Te Tua-Kaua 33:1-29
33 Aio te kakabwaia ae e taekinna Mote ae ana aomata te Atua ae koaua, i aoia tibun Iteraera imwaini matena.+
2 E taku:
“Iehova, ae e roko mai Tinai,+Ao e ootanako nako aoia mai Teira.
E ootanako mimitongina man te aono ae maungaunga i Baran,+Ao raona ana anera aika tabu aika mwaitikurikuri,*+Ao ana tia buaka nako i angaataina.+
3 E tatangiriia ana aomata,+A mena aia aomata aika itiaki* ni kabane i nanoni baim.+
A tekateka i rarikini waem,+Ao a a ongora n am taeka.+
4 (E anganira te kaetieti Mote, ae te tua,+Ae riki bwa aia bwai te botaki n aomata aika tibun Iakoba.)+
5 Ao E riki bwa te uea i Ieturun,*+Ngke a botaki mataniwia aomata,+N ikotaki ma aia baronga nako tibun Iteraera.+
6 Ke e maiu Reuben ma n aki mate,+Ao ke a aki kerikaaki mwaitiia ana mwaane.”+
7 Ao e taekina te kakabwaia aei i aon Iuta+ ni kangai:
“Ongora ngkoe ae Iehova, ni bwanaan Iuta,+Ao ko bia kaokia nakoia ana aomata.
A a tia baina ni kamanoi* ana bwai,Ao ko bia buokia ni kaaitaraia taani kaitaraa.”+
8 E taekina ae kangai ni kaineti ma Rewi:+
“Am* Tummim ma am Urim*+ bon ana bwai te mwaane ae kakaonimaki ni koaua nakoim,+Are ko kataia i Mata.+Ao ko a kaiangatoa ma ngaia i rarikin ranin Meriba.+
9 Te mwaane ae kangai nakon tamana ao tinana, ‘I aki kaota tabeakinami.’
E aki naba kubariia tarina,+Ao e kaaki taekaia oin natina mwaane,Bwa a kawakina am taeka,Ao a kakairi n am berita.+
10 Ke a reireina Iakoba n am moti+Ao Iteraera n am Tua.+
Ke a anga te karea ae boiarara bwa te boi ae kamaiu nakoim,*+Ao te karea ni kabane i aon am baonikarea.+
11 Kakabwaiaa korakorana, ngkoe ae Iehova,Ao ko bia kaota kukureim n ana mwakuri baina.
Ao kamanatuai rangaia* akana teirake ni kaitaraa,Bwa a aonga n aki manga teirake akana ribaia.”
12 E taekina ae kangai ni kaineti ma Beniamin:+
“Ke e maeka i rarikina ma te mweraoi teuae tangiraki iroun Iehova,Ngkai e kabongnga ni kamanoa,Ao e na maeka i marenan angana.”
13 E taekina ae kangai ni kaineti ma Ioteba:+
“E bia kakabwaiaaki abana iroun Iehova+Ni bwaini karawa aika rangi n raoiroi,Ma te aoi ao te ran man taiani koburake n ran i nano,+
14 Ma baika rangi n raoiroi ake e katauraoi taai,Ao uaa aika rangi n raoiroi ni katoa namwakaina,+
15 Ma bwaai aika taiani kabanea n tamaroa aika ni maunga* ake mangkoa,+Ao bwaai aika rangi n raoiroi aika n tabuki aika teimaan,
16 Ma bwain aon te aba aika rangi n raoiroi ao kanoana,+Ao te akoaki mairoun Teuare maeka i buakon te aroka ae kateketeke.+
A bia roko i aon atun IotebaI aon taubukin atun teuare tebenako mai buakoia tarina.+
17 Titeboo tamaroana ma te kao mwaane ae te karimoa,Ao korona ma koron te kao mwaane ae moaanti.
E na kebutuia* botannaomata ni korona,Ngaiia ni kabane ni karokoa tabon nako aonnaba,Kooro aikai boni kanoan Eberaim+ aika tatabebwi tenga,Ao kooro aikai boni kanoani Manate aika nga ma nga.”
18 E taekina ae kangai ni kaineti ma Teburun:+
“Kimwareirei ngkoe ae Teburun, n otinakom,Ao ngkoe ae Itakara, i nanon nako am umwanrianna.+
19 A na weweteia botannaomata nakon te maunga,Ike a na anga iai taiani karea aika raoiroi.
Bwa a na temetemeka kaubwain* taari ae bati,Ao baika kakawaki aika kaikoaki* aika karabaaki n te tano.”
20 E taekina ae kangai ni kaineti ma Kata:+
“Ke e kakabwaiaaki te aomata ae karaababai tian abani Kata.+
E aroria ikanne kaanga te raian,Ae tauraoi n raeuaa te bai, eng, ao taubukin te atu.
21 E na rinea te moan tibwanga i bon ibukina,+Bwa e kaokoroaki ikanne tibwangan te tia karaotua.+
A na ikotaki mataniwia aomata.
E na kakororaoa raoiroin Iehova
Ma ana moti nakon Iteraera.”
22 E taekina ae kangai ni kaineti ma Tan:+
“Bon te raian te teei Tan.+
E na ewewe n otinako mai Batian.”+
23 E taekina ae kangai ni kaineti ma Nabetari:+
“E nuai Nabetari n te akoakiAo e tibutaua n ana kakabwaia Iehova.
E ababa i maeao ao i maiaki.”
24 E taekina ae kangai ni kaineti ma Atera:+
“Ke e kakabwaiaaki Atera n naati mwaane.
E bia akoaki irouia tarina,Ao e bia kateboi* waena n te bwaa.
25 Bon te biti ao te buraati rokan nako mataroan am oo,+Ao ko na mweraoi ni kabane am bong.*
26 Bon akea n ai aron te Atua ae koaua+ ae Atuan Ieturun,+Ae e mwamwananga rinanoni karawa bwa e na buokikoAo ae e mwamwananga riaon naang ni mimitongina.+
27 Bon te tabo ni kamanomano te Atua mangkoangkoa,+A mena baina aika teimatoa i aam.+
Ao e na kakioianako taani kairiribai mai mwaim,+Ao e na kangai, ‘Kamaunaia!’+
28 E na maeka ma te mweraoi Iteraera,Ao e na tei n tii ngaia ana koburake n ran Iakoba,N te aba ae bati iai te uita* ma te wain ae boou,+Ao e na katimtimwa te aoi ana karawa.+
29 Kam a kukurei ngkami aika tibun Iteraera!+
Antai ae ai aromi,+Ae te natannaomata ae karekea te kakamaiu iroun Iehova,+Ae ami otanga ni kamanomano+Ao ami kabaang ae abwabwaki riki?
Ane a na kui ni kerikaaki imwaimi akana kairiribai nakoimi,+Ao kam na toutoui nukaia.”*
Taiani Kabwarabwara Mai Nano
^ Ke, “tatabebwi tenga aika tabu.”
^ Ke, “tabu.”
^ Ae nanona, “te Aomata ae Raoiroi,” ae bon te nakoa ae rine ae tei ibukin Iteraera.
^ Ke, “un ibukin.”
^ “Am” ao “nakoim” n te kibu aei e kaineti nakon te Atua.
^ Nora Nanon Taeka.
^ Ebera, “i bwairim.”
^ Ke, “bebeeia.”
^ Ke tao, “maungani mainiku.”
^ Ke, “ewariia.”
^ Ebera, “a na temetemeki baika bati.”
^ Ke, “taiani kaubwai.”
^ Ke, “teboki.”
^ Ebera, “Ao ai aron am bong nako korakoram.”
^ Ke, e kona n nanona “te baare.”
^ Ke tao, “taabo aika rietata.”
