Iangoa te bwai ae riki aei: E tuai ni koro tebwina ana miniti Karen n te botaki teuana, ao e a ongo naba te bwanaa ae rangi ni kinaa mai akuna.

E rairaki Karen ao e nora raoraona ae Jessica, ao e taui bwatoro aika uaai aika tibwa kaukaki. E ataia ae te kamanging kanoaia. E taua are teaina Jessica i matani Karen ao e taku: “Ko a ikawai ao ko a tau ni kakukureiko teutana, ke e kangaa?”

E kani karautaeka Karen, ma bon raoraona Jessica. Ao e aki tangiria Karen bwa e na iangoaki iroun raoraona aei bwa e kabotu. Irarikina, bon temanna i buakoia ataeinnaine aika raoiroi Jessica. Ngaia are ngkana e moi neiei, e bae n aki buakaka te moi. E taku i nanona Karen: ‘Bon tii te moi. Ai raon are te drug!’

Ngke arona bwa ngkoe Karen, tera ae ko na karaoia?

Ngkana ko na karaoa am motinnano ma te wanawana n te aekaki anne, ko riai n ataia bwa te aeka n aomata raa ngkoe. Ataakin ae te aeka n aomata raa ngkoe e nanonaki iai am koaua ao baika ko iangoi bwa a kakawaki. Ngkana iai iroum te atatai anne, ko a kakorakoraaki iai bwa ko na kaira aroni maium n oneani mwin are a na kaiririko tabemwaang.—1 I-Korinto 9:26, 27.

Ko na kangaa ni karikirakea te korakora anne? E kakawaki kaekaan titiraki aika aua aika imwina.

Ngkana ko nanomatoa n nimti am koaua ao baika ko iangoi bwa a kakawaki, ai aron te aroka ae nene wakaana ngkoe ae kona ni kaaitarai angibuaka aika korakora

Ataakin am konabwai ao aroarom aika raraoi, e na karikirakea riki onimakinan am konabwai.

TE KATOTO MAN TE BAIBARA: E korea aei te abotoro Bauro: “E ngae ngkana tao I bangabwai n te taetaenikawai, ma I bon aki bangabwai n te atatai.” (2 I-Korinto 11:6) Ibukin otan raoi Bauro n te Koroboki ae Tabu, e a kona n tei n nene ngkana e kataaki irouia tabemwaang. E aki kariaia aia taeka aika aki raraoi bwa e na aki onimakina iai ana konabwai.—2 I-Korinto 10:10; 11:5.

TUOA RAOI AROM. Korea i nano, am tarena ke te bwai ae ko rabakau.

Kabwarabwaraa ngkai ae bon anuam raoi. (N te katoto, ko mwamwannano? ko tituaraoi? ko kona n onimakinaki? ko roroko i aon te tai?)

N aron te tiein ae bubura ae e a aki roko ni korakorana tii ibukin teuana tieinna ae e a kaani moti, e kona ni waekoa n rotakibuaka am koaua ao baika ko iangoi bwa a kakawaki ngkana ko kariaia kabwakam bwa a na taua aroni maium.

TE KATOTO MAN TE BAIBARA: E ataa kabwakana Bauro. E korea aei: “E rangi ni kimwareirei nanou n ana tua te Atua, ma I noria bwa iai riki te tua teuana ae mwamwakuri i rabwatau ae buakana te tua ae n au iango, ao e kairai bwa te taenikai nakon ana tua te bure.”—I-Rom 7:22, 23.

TUOA RAOI AROM. Tera kabwakam ae ko riai n rabakau arom iai bwa e na aki tautaekaniko?

Ko kona n toka n te taxi ao n tuanga te turaiua bwa e na buti ni kakatobibia te auti teuana ni karokoa banen ana bwaa? Bon te nanobaba karaoan anne, ao e kabanemwane!

Tera te reirei iai? Ngkana iai tiam, bon iai te bae ko uaiakinna ni maium. Iai te tabo ae ko na nako iai, ao am babaire ibukin arom n roko iai.

TE KATOTO MAN TE BAIBARA: E korea aei Bauro: “Arou ni biribiri, tiaki n aron ae e aki ataaki mwina.” (1 I-Korinto 9:26) N oneani mwin are e na kariaia Bauro baika riki nakoina bwa e na tiotionako iai ni maiuna, e katei tiana ao e maiuakin.—I-Biribi 3:12-14.

TUOA RAOI AROM. Korei i nano tiam aika tenua ake ko kan roko iai n te ririki ae e na roko.

Ngkana akea baika ko kakoauai, ko aki kona ni karaoi motinnano. N aron te aeka ni beru ae te kemirian ae bibita karana, ane ko na bibita arom bwa ko aonga ni boo i buako i buakoia tabonrorom, ae boni kanikinaean ae akea oin am koaua ao baika ko iangoi bwa a kakawaki.

Ni kaitaraan anne, ngkana a boboto am mwakuri i aoni baika ko kakoauai, ko kateimatoa iai am koaua ao baika ko iangoi bwa a kakawaki, n aki ongei baike a karaoi tabemwaang.

TE KATOTO MAN TE BAIBARA: Ngke tao tebwi tabun ana ririki te burabeti ae Taniera, e “kamatoaa i nanona” bwa e na ongeaba n ana tua te Atua e ngae ngke e raroa ma ana utu. (Taniera 1:8) Ni karaoan aei, e kaotiota raoi arona ni koaua. E kaboraoa maiuna Taniera ma baike e kakoauai.

TUOA RAOI AROM.

Baikara baika ko kakoauai? N te katoto: Ko kakoauaa te Atua? Ngkana ngaia anne, bukin tera? Tera te bwai ni kakoaua ae ko kakoauaa iai ae bon iai ngaia?

Ko kakoauaa ae boni kabwaiam ana kaetieti te Atua ibukin te aroaro ni maiu ae riai? Ngkana ngaia anne, bukin tera?

Ni kabaneana, e nga ae ko kani katotongnga—te baanikai ae bwaka ao e ubaranako n te ang ae abebete, ke te aroka ae kona ni kaaitarai naba angibuaka aika korakora? Kamatoai am koaua ao baika ko iangoi bwa a kakawaki, ao ko na riki bwa aekakin te aroka anne. Ao anne ae e na buokiko ni kaekaa te titiraki ae, Antai ngai?