Ni kabaneani bongin te Toa ae Umwanrianna n te kaitiua ni bong, ao e angareirei Iesu n iteran te tembora ae aranaki bwa “nnen te mwane.” (Ioane 8:20; Ruka 21:1) Tao e mena n aia Oo Aine ike a kakarini iai aia bwaintangira aomata.

N tain te toa n te tairiki ao e ootanako iteran te tembora aei. A mena iai kaintaura aika aua aika totoa ao kaka aua beetin aika bubura aika on n te bwaa. A tau korakoran taura aikai ni kaotai taabo ake a uakaan teutana ma te tabo aei. A bae ni kauringaki taan ongora man te bwai ae e a taekinna ngkai Iesu ae taekani kauraan taura aikai ngke e kangai: “Bon te oota ngai ibukia kaain te aonnaba. Ane e irai ao e na aki manga nakonako n te rotongitong, ma e na reke irouna te oota ae anganga te maiu.”​—Ioane 8:12.

E kaitaraaki Iesu irouia Baritaio ibukin ana kaotioti, ao a taku: “Ko kaotioti i bon ibukim, akea koauan am kaotioti.” E kaeka Iesu ni kangai: “E ngae ngke I kaotioti i bon ibukiu, ma e boni koaua au kaotioti, ibukina bwa I ataa ike I nako mai iai ao ike N na nako iai. Ma kam aki ataa ike I nako mai iai ao ike N na nako iai.” E reitia ni kangai: “E koreaki naba n ami Tua ae kangai: ‘E koaua aia kaotioti aomata aika uoman.’ Boni ngai ae I kaotioti i bon ibukiu, ao te kauoman ae kaotioti ibukiu, bon te Tama are kanakomaiai.”​—Ioane 8:13-18.

A aki butimwaea te baere e nanonna Iesu Baritaio ao a titiraki ni kangai: “E nga Tamam?” E anga te kaeka ae eti raoi Iesu ni kangai: “Kam aki ataai ao kam aki ataa naba Tamau. Ngke arona bwa kam ataai ao kam na ataa naba Tamau.” (Ioa­ne 8:19) E ngae ngke a kani katikia Baritaio ma akea temanna ae e taua.

E a manga taekina riki te taeka are e a tia n taekinna Iesu ni kangai: “N nangi nako, ao kam na kakaaeai, ma kam na mate i buakon ami bure. Bwa ike I nako iai ao kam aki kona n roko iai.” A bon aki ota I-Iutaia n ana taeka Iesu ao a a iango ni kangai: “E na bakabureia, tiaki ngaia? Ibukina bwa e kangai, ‘Ike I nako iai ao kam aki kona n roko iai.’ ” A aki ota n te baere e nanonna Iesu ibukina bwa a aki ataa moan rikina. E kabwarabwaraa ni kangai: “Kaain naano ngkami, kaain eta ngai. Kaain te aonnaba aei ngkami, tiaki ngai kaain te aonnaba aei.”​—Ioane 8:21-23.

E nanona maiuna Iesu i karawa imwain rikina n aomata, ao taekana ae bon te Mesia are beritanaki ke te Kristo ngaia, are a riai ni kinaa mataniwin te Aro aikai. Ma a titiraki ma te aki karinerine ni kangai: “Antai ngkoe?”​—Ioane 8:25.

Ni kaitaraan aki butimwaeana ao rawaia irouna, e a kaekaia Iesu ni kangai: “E banebuaka au tai n taetaenikawai ma ngkami.” Ma e teimatoa n tei ibukin Tamana ao e kamataataa bukina ngkai a riai I-Iutaia n ongo iroun te Nati ngke e kangai: “E boni koaua Teuare kanakomaiai, ao baike I ongo mairouna N na taekin nakoia te botannaomata.”​—Ioane 8:25, 26.

E a kaotiota ngkanne onimakinan Tamana Iesu are a kabwaka iai I-Iutaia aikai, ao e taku: “Ngkana kam a tia n taura Natin te aomata, ao ane kam na ataia bwa boni ngai teuanne, ao I aki karaoa te bwai teuana i bon irou, ma I taekini baike e reireinai te Tama. Ao bon raou Teuare kanakomaiai ao e aki katukai i bon irou, ibukina bwa I kakaraoi baike a kakukurei nakoina.”​—Ioa­ne 8:28, 29.

Ma a kabotoa aia onimaki tabeman I-Iutaia iroun Iesu, ao e taku nakoia: “Ngkana kam teimatoa n taua au taeka, ao bon taan rimwiu ngkami, ao ane kam na ataa te koaua, ao e na kainaomataingkami te koaua.”​—Ioane 8:31, 32.

E taraa ni kamimi irouia tabeman taekinan ae a na kainaomataaki. A kaitaraa ni kangai: “Boni kanoan Aberaam ngaira ao ti aki toronaki iroun temanna. Ko a kangaa naba ni kangai, ‘Ane kam nang inaomata’?” A ataia I-Iutaia bwa iai taai ake a a tia n tautaekanaki iai irouia ianena, ma a rawa n atongaki bwa tooro. Ma e katerea Iesu bwa bon tooro ngaiia ngke e kangai: “I tuangingkami raoi te koaua, bwa aomata nako ake a karaoa ae bure a bon toro iroun te bure.”​—Ioane 8:33, 34.

A a ruanikai maiuia I-Iutaia ibukin rawaia ni kakoauaa ae a toronaki n te bure. E kamataataa Iesu ni kangai: “E aki teimatoa te toro n tiku bwa kaain te auti n aki toki, ma e teimatoa te nati n aki toki.” (Ioane 8:35) Akea inaomatan te toro ni bwaibwai, ao e kona ni kanakoaki n te taina. Tii te nati ae bungiaki ke ae e tabekaki ae teimatoa n “aki toki,” ae nanona n ana bong ni maiu ni kabane.

Ngaia are te koaua ibukin te Nati bon te koaua ae kainaomataia aomata man te bure are karika te mate ae akea tokina. “Mangaia are ngkana e kainaomataingkami te Nati, ao ane kam na bon inaomata raoi,” bon ana taeka Iesu.​—Ioane 8:36.