Taani Motikitaeka 19:1-30
-
Aia wene ni bure tibuni Beniamin i Kibea (1-30)
19 Ni boong akanne ngke akea te uea i Iteraera,+ ao iai tibun Rewi temanna ae maeka n te tabo ae raroanako n aonon Eberaim ae maungaunga,+ ao e anaa te aine temanna teuaei mai Betereem+ are i abaia tibun Iuta, bwa buuna ni kewe.*
2 Ma e aki kakaonimaki buuna ni kewe aei nakoina, ao e a kitana teuaei nakon ana auti tamana i Betereem are i abaia tibun Iuta. E tiku ikekei neiei i nanon aua namwakaina.
3 E a mwananga ngkanne buun neiei n rimwina bwa e na anaa nanona bwa e na oki. E airi teuaei ma ana toro te mwaane ao taongki aika uoman. Ao neiei e kaira teuaei ni karinna n ana auti tamana. Ngke e noria taman neiei, ao e kukurei ni kaitiboo ma teuaei.
4 Ao tamani buuna, are taman te ateiaine arei, e ananaa nanon teuaei bwa e na tiku i rarikina i nanon tenibong, ao a amwamwarake ao a momoi, ao e titiku ikekei n te tairiki.
5 N te kaaua ni bong, ngke a utimwaaka n te moaningabong bwa a nangi nako, ao e taku taman te ateiaine arei nakoni buun natina aei: “Amwarake ni karekea korakoram,* ao imwina kam a nako.”
6 Mangaia are a tekateka, ao a uaia n amwarake ma ni moi. Imwin anne ao e taku taman te ateiaine arei nakon teuaei: “Taiaoka ma tiiku ni kangainaa ao kakukureiko.”*
7 Ngke e a teirake teuaei bwa e nangi nako, ao e teimatoa tamani buuna ni bubutiia, mangaia are e a manga tiku riki ni kangainaa.
8 Ngke e utimwaaka teuaei n te moaningabong n te kanimaua ni bong bwa e nangi nako, ao e taku taman te ateiaine arei: “Taiaoka ma amwarake ni karekea korakoram.”* Ao a tiku ni maan ni karokoa ae e a bwakantaai, ao a bon teimatoa naba n uaia n amwarake.
9 Ngke e a teirake teuaei bwa e nangi nako ma buuna ni kewe ao ana toro, ao e taku nakoina tamani buuna are taman te ateiaine arei: “Noria! E a kaani bong. Taiaoka ma tiiku ni kangainaa. E nang roko n tokina te ngaina. Tiiku ikai ni kangainaa, ao kakukureiko. Kam a kautimwaakaingkami ningabong ibukini mwanangami ao n okira mwengam.”*
10 Ma e a aki kan tiku riki teuaei n te tairiki anne, ngaia are e a teirake ao ni mwananga ni karokoa Iebuti, ae taekan Ierutarem.+ A airi ma ngaia taongki aika uoman aika iai kaintoka i aoia, buuna ni kewe, ao ana toro.
11 Ngke a a uakaan ma Iebuti ao e a kan roko n tokina ootan te ngaina. Mangaia are e taku te toro nakon ana toka: “Ti riai ni motirawa n aia kaawa I-Iebuti ao n tiku ni kangainaa ikai?”
12 Ma e taku ana toka nakoina: “Ti aki riai ni motirawa n aia kaawa ianena aika tiaki tibun Iteraera. Ti na reitaanako kawaira ni karokoa Kibea.”+
13 E taku ngkanne nakon ana toro: “Nakomai ao ti na kataia ni karokoira n teuana mai buakon taabo akekei. Ti na tiku ni kangainaa tao i Kibea ke i Rama.”+
14 Mangaia are a reitaanako kawaia, ao e a moanna ni bung taai ngke a a uakaan ma Kibea are aia kaawa tibuni Beniamin.
15 Mangaia are a a motirawa ikekei ao a rin bwa a na tiku ni kangainaa i Kibea. Ngke a a roko i nanona, ao a a tekateka ni maraen te kaawa, ma akea temanna ae kairiia ni karinia n ana auti bwa a na tiku iai ni kangainaa.+
16 N tokina ao e a rin te unimwaane temanna ae e a oki man ana mwakuri n te tawaana ngke e a tairiki. Boni kaain aonon Eberaim ae maungaunga+ teuaei, ma e a tia ni maeka i Kibea i nanon tabeua te tai. Ma kaain te kaawa aei bon tibuni Beniamin.+
17 Ngke e euta matana ma n nora te tia mwamwananga arei ni maraen te kaawa, ao e a taku naba te unimwaane arei: “Ko na nakea, ao ko mwananga mai ia?”
18 E kaeka ni kangai: “Ti mwananga mai Betereem are i abaia tibun Iuta bwa ti na nakon te tabo ae raroanako n aonon Eberaim ae maungaunga, are te tabo ae I nako mai iai. I nako Betereem are i abaia tibun Iuta,+ ao N nang okira ana auti Iehova,* ma akea ae e kairai ni karinai n ana auti.
19 Iai iroura te uteute ae mwau ae tau, ao kanaia maan ibukia ara taongki,+ ao te kariki+ ma te wain ibukiu ma te aine aei, ao ara toro. Akea te bwai ae ti tare iai.”
20 Ma e taku te unimwaane arei: “Te raoi nakoimi! Kariaia bwa N na tabeakini baika kam kainnanoi. Ma tai tiku ni maraen te kaawa ni kangainaa.”
21 Mangaia are e kaira teuarei ni karinna n ana auti ao e kaamwarakeia* taongki. Ao nakekei a teboki waeia ao a amwarake ma ni moi.
22 Ngke a tabe ni kukurei naakai, ao a otabwaninia te auti mwaanen te kaawa tabeman aika akea uaaia, ao a ororea te mataroa. Ao a teimatoa ni kangai nakon te unimwaane are ana auti arei: “Kaotinakoa te mwaane ane rin n am auti, bwa ti aonga ni wene ni bure ma ngaia.”+
23 Ao e otinako teuare ana auti arei ao e taku nakoia: “Tiaki ngaia anne tariu, tai karaoa ae buakaka. Taiaoka bwa te iruwa teuaei n au auti. Tai karaoa te mwakuri ae moan te kabwainrang aei.
24 Ao aei natiu te aine ae tuai ni boo ma te mwaane ao aei naba buun teuaei ni kewe. Kariaia bwa N na kaotinakoia, ao kam kona ni kabwainrangia ngkana kam na karaoa anne.*+ Ma kam na aki karaoa te mwakuri ae moan te kabwainrang aei nakon teuaei.”
25 Ma a aki kan ongo irouna mwaane akekei, mangaia are e katika buuna ni kewe+ teuarei ao e kaotinakoa nakoia nakekei. Ao a taua neiei ao a bwainikirinna man te tairiki ni karokoa ae ingabong. Imwina ao a a kanakoa neiei ngke e a tabwena mainiku.
26 Ngke e a karangaina ao e a roko neiei ao e bwaka ni mataroan ana auti teuare e mena irouna ana toka, ao e wene ikekei ni karokoa ae e a oota.
27 Ngke e teirake ana toka n te ingabong ao e kauki mataroan te auti bwa e na otinako n reitaanako mwanangana, ao e nora neierei, are buuna ni kewe, bwa e wene ni mataroan te auti ma baina aika mena i aon te kawai n rin.
28 Mangaia are e taku nakon neiei: “Teirake bwa ti a nako.” Ma akea te kaeka. E a katokaa ngkanne neiei i aon te taongki, ao e a kaea mwengana.
29 Ngke e roko teuaei n ana auti ao e anaa te biti* ao e taua buuna ni kewe ao e korokorea bwain rabwatana teuana ma teuana nakoni mwakorokoro aika 12, ao e kanakoa kaka teuana te mwakoro nakon aonon nako Iteraera.
30 Ao a taku aomata nako ake a noria: “E tuai man riki ke n noraki te aekaki aei man te bong are a otinako iai tibun Iteraera man te aba are Aikubita ni karokoa te bong aei. Kam na iangoia,* maroroakinna,+ ao tuangira bwa tera ae ti na karaoia.”
Taiani Kabwarabwara Mai Nano
^ Nora Nanon Taeka, “Buu ni kewe.”
^ Ke, “karina angim.”
^ Ke, “kakimwareireia nanom.”
^ Ke, “kanuaa nanom.”
^ Ebera, “am umwanrianna.”
^ Ke tao, “ao I beku n ana auti Iehova.”
^ Ke, “e anga kanaia maan ae renganaki.”
^ Ke, “bwainikirinia ao ni karaoa ae raoiroi i matami.”
^ Te aeka ni biti ae kabonganaaki ibukin tiringaia maan.
^ Ke, “Kaaki nanomi i aona.”
