Areru 42:1-11
Te kaetieti nakon te mataniwi n te anene. Aia matikiera* natini Kora aika mwaane.+
42 N aron te ria ae bwarua te karaanga n ran,Ao ngai naba I* bwarua te kan toro iroum, ngkoe ae te Atua.
2 I* ingainga ibukin te Atua ae te Atua ae maiu,+ n aron te aomata ae bora n taka.
N na roko n ningai ao ni kaoti i matan te Atua?+
3 Boni kanau rannimatau ni ngaina ao ni bong,A kakanikoai aomata ni kabongnga ni kangai: “E nga Atuam?”+
4 I uringi baikai, ao N na kaotii au namakin ni kabane,Bwa I a tia n nakonako ngkoa ma aomata aika mwaitikurikuri,I taneiai n nakonako ni karaurau n rimoaia nakon ana auti te Atua,Ma te bwanaa ni kakatonga ao ni katituaraoi,Ae bwanaaia aomata aika bati aika bukamarua te toa.+
5 E aera ngkai e a bwara nanou?+
E aera ngkai e a kiriwe nanou?
Kantaningaa te Atua,+Bwa N na karaoiroia bwa au tia Kamaiu ae Moan te Kakannato.+
6 Atuau, e a bwara nanou.+
Anne bukina ae I uringko iai,+Man te aba ae Ioretan ao man taubukin Oman,Man te Maunga ae Mitia.*
7 E wewete te ran ae makuakua nakon te ran ae makuakuaNi karongoaan am bwaro n ran nako.
A bane n taonainako am nao aika korakora.+
8 E na anganai Iehova n te ngaina ana tangira ae koaua,*Ao e na mena irou ana anene n te tairiki ae te tataro nakon Atuani maiuu.+
9 N na kangai nakon te Atua ae au bwaa:
“E aera ngkai ko a mwaninga taekau?+
E aera ngkai I riai n nakonako ma te nanokawaki, ibukin te karawawata mairoun te tia kairiribai nakoiu?”+
10 A kakanikoai ma te riribai ae tiritiri* akana kairiribai nakoiu,A kakanikoai ni kabongnga ni kangai: “E nga Atuam?”+
11 E aera ngkai e a bwara nanou?
E aera ngkai e a kiriwe nanou?
Kantaningaa te Atua,+Bwa N na karaoiroia bwa au tia Kamaiu ae Moan te Kakannato ao Atuau.+
Taiani Kabwarabwara Mai Nano
^ Nora Nanon Taeka.
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ke, “te maunga ae uarereke.”
^ Ke, “tangira ae kona n onimakinaki.”
^ Ke tao, “Kaanga a kamanatuaa riiu.”
