N te moantairiki aei ao e reireinia Iesu ana abotoro bwainan te nanorinano ngke e teboki waeia. N te tai aei imwin raoi amwaraken te Toa ae te Riao, e mwanewei ana taetae ni burabeti Tawita aikai: “Te mwaane naba ae raoi ma ngai ae I onimakinna, e tabeka bukini waena n ekainako teuare amwarake ni kanau.” E kabwarabwaraa ngkanne ni kangai: “E na kamwaneai temanna i buakomi.”​—Taian Areru 41:9; Ioane 13:18, 21.

A itaramata abotoro ao a taku nakon Iesu n tatabemania nako: “Te Uea, ngai ke tiaki?” E titiraki naba n aron anne Iuta Itekariota. E kan ataia Betero ao e tuanga Ioane are tekateka i rarikin Iesu n te taibora bwa e na titiraki bwa antai. Ngaia are e kaania Iesu Ioane ao e taku: “Te Uea, antai?”​—Mataio 26:22; Ioane 13:25.

E kaeka Iesu ni kangai: “Bon teuae N na anganna te mwakoro ni kariki ae I kateboa.” Ngke e kateboa te mwakoro ni kariki n te raurau are i aon te taibora Iesu, e anaia ao e angan Iuta ao e taku: “E na boni kitaningkami Natin te aomata n aroni korobokiana, ma ai kananoangara teuare e na kamwanea Natin te aomata! E raoiroi riki iroun teuaei ngke arona bwa e aki bungiaki.” (Ioane 13:26; Mataio 26:24) E a rin Tatan i nanon Iuta. E a kamani kabuakakaaki nanon teuaei ao e a anga ngaia ngkai bwa e na karaoa nanon te Riaboro ao e a riki iai bwa “teuare e na kamaunaaki.”​—Ioane 6:64, 70; 12:4; 17:12.

E taku Iesu nakon Iuta: “Kawaekoako karaoa te bwai ane ko nang karaoia.” A iangoia abotoro ake tabeman bwa e tuangaki Iuta are tataua te bwaoki ni mwane, ae kangai: “‘Kabooi baika ti kainnanoi ibukin te toa,’ ke tao iai te bwai ae e riai n angania akana maiu ni kainnano.” (Ioane 13:27-​30) Ma n oneani mwin anne, e nako Iuta bwa e na kamwanea Iesu.

N tairikin naba te Toa ae te Riao aei, e a karaoa te bukamaru teuana ae boou Iesu. E anaa te bwerena ao e tataro ni katituaraoi, ao e oteia ma n angania ana abotoro bwa a na kanna. E taku: “E tei te baei ibukin rabwatau ae N na anga ibukimi. Kakaraoa aei bwa kanuringau.” (Ruka 22:19) E kabutaki te bwerena ao a kanna abotoro.

E a manga anaa te mwangko ni wain Iesu, e tataro ni katituaraoi ibukina ao e kabutia nakoia. A bane ni moi iai ao e taku Iesu: “E tei te mwangko aei ibukin te berita ae boou ae aanaki n raraau ae e na kawawaeaki ibukimi.”​—Ruka 22:20.

Mangaia are e bairea kauringani matena Iesu, are a riai taan rimwina ni karaoia ni katoa ririki n Nitian 14. E na ururingaki iai te baere a a tia ni karaoia Iesu ao Tamana bwa a aonga aomata aika onimaki ni kainaomataaki man te bure ao te mate. E kakawaki riki kauringani maten Iesu nakon te Toa ae te Riao ibukia I-Iutaia, bwa e katereaki iai te inaomata ni koaua ibukia aomata aika onimaki.

E taekinna Iesu bwa “e na kawawaeaki [raraana] ibukia aika bati ibukini kabwaraani buure.” I buakoia aika bati ake a na karekea kabwaraan aia bure, bon ana abotoro aika kakaonimaki ao tabeman riki ake ai aroia. Boni ngaiia ake a na mena ma ngaia n Ana Tautaeka n Uea Tamana.​—Mataio 26:28, 29.