Warekaia Iteraera 24:1-25
24 Ngke e noria Baraam bwa e kukurei* Iehova bwa e na kakabwaiaa tibun Iteraera, ao e aki manga nako riki ni kakaaei kanikinaeani kamaunanakoaia,+ ma e rairaki ni kaitaraa te rereua.
2 Ngke e tabeka matana Baraam ma n noriia tibun Iteraera bwa a katei aia umwanrianna barongana nako,+ ao e a ruonaki n taamnein te Atua.+
3 E taekina ngkanne te kario ae kangai:+
“Ana taeka Baraam are natini Beora,Ao ana taeka te mwaane are e a tia ni kaureaki matana,
4 Te bwai ae e taekinna te aomata are ongoraea ana taeka te Atua,Ae e nora te miitara mairoun Teuare Moan te Mwaaka,Ae e bobaraaki ma matana aika aki rabunaki:+
5 Ai tikiraoira am umwanrianna nako, ngkoe ae Iakoba,Ao am tabo nako ni maeka, ngkoe ae Iteraera!+
6 A abwabwaki nako n aron taiani mwarua,+N aron onnaroka aika i rarikin te karaanga.
N aron aroka aika aroe ake e a tia n uniki Iehova,N aroni kaai aika tiira ake i rarikin te ran.
7 E teimatoa n timtim te ran man ana bwaketi ake uoua,Ao e unikaki ana koraa* i rarikin raan aika bati.+
E na kakannato riki ana uea+ nakon Akaka,+Ao e na karietataaki ana tautaeka n uea.+
8 E kairia te Atua ni kaotinakoa mai Aikubita.
Kaanga koron te kao mwaane ae moaanti ngaia, irouia naakai.
E na kaniia taian natannaomata, ake taani karawawataa,+Ao e na kangkantii riia, ao e na kamaeinikuni ni kanoan ana kainikatebe.
9 E wene, e aroria n ai aron te raian,Ao antai ae kona ni kauta te raian?
A na kabwaia akana kakabwaiako,Ao a na maraia akana kamaraiako.”+
10 Ao e a rangi ni maraki nanoni Baraka irouni Baraam. E uboi baina Baraka ni kakaniko ao e taku nakoni Baraam: “I weteiko bwa ko na kamaraiaia aiau,+ ma akea te bwai ae ko karaoia ma ko kakabwaiaia tenua te tai.
11 Naako naba ngkai nakoni mwengam. I iangoia ngkoa bwa N na kabatiaa karineam+ ma noria! e taua te karineaki mairoum Iehova.”
12 E kaeka Baraam nakoni Baraka ni kangai: “Tiaki I kangai nakoia taan uataeka ake ko kanakoia,
13 ‘Ngkana tao e anganai Baraka ana auti ae on n te tirewa ma te koora, ao I bon aki kona naba ni karaoa te bwai teuana n oin nanou,* ae riaon ae e tua Iehova, e ngae ngkana tao e raoiroi ke e buakaka. Tiaki N na tii taekin taeka ake e tuangai Iehova’?+
14 Ao ngkai N nangi nako ni kawariia au aomata. Nakomai ao kariaia bwa N na kaongoko te bwai ae e na karaoia te natannaomata aei nakoia am aomata nakon te tai ae e na roko.”*
15 “E taekina ngkanne te kario ae kangai:+
“Ana taeka Baraam are natini Beora,Ao ana taeka te mwaane are e a tia ni kaureaki matana,+
16 Te bwai ae e taekinna te aomata are ongoraea ana taeka te Atua,Ao te aomata ae reke irouna te atatai mairoun Teuare Moan te RietataAe e nora te miitara mairoun Teuare Moan te Mwaaka,Ngke e bobaraaki ma matana aika aki rabunaki:
17 N na noria ma tiaki ngkai,N na noria ma tiaki n te tai ae waekoa.
E na otinako te itoi+ mairoun Iakoba,Ao e na nako okon+ te uea mairoun Iteraera.+
Ao e na boni kamanatuaa ramwani* Moaba+Ao tabwanouia natin nako te karongoa.
18 Ao e na riki Etom bwa aban teuanne+Ao e na riki Teira+ bwa abaia aian+ TeiraNgkai e kaotiota ninikoriana Iteraera.
19 Ao e na totokanikai teuare otinako mairoun Iakoba,+Ao e na kamauna ane e reke maiuna man te kaawa.”
20 Ngke e nora Amareka, ao e reitaanako ana kario ni kangai:
“Amareka boni moaia natannaomata,+Ma n tokina, e na boni mauna.”+
21 Ngke e noriia I-Kenaite,+ ao e reitaanako ana kario ni kangai:
“E mano raoi kainikatikum, ao e kateaki am tabo ni maeka i aon te bwaa.
22 Ma e na kabueka Kaiin* te aomata temanna.
E na maanra imwaini kairakim nako bwa te taenikai iroun Aturia?”
23 Ao e reitaanako ana kario ni kangai:
“Ai kananoangara! Ai antai ae e na maiu ngkana e a karaoa aei te Atua?
24 A na roko kaibuke mani matabaiawani Kitim,+Ao a na karawawataa Aturia,+Ao a na karawawataa Ebere.
Ma e na boni mauna naba teuanne.”
25 Ao e teirake Baraam+ ao e nako n okira ana tabo. Ao e waakina naba kawaina Baraka.
Taiani Kabwarabwara Mai Nano
^ Ebera, “raoiroi i matan.”
^ Ke, “kanoana.”
^ Ebera, “mai nanou.”
^ Ke, “i nanoni kabaneani boong.”
^ Ke, “borani Moaba.”
^ Ae taekan aia baronga I-Kenaite.