TITIRAKI 10
Tera ae E beritanaki n te Baibara Ibukin Taai Aika A na Roko?
“A na abana te aonnaba akana raoiroi, ao a na maeka i aona n aki toki.”
“E teimatoa n aki toki te aonnaba.”
“E na onga te mate n aki toki, ao e na kaoi rannimata mani maata ni kabane te Uea ae Moan te Rietata ae Iehova.”
“N te tai anne ao a na kaureaki mataia aomata aika mataki, ao a na kaukaki taningaia aomata aika bonotaninga. N te tai anne ao e na ewewe te mwauku n aron te ria, ao e na takarua ni kimwareirei newen ane e baennewe. Bwa a na koburake raan n te rereua, ao karaanga n te rereua ae aoraoi.”
“E na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”
“A na katei auti ao a na maeka i nanoia, ao a na uniki kureebe ni nne ni kureebe ao ni kang uaaia. A na aki katea ae e na maeka iai temanna, ao a na aki naba unika ae a na kanna tabemwaang. Bwa a na abwabwaki aia bong au aomata n aron abwabwakin ana bong te aroka, ao a na bati kimwareireia au aomata aika rineaki n aia mwakuri baia.”
