Tao ai teuana ngkai ana ririki Ioane te tia Bwabetito ni karabuutinaki. Ao e bon teimatoa naba n ongo taekan ana mwakuri Iesu aika kamimi. Iangoa aron ana namakin Ioane ngke a a tuangnga taan rimwina aron Iesu i Nain ni kauta natin te aine are e a tia ni mate buuna. Ma e boni kan ongo Ioane mairoun Iesu bwa tera ae nanonaki ni baikai ni kabane, ngaia are e a kanakoia taan rimwina aika uoman. Tera ae a na karaoia? A na titirakina Iesu ni kangai: “Boni ngkoe Teuare e na Roko, ke ti na kantaningaa temanna?”​—Ruka 7:19.

E taraa ni kamimi te titiraki aei? Bon te mwaane ae kakaonimaki Ioane, ao ngke e bwabetitoa Iesu e kaania uoua te ririki n nako ao e nora taamnein te Atua bwa e ruo nako aon Iesu ao e ongo bwanaan te Atua ni kakoaua. Ti aki riai n iangoia bwa e rikirake ni mamaara ana onimaki Ioane. Ngke arona bwa e riki anne, e na aki taetae Iesu ni kamoamoaa Ioane n aron ae e karaoia n te tai aei. Ma ngkana ngaia bwa e aki nanououa Ioane, ao e aera ngkai e tabeka te titiraki ibukin Iesu?

Tao e tangira te kakoaua Ioane mairoun Iesu ngkana boni ngaia te Mesia. E na kakorakoraaki riki iai Ioane ngkai e a karawawataaki n te karabuuti. Ma iai riki bukin ana titiraki Ioane. E atai taetae ni burabeti n te Baibara ake a kaotaki iai taekan Temanna ae e Kabiria te Atua bwa te uea ao te tia kamaiu. E ngae ngke a a bati namwakaina n nako imwini bwabetitoan Iesu ma e a karabuutinaki Ioane. Ngaia are e titiraki Ioane ngkana iai riki temanna ae e na roko, ae te tia ruamwin Iesu are e na kakoroi bukini bwaai nako ake a a kaman taetae ni burabetinaki ibukin te Mesia.

N oneani mwin are e na anga te kaeka ae bebete Iesu nakoia taan rimwin Ioane ae kangai: ‘Boni ngai ae N na roko,’ ma e anga te bwai ni kakoaua Iesu bwa bon te Atua ae boutokaia ni kamarurungia aomata aika bati man aoraki aika kakaiaki ao aika bebete. Ao e tuangia taan rimwin Ioane ni kangai: “Naako ao tuanga Ioane baika kam ongo ma n nori: A a noraaba ngkai mataki ao a a nakonako mwauku, a a kaitiakaki rebera ao a a ongo bonotaninga, a a kautaki maate, ao e a tataekinaki te rongorongo ae raoiroi nakoia aomata aika maiu ni kainnano.”​—Mataio 11:4, 5.

E bae ni kaotaki n ana titiraki Ioane iangoan ae e na karaoa ae bati riki Iesu nakon ae e karaoia ngkai ao tao e na kainaomataa man te karabuuti. Ma e kaotia Iesu nakon Ioane bwa e na aki kariaa te kakai ae bati riki nakon ae e kakaraoia ngkai.

Ngke a kitanna taan rimwin Ioane, ao e a tuangia te koraki bwa e raka riki aron Ioane nakoia burabeti. Boni ngaia ana “tia uataeka” Iehova n aron are taetae ni burabetinaki ni Maraki 3:1. Boni ngaia naba te burabeti are Eria n aron are e a kaman taekinaki ni Maraki 4: 5, 6. E kabwarabwaraa Iesu ni kangai: “I tuangingkami te koaua bwa e tuai ni kaoti mai buakoia aomata aika bungiaki, temanna ae kakannato riki nakon Ioane te tia Bwabetito. Ma e kakannato riki nakoina ane moan te mangori n te Tautaeka n Uea ae bwaini karawa.”​—Mataio 11:11.

Ngke e taekina temanna ae mangori n te Tautaeka n Uea ae bwaini karawa bwa e kakannato riki nakon Ioane, e kaotia ikai Iesu bwa e na bon aki rin Ioane n te Tautaeka n Uea ae bwaini Karawa. E katauraoa te kawai Ioane ibukin Iesu ma e mate imwaini katauraoan te kawai nako karawa irouni Kristo. (Ebera 10:19, 20) Ma bon ana burabeti te Atua ae kakaonimaki Ioane, ao e na riki bwa kaain te aonnaba ae kairaki n ana Tautaeka n Uea te Atua.