Imwini mangautin Iesu ao e a baireia bwa a na kawaria ana abotoro ake 11 n te maunga i Kariraia. A mena naba ikekei taan rimwina ake tabeman riki ae tao 500 mwaitiia, ae iai tabeman i buakoia aika nanokokoraki. (Mataio 28:17; 1 I-Korinto 15:6) Ma te bwai ae e a taekinna ngkai Iesu, a na buokaki iai n tatabemania nako ni kakoauaa bwa e a boni maiu.

E kabwarabwaraa Iesu bwa e a tia te Atua n anganna te mwiokoaki i aoni bwaai ni kabane i karawa ao i aon te aba. E kaumakiia Iesu ni kangai: “Mangaia are naako, reireinia aomata mai buakoia botannaomata nako bwa a na riki bwa taan rimwiu ao bwabetitoiia n aran te Tama, ao te Nati, ao te taamnei ae raoiroi. Ao reireinia bwa a na kakairi ni bwaai ni kabane ake I tua nakoimi.” (Mataio 28:18-20) Eng, e aki tii maiu Iesu ma e teimatoa naba n tabe ma tataekinan te rongorongo ae raoiroi.

A bane taan rimwin Iesu aika mwaane, aine, ao ataei, ni karekea naba mwiokoaia aei ae karekeaia taan rimwin Iesu. A bae ni kataia taani kakaaitara ni katoka aia uarongorongo naakai ma aia angareirei, ma e karaui nanoia Iesu ni kangai: “I a tia n anganaki te mwiokoaki i aoni bwaai ni kabane i karawa ao i aonnaba.” Tera nanon anne nakoia taan rimwina? E tuangia ni kangai: “Noria! N na memena iroumi ni boong ni kabane ni karokoa tain tokin te waaki ae ngkai i aon te aba.” E aki taekinna Iesu bwa a na kona ni karaoi kakai te koraki nako ake a uarongorongo. Ma a na boni boutokaaki n te taamnei ae raoiroi.

E kaokaoti Iesu nakoia taan rimwina “i nanoni boong aika 40” imwini mangautina. E kabonganai rabwata aika kakaokoro ni kaoti “nakoia n aaro aika kona ni kakoauaaki iai bwa e boni maiu,” n reireinia “taekan ana Tautaeka n Uea te Atua.”​—Mwakuri 1:3; 1 I-Korinto 15:7.

E teretere bwa ngke a boni mena naba i Kariraia abotoro, ao e tua Iesu nakoia bwa a na okira Ierutarem. Ngke e kaitiboo ma ngaiia n te kaawa, ao e taku: “Tai kitana Ierutarem, ma teimatoa n taningaa te baere e beritanna te Tama, are kam a tia n ongo irou, bwa e boni bwabetito Ioane n te ran, ma ngkami kam na bwabetitoaki n te taamnei ae raoiroi tabebong mangkai.”​—Mwakuri 1:4, 5.

Imwina riki ao e a manga kaitiboo naba Iesu ma ana abotoro. E “kairiianako n otinako man te kaawa tao raroan te nako Betania,” ae mena n iteran te Maunga ae Oriweta mai mainikuna. (Ruka 24:50) N aki ongei bwaai nako ake e tuangia Iesu ibukin nakona, ma a bon teimatoa naba ni kakoauaa bwa e na mena ana Tautaeka n Uea i aon te aba n aanga tabeua.​—Ruka 22:16, 18, 30; Ioane 14:2, 3.

A titirakina Iesu abotoro ni kangai: “Te Uea, ko nangi manga kaoka te tautaeka n uea nakoia tibun Iteraera n te tai aei?” E kaeka ni kangai: “Tiaki ami bwai te atai taai ke boong ake a motikaki, ake e tau mwia te Tama ni mwaakana.” Ao e a manga katuruturua te mwakuri are a riai ni karaoia ni kangai: “Ane kam na anganaki te mwaaka ngkana e roko i aomi te taamnei ae raoiroi, ao kam na riki bwa taani kakoaua ibukiu i Ierutarem ao i Iutaia ni kabanea, ao i Tamaria ao nakon taabo ake taiani kabanea n raroa n te aonnaba.”​—Mwakuri 1:6-8.

A mena n te Maunga ae Oriweta abotoro ma Iesu are e a mangauti, ngke e a tabe ni waewaerake nako karawa. E a raba naba ngkekei mai mataia ribuakon te nang. Imwini mangautin Iesu ao e a tia ni kakabonganai rabwata n aomata aika kakaokoro. Ma ngkai e a kakeaa te rabwata are e kabongana n te tai aei, ao e a waerake nako karawa n te rabwata n taamnei. (1 I-Korinto 15:44, 50; 1 Betero 3:18) Ngke a tabe n tataraia abotoro aika kakaonimaki aikai, ao a a kaoti naba i rarikia naakai, “uoman mwaane aika bwaimainaina.” Naakai bon anera aika kaoti ao a titiraki ni kangai: “Mwaaneni Kariraia, e aera ngkai kam tei n tararake nako karawa? Iesu aei ae uotakirake mairoumi nako karawa, e na manga roko naba n aron ae kam noria n nakona nako karawa.”​—Mwakuri 1:10, 11.

E kitana te aonnaba Iesu n akea bukamaruana irouia te botannaomata, tii taan rimwina aika kakaonimaki aika noria. E na oki naba “n aron ae”​—akea te bukamaru irouia te botannaomata, ma tii taan rimwina aika kakaonimaki aika ataa okina ma tikuna ni mwaakan ana Tautaeka n Uea.

A oki abotoro aikai nako Ierutarem. Ni boong ake imwina ao a a ikotaki ma taan rimwini Kristo ake tabeman riki, ao “Maria are tinan Iesu, ma naake tarina.” (Mwakuri 1:14) A botumwaaka n tataro te koraki aei. Teuana bukin aia tataro bwa a na rinea temanna te tia rimwin Iesu are e na onea mwin Iuta Itekariota bwa e aonga ni koro mwaitiia abotoro ae 12. (Mataio 19:28) A kan rinea te tia rimwin Iesu are e bon nori ana mwakuri Iesu ao mangautina. Ao n aron ae e taekinaki n te Baibara, ai bon te kabanea n tai aei ni karaoa te ananga ni katekeraoi ibukini kakaaean ae e kantaningaia te Atua. (Taian Areru 109:8; Taeka N Rabakau 16:33) E a rineaki iai Matia, are tao temanna i buakoia naake 70 ake e kanakoia ngkoa Iesu n uarongorongo, ao “e a warekaki i rarikia abotoro ake 11.”​—Mwakuri 1:26.

Tebwina te bong imwini waeraken Iesu nako karawa, ao e a karaoaki aia Toa I-Iutaia ae Bentekota n 33 C.E. A botaki n te ruu i eta i Ierutarem taan rimwini Kristo aika tao 120 mwaitiia. Akea bwa e a kaona te auti te karongoa ae kaanga ukin te ang ae korakora. Ao a a kaoti neewe aika kaanga taian ai, ae kaka teuana i aoia te koraki ake a mena ikekei. Ao a a bane n taetae taan rimwini Kristo n taetae aika kakaokoro. Aio boni kabwaroan te taamnei ae raoiroi are e beritanna Iesu!​—Ioane 14:26.