A a roko i Ierutarem Betero ma Ioane bwa a na katauraoi ibukin te Toa ae te Riao n aron are e tuangia Iesu. A a tibwa roko imwina Iesu ma ana abotoro ake 10. E a bwakantaai ao e nang bung taai ngke a a bwatete rikaaki Iesu ma taan rimwina man te Maunga ae Oriweta. Aio ana kabanea n tai Iesu n taraa te kaawa man te maunga aei ni karokoa mangautina.

A waekoa n roko n te kaawa Iesu ma taan rimwina ao ni kaea te auti are a na bukamarua iai te Toa. A tamwarake nakon te ruu are i eta, ike a a nori iai baike a a tia ni katauraoaki ibukini karaoan te amwarake ae onoti ibukia. E a kamani kariariaa te tai aei Iesu, bwa e taku: “I a kamani kani kana amwaraken te Toa ae te Riao aei ma ngkami imwain ae I kammarakaki.”​—Ruka 22:15.

Ni boong akekei ao n te katei, e ninimaki aua te mwangko ni wain n tain te Toa ae te Riao irouia taani bukamaruia. N te tai aei imwin tauan te mwangko iroun Iesu, e tataro ni katituaraoi ao e taku: “Anaia ngkami n tatabemaningkami nako ao moi mai iai, bwa I tuangingkami, bwa ni moa mangkai ao N na aki manga moi n te wain, ni karokoa rokon ana Tautaeka n Uea te Atua.” (Ruka 22:17, 18) E riai ni mataata ngkanne bwa e a rangi ni kaani matena.

N tain te amwarake n te Toa ae te Riao, ao iai te bwai ae riki ae e aki kantaningaaki. E teirake Iesu ao e buuta ana kauaatao ma n anaa te taara. Imwin anne e kanoaa te beetin ae uakaan ma ngaia n te ran. N te katei ao e na taraia are ana auti te auti bwa e riai n tebokaki waen ana iruwa tao iroun te toro. (Ruka 7:44) N te tai aei ao akea are ana auti te auti ngaia are e a karaoia Iesu. E kona ni karaoa aei temanna i buakoia ana abotoro ma akea ae e kani karaoia. E riki aio ibukin te kaiangatoa are e teimatoa n riki i marenaia? Ngkana tao tera bukina ma a a boni maamaa ngke e a teboki waeia Iesu.

E taku Betero ngke e kawaraki iroun Iesu: “Ko na bon aki teboki waeu.” E kaeka Iesu ni kangai: “Ngkana I aki teboki waem, ao ko aki ibuokanibwai ma ngai.” E kaeka Betero ni kangai: “Te Uea, tai tii teboka waeu, ma baiu naba ao atuu.” E bae ni mimi imwina n ana kaeka Iesu aei: “Ane e a tia n tebotebo, e a aki kainnanoa ae bati riki nakon ae tii tebokakini waena, bwa e a bane n itiaki. Kam a itiaki, ma tiaki ngkami ni kabane.”​—Ioane 13:8-​10.

E teboki waeia ni kabane naake 12 Iesu n ikotaki naba ma waen Iuta Itekariota. Imwini karinan ana kauaatao Iesu ao ni manga tekateka n rarikiriki n te taibora, e taku: “Kam ota n te bwai ae I karaoia nakoimi? Kam aranai bwa ‘te tia Reirei,’ ao ‘te Uea,’ ao e bon eti ami taeka, bwa boni ngaia ngai. Mangaia ae ngkai I teboki waemi ngai ae te Uea ao te tia Reirei, ao kam riai naba n iteboteboki waemi. Bwa I katea te banna ni katoto nakoimi, bwa te bwai are I karaoia nakoimi, ao kam riai naba ni karaoia. I tuangingkami raoi te koaua, bwa e aki kakannato riki te toro nakon ana toka, ao e aki kakannato riki teuare kanakomaiakaki nakon teuare e kanakomaia. Ngkana kam atai baikai ao kam a kukurei ngkana kam karaoi.”​—Ioane 13:12-​17.

Ai raoiroira te reirei man te mwakuri n nanorinano aei! A aki riai n ukoukora moa te kakannato taan rimwin Iesu, n iangoia bwa a kakawaki ao a riai ni moanibwaiaki moa. N oneani mwin anne, a kakairi n ana katoto Iesu tiaki ibukin te katei ae tebokan te wae, ma bon aroia n anga ngaiia bwa a na beku ma te nanorinano ao n aki inanonano.