Taani Motikitaeka 21:1-25
-
E aki mauna te baronga ae Beniamin (1-25)
21 Ao a berita n te taetae n tuea i Mitiba+ mwaane ake tibun Iteraera ni kangai: “Akea temanna i buakora ae e na anga natina te aine bwa buun te mwaane ae tibuni Beniamin.”+
2 Mangaia are a roko aomata i Betaera+ ao a tekateka ikekei i matan te Atua ae koaua ni karokoa ae tairiki, ao a takarua ma ni korakai n tanginiwenei.
3 Ao a taku: “Ngkoe ae Iehova ae Atuan Iteraera, e aera ngkai e riki aei i Iteraera? E aera ngkai e riai ni bua te baronga teuana mai buakoia tibun Iteraera?”
4 Ao a utimwaaka aomata aikai n te bong are imwina, ao a katea te baonikarea ikekei bwa a na anga iai taiani karea ni kabuekaki ma karea n raoi.+
5 A taku ngkanne tibun Iteraera: “Antai i buakoia aia baronga nako tibun Iteraera ae e aki roko ni botaki i matan Iehova?” bwa a a tia ni karaoa te taetae n tuea ae matoatoa bwa ane e aki waerake nakon Iehova i Mitiba, ao e na boni kamateaki.
6 Mangaia are a a rangi n rawawata tibun Iteraera ibukin te baere riki nakoia tariia ake tibuni Beniamin. Ao a taku: “E a tia ni koreakinako n te bong aei, te baronga teuana mai buakoia tibun Iteraera.
7 Tera ae ti riai ni karaoia ni karekeia iai buuia te koraki ake a a tiku, ngkai ti a tia n taetae n tuea iroun Iehova+ bwa ti na aki angania temanna natira te aine bwa buuia?”+
8 A titiraki ni kangai: “Antai i buakoia aia baronga tibun Iteraera ae e aki waerake nakon Iehova i Mitiba?”+ Ngaia bon akea temanna ae roko mai Iabetikireata nakon te kaembwa are e mena iai te botaki n aomata.
9 Ngke a warekaki aomata, ao a noria bwa bon akea kaain Iabetikireata ae a mena ikekei.
10 Ao te botaki n aomata e a kanakoia nako ikekei mwaane aika taiani kabanea ni korakora aika 12,000. A tua ni kangai nakoia: “Naako ao kamateia kaain Iabetikireata n te kabaang, aine naba ao ataei.+
11 Aio te bwai ae kam riai ni karaoia: Kam riai ni kaokoroia mwaane nako ao aine nako ake a a tia ni wene n taanga ma mwaane bwa a na kamaunaaki.”
12 A kuneia i buakoia kaain Iabetikireata aine aika 400 aika taian ataeinnaine, aika tuai mani wene n taanga ma te mwaane. Mangaia are a kairiia nakon te kaembwa i Tiro+ n te aba ae Kanaan.
13 A kanakoa ngkanne te rongorongo te botaki n aomata nakoia tibuni Beniamin ake i aon te bwaa ae Rimmon,+ ao a tuangia te raoi.
14 Mangaia are a a oki tibuni Beniamin n te tai anne. Ao a angania naakai ateiaine ake a kamaiuia mai buakoia ateiainen Iabetikireata,+ ma a aki tau mwaitiia ibukia naakai.
15 Ao a a rangi n rawawata tibun Iteraera ibukin te baere riki nakoia tibuni Beniamin,+ ibukina bwa e a tia Iehova ni karika te iraraure i buakoia aia baronga tibun Iteraera.
16 A taku aia unimwaane te botaki n aomata: “Tera ae ti riai ni karaoia ni karekeia iai buuia mwaane ake nikiraia, ngkai a a bane n tia ni kamaunaaki aine ake tibuni Beniamin?”
17 A kaeka ni kangai: “E riai n iai te tibwanga ibukia tibuni Beniamin ake a maiu, bwa e aonga n aki mauna te baronga teuana mai buakoia tibun Iteraera.
18 Ma ti aki kariaiakaki n angania buuia mai buakoia natira aine, ibukina bwa a a tia n taetae n tuea tibun Iteraera ni kangai: ‘E na reke kain ane e karekea te aine bwa buun tibuni Beniamin.’”+
19 A taku ngkanne: “Noria! Iai ana toa Iehova n te ririki teuana ma teuana i Tiro,+ are i meangini Betaera ao i mainikun te kawai ae totouaki are waerake mai Betaera nako Tekem, ao i maiakin Rebona.”
20 Mangaia are a tua ni kangai nakoia tibuni Beniamin: “Naako ao kakaran n taiani nne ni kureebe.
21 Ao ngkana kam noriia ateiainen* Tiro n otinako ao n ira buakon aia mwamwaie ni kakatobibi, ao kam riai n otinako man taiani nne ni kureebe ngkami n tatabemaningkami nako, ao n raweiia buumi mai buakoia ateiainen Tiro, ao kam riai n oki nako abaia tibuni Beniamin.
22 Ao ngkana a roko tamaia ke mwaaneia ni ngurengure n ekiranako, ao ti na kangai nakoia: ‘Kaota akoara ibukia, bwa ti a aki kona ni karekeia buuia n tatabemania nako n te buaka,+ ao kam aki kona n angania buuia ma n aki bure iai.’”+
23 Mangaia are a karaoa anne mwaane aika tibuni Beniamin, ao a uotiianako buuia n tatabemania nako mai buakoia aine ake a mwamwaie. Imwin anne ao a okira abaia ao a a manga katea aia kaawa+ ma ni maeka iai.
24 Ao a a maenako tibun Iteraera mai ikanne n te tai anne, temanna ma temanna nakon ana baronga ao ana utu, ao a a nako mai ikanne temanna ma temanna nakon abana.
25 Ni boong akanne, ao bon akea te uea i Iteraera.+ A bane aomata n tatabemania nako ni karaoa ae e bon riai i mataia.*
