Areru 26:1-12
Ana areru Tawita.
26 Motika taekau Iehova, bwa I nakonako n etin arou,+I onimakina Iehova n akea te nanokokoraki.+
2 Nenerai Iehova ao kataai,Kaitiakii au iango aika raba* ao nanou.+
3 Bwa e memena i matau n taai nako am tangira ae koaua,*Ao I nakonako n am koaua.+
4 I aki iraorao* ma aomata aika mwamwanaa te aba,+Ao I rarawa nakoia te koraki aika karabai aroia.*
5 I ribaa raonakiu irouia aomata aika aki raoiroi,+Ao I rawa n iraorao* ma akana buakaka.+
6 N na teboki baiu ni kaotia bwa akea au bure,Ao N na mwananga ni katobibia am baonikarea, ngkoe ae Iehova,
7 Bwa e aonga n ongoraeakinaki au katituaraoi,+Ao N na tataekin am mwakuri ni kabane aika kamimi.
8 Iehova, I tangira te auti ae ko maeka iai,+Ao te tabo ae mena iai mimitongim.+
9 Tai teweainako ma taani bure,+Ke n anaa maiuu ma aomata aika iowawa,*
10 Aika a karaoa te aroaro ae kanuka ni baia,Ao e onrake baia ae te atai n te kamaraato.
11 Ma ngai, N na nakonako n etin arou.
Kamaiuai* ao akoai.
12 E tei waeu i aon te tano ae aoraoi,+N na karaoiroa Iehova i buakon te botaki n aomata ae rangi ni bati kaaina.+
Taiani Kabwarabwara Mai Nano
^ Ke, “au namakin aika rangi n raba.” Ebera, “au kirine.”
^ Ke, “tangira ae kona n onimakinaki.”
^ Ebera, “tekateka.”
^ Ke, “I aki reitaki ma aomata aika baka n raoiroi.”
^ Ebera, “tekateka.”
^ Ke, “ma aomata aika katuturaraa.”
^ Ebera, “Manga kabooai.”
