Areru 104:1-35
104 I* bia karaoiroa Iehova.+
Ko rangi ni kakannato ngkoe ae Iehova ae Atuau.+
Ko kunnikaiaki n te mimitong* ma te tamaroa.+
2 Ko niraki n te oota+ kaanga n te kunnikai,Ko taakina karawa kaanga kunnikain te umwanrianna.+
3 E kawenei i etan raan* tatangan ana ruu ake i eta,+E karaoa te nang bwa ana kaa ni buaka,+Ao e mwamwananga ni bain te ang ni kiba.+
4 E karaoiia ana anera bwa taamnei aika mwaaka,Aika ana tabonibai bwa te ai ae kaakang.+
5 E kamatoaa te aonnaba i aon aana,+E na aki kaingingaki mani nnena* n aki totoki.+
6 Ko rabunna n te ran ae makuakua kaanga n te kunnikai.+
A tei raan i etan taiani maunga.
7 A kionako ni boaan te aba iroum+Ao a takaka ni birinako ni karongoaan am baa.
8 A rierake maunga+ ao a ruo rikaaki mwarua,Nakon te tabo are ko kateia ibukia.
9 Ko katea te tia ae a aki riai n riaona,+Bwa a aonga n aki manga rabuna te aonnaba.
10 E kanakoi taiani koburake n ran nakon taiani mwarua,Ao a raanga i marenan taiani maunga.
11 A katauraoa te ran ibukia manin te tawaana aika moaanti ni kabane,Ao a katoki takaia iai taongki aika moaanti.
12 A karaoi ngaoia mannikiban annang i rarikin raan,A anene i buakoni baanikai aika matenten.
13 E teboki taiani maunga man ana ruu ake i eta.+
E nuai te aonnaba n uaan am mwakuri.+
14 E karikirakei uteute ibukia kaao,Ao aroka bwa a na kabonganai aomata,+Ni karikirakea te amwarake man te aba,
15 Ao te wain ae kakimwareireia nanon te aomata,+Te bwaa ae kamaratiratia te ubu,Ao te kariki ae kakorakoraa nanon te aomata ae mamate.+
16 A nuai raoi arokan Iehova,Aika kain Rebanon aika tiira ake e uniki,
17 Ike a karaoi iai ngaoia mannikiba.
Mwengan te titaoki*+ boni kaai aika mwaiango.
18 Maunga aika rietata bon ibukia kooti ake n te maunga,+Ao bwaa bon aia tabo ni kamanomano manin te bwaa aika taiani baetia.*+
19 E karaoa namwakaina ibukini kanikinaean taai aika baireaki,Ao taai e ataa raoi ana tai ni bung.+
20 Ko karokoa te rotongitong ao e a bong,+Ike a ririaki iai manin te buakonikai aika kaakang ni kabane.
21 A bekorara raian ataei n ukora konaia+Ao a ukoukora kanaia mairoun te Atua.+
22 Ngkana e oti taai,Ao a oki rikaaki ao ni wene ni bwangaia.
23 E nakon ana mwakuri te aomata,Ao e bekutata ni karokoa ae tairiki.
24 Ai mwaitira am mwakuri ngkoe ae Iehova!+
Ko karaoi ni kabane n te wanawana.+
E on te aonnaba ni baike ko karaoi.
25 Ao arei taari, e rangi n abwabwaki ao n raababa,E onrake ni baika maiu aika aki kona ni warekaki, aika uarereke ao aika bubura.+
26 A mwamwananga iai kaibuke,Ao e takaakaro iai te Ribaietan*+ are ko karikia.
27 A bane ni kantaningaikoBwa ko na angania kanaia n taina.+
28 A rikorikoi baike ko angania.+
A nuai ni baika raraoi ngkana ko kaurea baim.+
29 A aki rau ngkana ko karabaa ubum.
Ao a mate ma n okira te tanoNgkana ko uotaanako te korakora ae te maiu mairouia.+
30 Ngkana ko kanakoa taamneim* ao a karikaki.+
Ao ko kabooua aontano.
31 E na teimatoa mimitongin Iehova n aki toki.
E na kimwareirei Iehova n ana mwakuri.+
32 E taraa te aonnaba ao e mwaeiei,Ao e ringi maunga ao a bubu.+
33 N na anene nakon Iehova+ ni kabane maiuu,N na anene n neboa* Atuau n au bong ni maiu ni kabane.+
34 Ke e kukurei ni baika I iaiangoi.*
N na kimwareirei iroun Iehova.
35 A na maunanako man te aonnaba taani bure.
Ao a na aki manga kaoti aomata aika buakaka.+
I* bia karaoiroa Iehova. Karaoiroa Iah!*
Taiani Kabwarabwara Mai Nano
^ Ebera, ne’phesh, nora Nanon Taeka.
^ Ke, “karineaki.”
^ Ebera, “n te ran.”
^ Ke, “e na aki kamwaeieieaki.”
^ Nora Nanon Taeka, “Maan.”
^ Nora Nanon Taeka, “Maan.”
^ Nora Nanon Taeka.
^ E kaineti aei ma mwaakan te Atua ae mwamwakuri.
^ Ke, “katangitang nakon.”
^ Ke tao, “Ke e kakukurei kananoan au iango i aona.”
^ Ebera, ne’phesh, nora Nanon Taeka.
^ Ke, “Areruia!” “Iah” boni kauarerekean te ara ae Iehova.
