Areru 75:1-10
-
E motikitaeka te Atua n te riai
-
A na moi aika buakaka n ana mwangko Iehova (8)
-
Te kaetieti nakon te mataniwi n te anene. Te anene ae “Tai Kamauna.”
Ana areru Ataba.+ Te anene.
75 Ti kakaitau nakoim ngkoe ae te Atua, ti kakaitau nakoim,E a kaan aram,+Ao a tataekin am mwakuri aika kamimi aomata.
2 Bwa ko kangai: “Ngkana I bairea te tai,Ao I motikitaeka n te riai.
3 Ngke e a ran te aonnaba ma kaaina ni kabane,Ao boni ngai are I kamatoai bouana.” (Tiera)
4 I taku nakoia akana kamoamoa, “Tai kamoamoa,”Ao nakoia akana buakaka, “Tai karietataa korakorami.*
5 Tai karietataa korakorami* nako karawa,Ke n taetae ni kainikatonga.
6 Bwa e aki roko te karietataakiMai mainiku ke maeao ke maiaki.
7 Bwa bon te tia Motikitaeka te Atua.+
E karinanoa te mwaane temanna, ao e karietataa are temanna.+
8 Bwa iai te mwangko i bain Iehova,+E a buroburo te wain ao e renganaki raoi.
E na boni kabwaroa,Ao a na bane akana buakaka n te aonnaba ni moi iai ni karokoa ae e boni babane raoi.”+
9 Ma ni kaineti ngkanne ma ngai, N na tataekinna n aki toki,N na anene n neboa* Atuan Iakoba.
10 Bwa e kangai: “N na koreinako korakoraia* ni kabane aomata aika buakaka,Ma e na karietataaki korakoraia* akana raoiroi.”
Taiani Kabwarabwara Mai Nano
^ Ebera, “koromi.”
^ Ebera, “koromi.”
^ Ke, “katangitang nakon.”
^ Ebera, “koroia.”
^ Ebera, “koroia.”
