Taani Motikitaeka 20:1-48
-
Buakanakia tibuni Beniamin (1-48)
20 Mangaia are a a bane tibun Iteraera n otinako mai abaia tibun Tan+ ni karokoa Beerateba, ao man te aba ae Kireata,+ ao e a ikotaki te botaki n aomata ni katiteuanaaki,* i matan Iehova i Mitiba.+
2 Mangaia are a tei n aia tabo aia mataniwi aomata ma aia baronga nako tibun Iteraera, i buakon ana botaki n aomata te Atua, aika tautia aika taan rianna aika 400,000 aika uakabaang.+
3 Ao a ongo tibuni Beniamin ae a a tia ni waerake mwaane aika tibun Iteraera nako Mitiba.
A taku ngkanne mwaane ake tibun Iteraera: “Tuangira bwa e kangaa n riki te bwai ae rangi ni buakaka aei?”+
4 Ao e kaeka ni kangai teuare tibun Rewi+ are buun neiere tiringaki: “I nako Kibea+ are aia kaawa tibuni Beniamin ma buu ni kewe* bwa ti na tiku iai ni kangainaa.
5 Ao a teirake n ekainako kaaini* Kibea ao a otabwaninia te auti ngke e a bong. Boni ngai ae a na tiringai, ma n oneani mwin anne, a taua buu ni kewe ao e a mate.+
6 Ngaia are I anaa rabwatani buu ni kewe ao I korokoreia, ao ni kanakoi mwakorokorona nakon aonon nako Iteraera,+ ibukina bwa a a tia ni karaoa te mwakuri ae kanuka ao ae moan te kabwainrang i Iteraera.
7 Ao ngkami ni kabane aika tibun Iteraera, aanga ami taeka n reirei ao ami reirei ni kairiri+ ikai.”
8 Ao a bane ni katiteuanaaki* n teirake aomata akekei ao a taku: “Akea temanna i buakora ae e na nakon ana umwanrianna ke n okira ana auti.
9 Aio te bwai ae ti na karaoia nakoni Kibea: Ti na waerake n ekianako rinanon te kanikina* mairoun te Atua.+
10 Ti na anaiia mwaane aika 10 mai buakoia 100 man aia baronga nako tibun Iteraera, ao 100 mai buakoia 1,000, ao 1,000 mai buakoia 10,000, bwa a na rikoi taian tianaki ibukia kaain te taanga ni buaka, bwa a aonga n ekaanako Kibea are aia kaawa tibuni Beniamin, ibukin te mwakuri ae moan te kabwainrang are a a tia ni karaoia i abaia tibun Iteraera.”
11 Mangaia are a bane ni katiteuanaaki* mwaane aika tibun Iteraera n ikotaki n ekaanako te kaawa arei, bwa te koraki ae tii te korakina.
12 Ao aia baronga tibun Iteraera a kanakoia mwaane nakoia kaain aia baronga ni kabane tibuni Beniamin ao a kangai: “Tera te bwai ae rangi ni buakaka ae riki i buakomi aei?
13 Kanakoia ngkai mwaane mai Kibea+ ake akea uaaia, bwa ti aonga ni kamateia ao ni kanakoa te bwai ae buakaka mai buakoia tibun Iteraera.”+ Ma a rawa n ongo tibuni Beniamin irouia tariia ake tibun Iteraera.
14 A a ikotaki ngkanne nako Kibea tibuni Beniamin man taiani kaawa, bwa a na otinako ni buakania mwaane ake tibun Iteraera.
15 N te bong anne ao tibuni Beniamin a ikotiia mwaane aika 26,000 aika uakabaang man aia kaawa nako, i rarikia mwaaneni Kibea ake a rineaki ake 700.
16 Iai kaain te taanga ni buaka anne mwaane aika 700 aika rineaki aika a maing. A bane mwaane aikai n rangi ni baiteke ngkana a bana n taian atibu, ao e aki kona n aki teke konaia.*
17 Ao mwaane ake tibun Iteraera ake tiaki tibuni Beniamin, a ikotiia 400,000 mwaane aika uakabaang,+ ao a mwaatai n te buaka ngaiia n tatabemania nako.
18 A teirake naakai ao a waerake nako Betaera bwa a na titirakina te Atua.+ A taku ngkanne tibun Iteraera: “Antai i buakora ae e riai ni waerake moa ni buakania tibuni Beniamin?” E kaeka ni kangai Iehova: “A na rimoa tibun Iuta.”
19 Imwin anne ao a teirake tibun Iteraera ngke e a ingabong, ao a kaembwa ni kaitaraa Kibea.
20 A a otinako ngkai mwaane ake tibun Iteraera bwa a na buakania tibuni Beniamin. A baireiia raoi ni baireaia taani buaka ao a ekiianako i Kibea.
21 Mangaia are a otinako tibuni Beniamin mai Kibea ao a kamateia mwaane aika tibun Iteraera aika 22,000, n te bong anne.
22 Ma e ngae n anne, a kaotiia kaain aia taanga ni buaka tibun Iteraera bwa a ninikoria, ao a a manga baireiia naba n aroia ae a tauraoi iai nakon te buaka n aia tabo naba are a mena iai n te moani bong.
23 A waerake ngkanne tibun Iteraera ao a tang i matan Iehova ni karokoa ae bong, ao a titirakina Iehova ni kangai: “E riai bwa ti na manga nako ni buakania tarira ake tibuni Beniamin?”+ E kaeka ni kangai Iehova: “Waerake buakania.”
24 Mangaia are a mwananga tibun Iteraera ni kaania tibuni Beniamin n te kauoua ni bong.
25 Ao a otinako tibuni Beniamin mai Kibea bwa a na aitara ma ngaiia n te kauoua ni bong, ao a a manga kamateia riki tibun Iteraera aika 18,000,+ aika a bane n uakabaang.
26 Ibukin anne ao a a bane mwaane aika tibun Iteraera ni waerake nako Betaera. A tang ao a tekateka ikekei i matan Iehova,+ ao a aki mamatam+ n te bong anne ni karokoa ae bong, ao a anga taiani karea ni kabuekaki+ ma karea n raoi*+ i matan Iehova.
27 Imwin anne ao a titirakina Iehova mwaane ake tibun Iteraera,+ bwa ni boong akanne e mena ikanne ana ati ni berita te Atua ae koaua.
28 Ao e bebeku* i matan te ati ni boong akanne Bineati+ are natin Ereata are natin Aaron. A titiraki ni kangai: “Ti riai ni manga otinako ni buakania tarira ake mwaane ake tibuni Beniamin ke ti a riai ni motirawa?”+ E kaeka ni kangai Iehova: “Kam na waerake, ibukina bwa N na anga ngaiia nako nanoni baimi ningabong.”
29 Ao tibun Iteraera a katikuia mwaane bwa a na karan+ ni katobibia Kibea ni kabutaa.
30 A waerake tibun Iteraera n ekiianako tibuni Beniamin n te katenua ni bong, ao a a baireiia raoi n ekaanako Kibea n aron taai ake tabeua.+
31 Ngke a otinako tibuni Beniamin bwa a na aitara ma te taanga ni buaka, ao a a kairakinako man te kaawa.+ Ao n aron taai ake tabeua a a moana buakanaia ao tiringaia mwaane tabeman ni kawai aika totouaki, teaina mai buakoia e waerake nako Betaera ao are teaina nako Kibea, ao a katikuia mwaane aika tibun Iteraera aika tao 30 ake a a mate n te tawaana.+
32 Mangaia are a taku tibuni Beniamin: “A a manga konaaki naba i matara n aron are mai mwaina.”+ Ma a taku tibun Iteraera: “Ti na mumun rikaaki ao ni kairiianako man te kaawa nakoni kawai aika totouaki.”
33 Mangaia are a bane n teirake mwaane ake tibun Iteraera man aia tabo ao a baireiia raoi i Baaratama, ao a biri n otinako taani karan ake tibun Iteraera man aia tabo i rarikini Kibea.
34 Mangaia are a a roko i moani Kibea mwaane ake 10,000 ake a rineaki mai buakoia tibun Iteraera ni kabane, ao e korakora te boo ni buaka aei. Ma a aki ataia tibuni Beniamin ae e a kaan roko te kabuanibwai.
35 E kataenikaiia tibuni Beniamin Iehova+ i mataia tibun Iteraera, ao n te bong anne ao tibun Iteraera a kamateia 25,100 mwaane i abaia tibuni Beniamin, aika a bane n uakabaang.+
36 Ma a iangoia tibuni Beniamin bwa a nang konaaki mwaane ake tibun Iteraera ngke a mumun rikaaki mairouia tibuni Beniamin,+ ma a mumun rikaaki ibukina bwa a onimakinia taani karan ake a katukaki bwa a na ekaanako Kibea.+
37 A waekoa ni waaki taani karan ao a biri ni kaineta Kibea. Ao a a uamaenako taani karan ao a orea te kaawa ni kabane n te kabaang.
38 Ao a a tia ni baireia mwaane ake tibun Iteraera bwa a na kawaerakea te bubu mai ikekei mwaane ake a karana te kaawa, bwa te kanikina.
39 Ngke a a mumun rikaaki tibun Iteraera n te boo ni buaka, ao mwaane ake tibuni Beniamin a a moana buakanaia ao tiringaia mwaane aika tibun Iteraera aika tao 30,+ ao a taku: “E otara bwa a a manga konaaki naba i matara n aron are n te moani buaka.”+
40 Ma e a moanna ni waerake te kanikina man te kaawa n aron te boua ae te bubu. Ngke a rairaki mwaane ake tibuni Beniamin n taraia, ao a a nora te kaawa ni kabane bwa e a urarake nako karawa.
41 Ao a rairaki mwaane ake tibun Iteraera ao a a bwara nanoia mwaane ake tibuni Beniamin, bwa a a noria ae a a taonakinako n te kabuanibwai.
42 Mangaia are a mumun rikaaki mairouia mwaane ake tibun Iteraera ni kaineta te rereua, ma a ririmwiaki n te boo ni buaka, ao a ira buakoni kamateaia naakai mwaane ake a otinako man taiani kaawa.
43 A otabwaninia tibuni Beniamin ao a kaeiia n akea motirawaia. A toutouia i moan raoi Kibea i mainiku.
44 N tokina ao a a bwaka mwaane aika tibuni Beniamin aika 18,000, aika taani buaka ni kabane aika korakora.+
45 A mumun rikaaki tibuni Beniamin ao a birinako nakon te rereua nakon te bwaa ae Rimmon,+ ao tibun Iteraera a tiringia* 5,000 mai buakoia ni kawai aika totouaki, ao a teimatoa ni kaeiia ni karokoa Kitom. Mangaia are a kamateia riki mwaane aika 2,000.
46 Botani mwaitiia tibuni Beniamin ni kabane ake a bwaka n te bong anne bon 25,000 mwaane aika uakabaang,+ aika taani buaka ni kabane aika korakora.
47 Ma a mumun rikaaki ake 600 nakon te rereua nakon te bwaa ae Rimmon, ao a tiku n te bwaa ae Rimmon i nanon aua namwakaina.
48 Ao a rairaki mwaane ake tibun Iteraera n ekiianako tibuni Beniamin, ao a kamateia te koraki ake kaain te kaawa n te kabaang, mairouia mwaane ni karokoa te nanai ni man, ake nikira ni kabane ake a tiku. A kaurarakei naba kaawa ni kabane ake imwaini kawaia.
Taiani Kabwarabwara Mai Nano
^ Ebera, “bwa kaanga te aomata ae tii temanna.”
^ Nora Nanon Taeka.
^ Ke tao, “taani bwaibwai n te aba ae.”
^ Ebera, “bwa kaanga te aomata ae tii temanna.”
^ A kabongana te aro teuana are e kona iai te Atua ni kaotia bwa tera nanona ni kaineti ma te bwai anne.
^ Ebera, “bwa kaanga te aomata ae tii temanna.”
^ Ebera, “a kona ni banaa te irannatu teaina n te atibu ao e na teke.”
^ Ke, “te karea n iraorao.” Te karea ae kaikonaka ae a kaai n amwarake ibonga, taan taromauri, ao Iehova, ni kaota te raoi i marenaia.
^ Ebera, “tetei.”
^ Ebera, “a karemremwia.”