Ngke e amwarake Iesu n ana auti te Baritaio ao a a ikotaki nga ma nga aomata n tataningaia i tinaniku. E a tia n nora aekan anne irouia aomata aika bati i Kariraia. (Mareko 1:33; 2:2; 3:9) A bati aika a kan nora Iesu ao n ongora irouna ikai i Iutaia, ibukin aroarona ae kaokoro ma aroia Baritaio n tain te amwarake.

E rangi ni kakawaki nanon te baere e moan taekinna Iesu ibukia taan rimwina ae kangai: “Kawakiningkami man aia iiti Baritaio ae te mwamwanaa te aba.” E a tia Iesu n anga te kauring aei mai mwaina, ma e nora riaini kaumakan te reirei ni kairiri aei man te baere e noria n tain te amwarake. (Ruka 12:1; Mareko 8:15) A bae ni karabai buakakaia Baritaio n aroia ni baka n tangira te Atua, ma bon taani karikii kangaanga ngaiia ake a riai ni kaotaraeaki. E kabwarabwaraa Iesu ni kangai: “Akea te bwai ae karauaki n rabunaki ae e na aki kaotaki. Ao akea te bwai ae raba ae e na aki ataaki ke n oti n te taina.”​—Ruka 12:2.

Tao a bati i buakoia aomata ake a ibetutu ni katobibia Iesu ake bon I-Iutaia aika tuai n ongo ana reirei i Kariraia. Mangaia are e a manga taekin riki iango aika kakawaki ake e taekini mai mwaina. E kaumakiia ni kabane ake a ongora ni kangai: “Tai maakuia te koraki ake a kona ni kamateingkami, ao akea riki te bwai ae a na karaoia imwin aei.” (Ruka 12:4) N aron are e karaoia mai mwaina, e katerea nakoia taan rimwina bwa a na onimakina ae e na bon tabeakinia te Atua. A riai naba ni butimwaea Natin te aomata ao n ataia ae e kona ni buokiia te Atua.​—Mataio 10:19, 20, 26-33; 12:31, 32.

E a kaota ngkanne tabeaiangana te mwaane temanna i buakoia te koraki ni kangai: “Te tia Reirei, tuanga tariu bwa e na tibwai ana bwai tamara ni kabane, i marenau ma ngaia.” (Ruka 12:13) E taekinaki n te Tua bwa e riai n reke iroun te nati te mwaane ae te karimoa mwakoro aika uoua ake e na bwaibwai iai, ngaia are e riai n akea te kauntaeka. (Te Tua-Kaua 21:17) Ma e taraa n ae e tangira riki ae bati te mwaane aei nakon tibwangana are e katauaki i aan te tua. E wanawana Iesu n rawa n tei n ana itera temanna. E titiraki Iesu ni kangai: “Nao, antai ae mwiokoai bwa N na riki bwa te tia moti ke te tia tibwai ami bwai i mare­nami ni kauoman?”​—Ruka 12:14.

E anga ngkanne Iesu te reirei aei nakoia aomata nako ni kangai: “Tarataraingkami ao kawakiningkami man te nanonrang n aekana nako, bwa e ngae ngkana a bati ana bwai te aomata, ma tiaki maiuna mwaitin ana bwai nako.” (Ruka 12:15) N aki ongeia bwa mwaitira kaubwain te aomata ae karekea, tiaki e na boni mate n te taina ao ni kitani bwaai ni kabane? E katuruturua Iesu te reirei ae kakawaki n te kaikonaki ae ururingaki are kaotaki naba iai kakawakini karekean te ara ae raoiroi iroun te Atua, ae kangai:

“E bati n uaa aban te aomata temanna ae kaubwai. Mangaia are e iango i nanona ni kangai, ‘Tera ngkai ae I riai ni karaoia bwa ai akea te tabo ae N na ikotii iai au uaa?’ Ao e taku, ‘N na karaoa aei: N na urui au auti ni kaikobwai ao ni katei aika bubura riki, ao N na ikotii iai au uita ni kabane ma au bwai ni kabane. Ao N na kangai i bon irou: “A a bati au bwai aika raraoi ake a a iko ibukin ririki aika bati, N nangi bon aorai n amwarake ma ni moi, ao ni kimwareirei.” ’ Ma e taku te Atua nakoina, ‘Te nanobaba, a boni kan anaa maium mairoum n te tairiki aei. Antai ngkanne ae nangi bwaini baike ko kaikoi?’ Mangaia are anne aron te aomata ae kaiko i bon ibukina, ma e aki toronibwai i matan te Atua.”​—Ruka 12:16-21.

A kona taan rimwin Iesu ao tabeman riki ake a ongora iroun Iesu ni mwane n ukeran ke ni kaikoan te kaubwai. Ke e kona ni katabetabeaki temanna man te beku ibukin Iehova n tabeakinani maiuna. Ngaia are e a manga taekina riki te reirei ni kairiri ae tamaroa aei Iesu are e a tia n anga tao teuana ma te iterana te ririki n nako n te Kabwarabwara i aon te Maunga ae kangai:

“Katoka raraomaeakinani maiumi bwa tera ae kam na kanna, ke raraomaeakinan rabwatami bwa tera karabaami. . . . Iangoi aroia reeben: A aki ununiki ke n tai, ao akea aia auti ni kaikobwai ke aia bata, ma e kakaamwarakeia te Atua. Tiaki kam rangi ni kakawaki riki nakoia mannikiba? . . . Iangoi aron rikiraken taiani kiebu: A aki mwamwakuri ke ni bibinoka, ma I tuangingkami, bwa e ngae ngke moan te kaubwai Toromon, ma e aki roko tamaroan ana kunnikai n tamaroan tekaina mai buakoia. . . . Mangaia ae katoka ukoukorani baike kam na kang ma baike kam na nim, ao katoka raraomami. . . . E ataia Tamami bwa kam kainnanoi baikai. . . . Teimatoa n ukoukora ana Tautaeka n Uea, ao a na karekeaki baikai nakoimi.”​—Ruka 12:22-31; Mataio 6:25-33.

Antai ae e na ukoukora ana Tautaeka n Uea te Atua? E kaotia Iesu bwa a na karaoa aei te koraki ae karako mwaitiia, ae te “nanai ae uarereke,” aika aomata aika kakaonimaki. E na kaotaki imwina riki bwa mwaitiia bon tii 144,000. Tera ae kawakinaki ibukia? E a tia ni karaui nanoia Iesu ni kangai: “E a tia ni kariaia Tamami bwa e na anganingkami te Tautaeka n Uea.” A na aki kaatuua iangoani karekean te kaubwai i aon te aba naakai ike a kona n iraei taan iraa. Ma e na bane nanoia n “te kaubwai ae aki kona ni bane i karawa,” ike a na tautaeka iai ma Kristo.​—Ruka 12:32-34.