n ana auti Mika, ao a titirakinna bwa e uara.
16 N te tai anne ao a tei ni mataroan te oo mwaane ake 600 ake tibun Tan+ ake a taubobonga nakon te buaka.
17 Ao a rinnako mwaane ake niman ake a karaba ngkoa n tuoa te aba+ bwa a na anaa te bouannanti ae kaaraki, te ebota,+ bouannanti aika terebim,*+ ao te bouannanti ae te biti.*+ (E tei te ibonga+ ni mataroan te oo ma mwaane ake 600 ake a taubobonga nakon te buaka.)
18 A rinnako n ana auti Mika ao a anaa te bouannanti ae kaaraki, te ebota, bouannanti aika terebim,* ao te bouannanti ae te biti.* Ao e taku te ibonga nakoia: “Tera ae kam karaoia?”
19 Ma a taku nakoina: “Tai karongoa. Kaaki baim i aoni wim, ao airi ma ngaira bwa ko na riki bwa tamara* ao ara ibonga. E nga ae raoiroi riki iroum, te riki n ibonga n ana auti te mwaane ae tii temanna,+ ke te riki n ibonga ibukin te baronga ao te utu i Iteraera?”+
20 Mangaia are e a rau nanon te ibonga, ao e anaa te ebota, bouannanti ake terebim,* ao te bouannanti ae kaaraki,+ ao e a nako ma aomata akekei.
21 Ao a rairaki n touaanako kawaia, ao a karimoaia ataei, te nanai ni man, ao baika kakawaki.
22 Ngke a a tibwa raroa teutana man ana auti Mika, ao a a bane naba n ikotaki mwaane ake a maeka n auti ake a uakaan ma ana auti Mika, ao a ooiia tibun Tan.
23 Ngke a takarua nakoia tibun Tan, ao a rairaki tibun Tan ni kaaitaraia ao a taku nakoni Mika: “Tera ae riki? E aera ngkai kam a bane n ikotaki?”
24 Mangaia are e taku teuaei: “Kam anai atuau aika I karaoi, ao kam nako naba ma te ibonga. Ao ai tera ae tiku irou? Kam kangaa ngkanne n titirakinai ni kangai, ‘Tera ae riki iroum?’”
25 A kaeka ni kangai tibun Tan: “Tai kamatoaa bwanaam nakoira, bwa a kaawa n ekingkami nako mwaane aika un, ao e na bua iai maium* ma maiuia* kaaini batam.”
26 Mangaia are a reitaanako kawaia tibun Tan, ao ngke e noria Mika bwa a korakora riki nakoina, ao e a rairaki naba n okira ana auti.
27 Ngke a a tia n anai baike e karaoi Mika, n ikotaki ma ana ibonga, ao a nako Raiti+ nakon te natannaomata ae rau ma n akea tabeaiangana.+ A oreiia n te kabaang, ao a kabueka te kaawa n te ai.
28 Bon akea temanna ae e na kamaiua, bwa e raroa ma Titon, ao akea irekerekeia ma te korakina, ao e mena Raiti n te tabo ae aoraoi* are i Betareoba.+ Imwina ao a a manga katea te kaawa anne ao a maeka iai.
29 Irarikin anne, a arana te kaawa anne bwa Tan+ bwa ingoan tamaia are Tan, are e bungiaki bwa natin Iteraera.+ Ma aran te kaawa anne mai mwaina bon Raiti.+
30 Imwin anne ao a katea aia bouannanti ae kaaraki tibun Tan,+ ao e riki Ionatan+ are natini Keritiom+ are natini Mote, ma natina mwaane bwa ibonga n aia baronga tibun Tan, ni karokoa te bong are a kairakinako iai kaain te aba anne bwa taenikai.
31 Ao a katea te bouannanti ae kaaraki are e karaoia Mika, ao e tiku ikanne ni boong ni kabane ake e mena iai ana auti te Atua ae koaua i Tiro.+
Taiani Kabwarabwara Mai Nano
^ Ke, “ana ee.”
^ Ae nanona, “Ana kaembwa Tan.”
^ Ke, “atuaia kaain te utu; bouannanti.”
^ Ke, “te bouannanti ae kaburoaki n atoaki.”
^ Ke, “te bouannanti ae kaburoaki n atoaki.”
^ Ke, “atuaia kaain te utu; bouannanti.”
^ Ke, “atuaia kaain te utu; bouannanti.”
^ Ke, “te bouannanti ae kaburoaki n atoaki.”
^ Ke, “te tia anga te taeka n reirei nakoira.”
^ Ke, “atuaia kaain te utu; bouannanti.”
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ke, “te tabo ae aoraoi ae mena n te mwarua.”
