Taani Motikitaeka 6:1-40
6 Ma a a manga karaoa naba ae buakaka tibun Iteraera i matan Iehova,+ mangaia are e a anga ngaiia Iehova nako nanoni baia tibuni Mirian i nanon itiua te ririki.+
2 Ao tibuni Mirian a a karawawataia tibun Iteraera.+ Ao ibukia tibuni Mirian, a a karaoi aia tabo ni karaba* tibun Iteraera n taiani maunga, n taian nangananga, ao n taabo aika e kangaanga te roko iai.+
3 Ngkana a uniki koraa tibun Iteraera, ao a a roko naba tibuni Mirian ma tibun Amareka,+ ao kaaini Mainiku+ n ekiianako.
4 A a bon roko naba ni katei aia umwanrianna n ekiianako ao n urui uaan te aba ni karokoa Kaata, ao akea kanaia tibun Iteraera ae a katikua, ao akea naba te tiibu ke te kao mwaane ke te taongki.+
5 Bwa a waerake ma aia nanai ao aia umwanrianna aika rangi ni bati n ai aroia rokati,+ ao a aki kona ni warekaki mwaitiia ma aia kamero,+ ao a roko n te aba ma n urua.
6 Mangaia are a a rangi ni maiu ni kainnano tibun Iteraera irouia tibuni Mirian, ao a wetea Iehova tibun Iteraera ibukini buokaia.+
7 Ngke a wetea Iehova tibun Iteraera ibukini buokaia mairouia tibuni Mirian,+
8 ao e kanakoa temanna te burabeti Iehova nakoia tibun Iteraera ae e kangai nakoia: “E kangai ana taeka Iehova ae Atuan Iteraera, ‘I kairingkami ni waerake mai Aikubita ao I kairingkami naba ni kaotinakoingkami man te auti n toronaki.+
9 Mangaia are I kamaiuingkami mai nanoni bain Aikubita ao mairouia taani karawawataingkami ni kabane, ma ni kakioianako mai mwaimi ao n anganingkami abaia.+
10 Ao I taku nakoimi: “Bon Iehova ngai ae Atuami.+ Kam na tai maakuia atuaia taian Amoraite akana kam maeka i abaia.”+ Ma kam aki ongeaba irou.’”*+
11 Imwina riki ao e a roko ana anera Iehova+ ma n tekateka i aan te aroka ae bubura are i Obera, are arokan Ioaati are tibun Abietera.+ E tabe natina are Kiteon+ ni kamanti uita n te nne ni kamanti kureebe, bwa e aonga ni karabai mairouia tibuni Mirian.
12 E kaoti ana anera Iehova nakoina ao e kangai: “E mena Iehova iroum,+ ngkoe ae te tia buaka ae korakora.”
13 Ngaia are e taku Kiteon nakoina: “Taiaoka au toka, ma ngkana ngaia bwa e mena Iehova iroura, ao bukin tera ngkai a roko i aora baikai ni kabane?+ A nga ana mwakuri ni kabane aika kamimi, ake a tataekin tamara nakoira+ ni kangai, ‘Tiaki e kairira ni kaotinakoira Iehova mai Aikubita?’+ E a kitanira ngkai Iehova+ ma n anga ngaira nako nanoni baia tibuni Mirian.”
14 Ao Iehova e kaitaraa teuaei ao e taku: “Naako ma te korakora ane iroum, ao ko na kamaiuia tibun Iteraera mai nanoni baia tibuni Mirian.+ Tiaki boni ngai ae I kanakoko?”
15 E kaekaa ni kangai Kiteon: “Taiaoka Iehova. N na kangaa ni kamaiuia tibun Iteraera? Noria! Bon te kabanea n uarereke au utu* i buakoia tibuni Manate, ao te kabanea ni mangori ngai ni batan tamau.”
16 Ma e taku Iehova nakoina: “Ko na boni kamateia tibuni Mirian n ai aron ae kaanga te aomata ae tii temanna ngaiia, kioina ngkai N na memena iroum.”+
17 Ao e taku nakoina: “Ngkana e reke akoau i matam ngkai, ao kaota nakoiu te kanikina bwa boni ngkoe ae ko taetae ma ngai.
18 Taiaoka ma tai kitana ikai ni karokoa okiu ma au bwaintituaraoi ao N na kaaki i matam.”+ Mangaia are e taku: “N na tiku ikai ni karokoa okim.”
19 Ao e rinnako Kiteon ao e katauraoa te kooti ae ataei ao e karaoa te bwerena ae aki karikaki man te burawa ae teuana te eba.*+ E kaaki te irikomaiu n te bwaene ao ranna n te bwaata ni kuuka, ao e uotii n otinako nakon teuarei ma ni kaaki i aan te aroka are bubura.
20 Ao e taku ana anera te Atua ae koaua nakoina: “Anaa te irikomaiu ma te bwerena ae aki karikaki ao kaaki i aon te atibu ane bubura anne, ao kabwaroa ranna.” Ao e karaoa anne.
21 Ao ana anera Iehova e kaenakoa tabon te oko are i nanoni baina, ao e kotea iai te irikomaiu ma te bwerena are aki karikaki, ao e ura te ai man te atibu ao e kabueka te irikomaiu ma te bwerena are aki karikaki.+ Ao e a buanako ana anera Iehova mai matan teuaei.
22 E a ataia ngkai Kiteon ae bon ana anera Iehova.+
E aki tabwara Kiteon ma e a taku naba: “Akea ngai te Uea ae Moan te Rietata ae Iehova, bwa I a tia n nora ana anera Iehova n itaramata ma ngaia!”+
23 Ma e taku Iehova nakon teuaei: “Ke e mena iroum te raoi. Tai maaku,+ ko na bon aki mate.”
24 Mangaia are e katea te baonikarea ikekei Kiteon nakon Iehova, ao e aranaki bwa Iehovatiarom*+ ni karokoa te bong aei. E teimatoa ni mena i Obera are aia tabo tibun Abietera.
25 E taku Iehova nakoina n te tairiki anne: “Kaira te kao mwaane ae ataei ae ana man tamam, te kao mwaane ae te kauoman ae ataei ae itiua ana ririki, ao urua baonikareani Baara are ana bwai tamam, ao korea te kai ae tabu* are i rarikina ni kabwakaa.+
26 Ngkana ko tia ni katea te baonikarea nakon Iehova ae Atuam i taubukin te nono aei, n atibu aika karinanaki, ao ko na kaira te kao mwaane are te kauoman are ataei, ao kareanna bwa te karea ni kabuekaki i aoni mwakorokoroni kain te kai ae tabu* are ko koreia ni kabwakaa.”
27 Mangaia are e kairiia mwaane aika tengaun Kiteon mai buakoia ana toro ao e karaoa are e tuangnga Iehova. Ma e rangi ni maakuia kaaini batan tamana ao mwaanen te kaawa ni karaoia n te ngaina, mangaia are e karaoia n te bong.
28 Ngke a utimwaaka mwaanen te kaawa n te moaningabong are imwina, ao a nora baonikareani Baara bwa e a tia ni kabwakaaki ao e a tia ni koreaki ni kabwakaaki te kai ae tabu* are i rarikina, ao e a tia ni kareanaki te kao mwaane are te kauoman are ataei i aon te baonikarea are e kateaki.
29 A ititiraki i marenaia ni kangai: “Antai ae karaoa te baei?” Imwin aia kakaae ao a taku: “Boni Kiteon are natin Ioaati ae karaoa te baei.”
30 Mangaia are a taku mwaanen te kaawa nakon Ioaati: “Kaotinakoa natim bwa e na mate, bwa e kabwakaa baonikareani Baara ao e korea te kai are tabu* are i rarikina ni kabwakaa.”
31 Ao e taku Ioaati+ nakoia te koraki ake a kaitaraa ni kabane: “E riai bwa kam na tei ibukini Baara? E riai bwa kam na kamaiua? E riai ni kamateaki n te ingabong aei te aomata ane tei ibukina.+ Ngkana bon te atua temanna ngaia, ao ke e tei i bon ibukina,+ ngkai iai ae e a tia ni kabwakaa baonikareana.”
32 Ao e arana Kiteon bwa Ierubaara* n te bong anne, bwa e taku: “Ke e tei i bon ibukina Baara, bwa iai ae e a tia ni kabwakaa baonikareana.”
33 Ao a ikotii aia taanga ni buaka ni kabane tibuni Mirian+ ma tibun Amareka+ ao kaaini Mainiku,+ ao a nakon te itera are te iterana* nakon te Mwarua* i Ietireera ao a kaembwa iai.
34 Ao e roko taamnein* Iehova i aoni* Kiteon,+ ao e katanga te buu+ ao a ikotaki tibun Abietera+ i akuna.
35 E kanakoia taan uataeka rinanon abaia tibuni Manate ni kabutaa, ao a ikotaki naba i akuna. E kanakoia naba taan uataeka rinanon abaia tibun Atera, tibun Teburun, ao tibun Nabetari, ao a roko naba ni kawaria.
36 Ao e taku Kiteon nakon te Atua ae koaua: “Ngkana ko na kamaiuia tibun Iteraera rinanou, n aron are ko beritanna,+
37 ao ae I a kaaki buraen te tiibu i aon te tabo ni kaaki kun ni uita. Ngkana iai te aoi tii i aoni buraen te tiibu aei, ma e mwautakataka aontano ni kabutaa, ao N na ataia ngkanne bwa ko na boni kamaiuia tibun Iteraera rinanou, n aron are ko beritanna.”
38 Ao e bon riki te aro anne. Ngke e utimwaaka n te ingabong are imwina ao e ongira buraen te tiibu arei, ao e katiinakoa te aoi mani buraen te tiibu arei ae tau mwaitina ni kaona te boora ae bubura n te ran.
39 Ma e taku Kiteon nakon te Atua ae koaua: “E na tai urarake unim irou, ma kariaia bwa N na taetae riki teuana te tai. Taiaoka kariaia bwa N na bubutii riki teuana tuoani buraen te tiibu aei. Taiaoka kariaia bwa e na mwautakataka tii buraen te tiibu aei ma e na aoi aontano ni kabutaa.”
40 Mangaia are e karaoa te aro anne te Atua n te tairiki anne, tii buraen te tiibu ae mwautakataka, ao e aoi aontano ni kabutaa.
Taiani Kabwarabwara Mai Nano
^ Ke tao, “taabo ni kaikobwai i aantano.”
^ Ebera, “ongo ni bwanaau.”
^ Ebera, “tenga.”
^ Ae nanona, “Iehova Bon te Raoi.”
^ Nora Nanon Taeka.
^ Nora Nanon Taeka.
^ Nora Nanon Taeka.
^ Nora Nanon Taeka.
^ Ae nanona, “Ke E Tei i Bon Ibukina Baara (Kaitaraa).”
^ Ke, “nakon iteran te karaanga are te iterana.”
^ Ke, “te Tabo ae Aoraoi ae Mena n te Mwarua.”
^ Nora Nanon Taeka, “Taamnei.”
^ Ebera, “ni kunnikaia.”
