Areru 81:1-16
Te kaetieti nakon te mataniwi n te anene, i aon te Kitite.* Ana areru Ataba.+
81 Takarua ni kimwareirei nakon te Atua ae korakorara.+
Takarua n tokanikai nakon Atuan Iakoba.
2 Moana te katangitang ao anaa te tamboriin,*Ao te abi ae tangiraoi n ikotaki ma te bwai ni katangitang ae iai karaina.
3 Katanga te buu n te oti n namwakaina,+Ao n tabwaninin namwakaina, ibukini bongin ara toa.+
4 Bwa bon te tua ibukia tibun Iteraera,Bon ana moti Atuan Iakoba.+
5 E kateia bwa te kauring ibukin Ioteba,+Ngke E otinako n ekaanako te aba ae Aikubita.+
I ongo te bwanaa* ae I aki kinaa,
6 E taku te Atua: “I tabeka te uota mai aon angana,+Ao a a inaomata baina man te bwaene.
7 Ko wewete n rawawatam, ao I kamaiuko,+I kaekako man te nang ae nnen te baa.*+
I kataiko n ranin Meriba.*+ (Tiera)
8 Kam na ongora au aomata, ao N na kaotioti ni kaaitaraingkami.
Ngkami aika tibun Iteraera, tera ngke kam ongo irou.+
9 E na aki reke i buakomi te atua ae kaokoro,Ao kam na aki bobaraaki nakon te atua ae ianena.+
10 Iehova ae Atuami ngai,Are teuare kairingkami ni kaotinakoingkami man te aba are Aikubita.+
Kauremangangaai wimi, ao N na kaoni.+
11 Ma a aki ongo ni bwanaau au aomata,A aki aantaeka tibun Iteraera irou.+
12 Mangaia ae I kariaia bwa a na iraanako imanonon nanoia,A karaoa are a taku bwa e eti.*+
13 Tera ngke a ongo irou au aomata,+Tera ngke a nakonako ni kawaiu+ tibun Iteraera!
14 N na waekoa ni kataenikaiia akana kairiribai nakoia,N na raira baiu n ekiianako taani kakaaitaraia.+
15 Te koraki ake a ribaa Iehova, a na kui ni kerikaaki i matana,Ao tokia* e na akea tokina.
16 Ma e na kaamwarakeko* n te uita ae te kabanea n raoiroi,*+Ao ni kanuaiko n aia karewe manibeeru are man te bwaa.”+
Taiani Kabwarabwara Mai Nano
^ Nora Nanon Taeka.
^ Nora Nanon Taeka.
^ Ke, “taetae.”
^ Ebera, “nnen te baa ae raba.”
^ Ae nanona, “Kauntaeka.”
^ Ebera, “A nakonako n aia reirei ni kairiri.”
^ Ebera, “aia tai.”
^ Ebera, “kaamwarakea teuanne,” ae taekaia ana aomata te Atua.
^ Ebera, “mwaeten te uita.”
