A kakaokoro aia iango aomata i aoni baike e taekin Iesu ao ake e karaoi, ni kaineti ma baike a riki i nanoia. E teretere raoi anne n te auti teuana i Kariraia. E kani kamwataua taraan teuare kakaraoi baika kamimi te Baritaio ae Timon, ngaia are e a kaoa Iesu bwa e na amwarake ma ngaia. E kariaia kaoana Iesu n ataakin are e a reke ana tai n angareirei nakoia naake a roko, n aron are e a tia naba ni kariaia kaoana bwa e na amwarake ma taan rikoa te taekiti ao taani bure.

E ngae n anne, e aki butimwaeaki raoi Iesu ni kaineti ma te katei ae kakaraoaki nakoia iruwa. E kona ni baareka waeia aomata ni kawaini Baretain ae bubu, ngaia are bon te katei ae kaota akoaia iruwa tebokani waeia n te ran ae mwaitoro. Ma e aki karaoaki aei nakon Iesu, ao bon akea naba ae e kaboria ma ngaia n aron ae e kakaraoaki. Te katei naba teuana ae kakaraoaki boni kabwaroan teutana te bwaa i aon atun te iruwa bwa kaotan akoana ao butimwaeana raoi, ma e aki karaoaki naba aei nakon Iesu. Ma tera aroni butimwaeana?

E a nako kain te amwarake irouia iruwa ake a a tekateka n rarikiriki n te taibora. Ngke a tabe n amwarake ao e a karaurau n rin te aine ae aki kaoaki. E “kinaaki n te kaawa bwa te tia bure.” (Ruka 7:37) Bon taani bure ni kabane aomata aika aki kororaoi, ma e ataaki aroni maiun te aine aei bwa e buakaka bwa bon te aine ngaia ae kakabooaki. E bae n tia n ongo taekan ana angareirei Iesu n ikotaki ma ana kakao nakoia ‘akana korakai ma n rawawata bwa e na motiki rawaia.’ (Mataio 11:28, 29) Ao ibukin rotakin nanona n ana taeka Iesu ma ana mwakuri, e a ukoukoria ngkai.

E nako akun Iesu te aine aei ao e katorobubua i waena. A bwaka rannimatana i waen Iesu ao e kaoi n irana. E kaboria ma waen Iesu ao e kabwaroa i aoia teutana te bwaa ae boiarara are e uotia. E mataku Timon ma te aki kukurei ao e taku n ana iango: “Ngkana bon te burabeti te mwaane aei, ao e na ataa te aine ae ringnga aei ma n ataa arona ae bon te tia bure.”​—Ruka 7:39.

E ataa Iesu ana iango Timon ngaia are e taku nakoina: “Timon, iai te bwai ae N na tuangko.” E kaeka teuaei: “Ngaia, te tia Reirei!” E reitianako Iesu ni kangai: “Iai uoman mwaane ake a taarau iroun te tia kataarau. Temanna e taarau n 500 te tenariati, ma are temanna n 50. Ma ngke a aikoa kona ni kabwarai aia taarau, ao e a kakeai baeia ni kauoman. Mangaia are antai irouia ae e na tangira riki teuare te tia kataarau?” E kaeka Timon ma tao te aki bwerengaki ni kangai: “I taku bwa tao teuare kakeaaki ana taarau ae bati riki.”​—Ruka 7:40-43.

E kariaia anne Iesu. Imwina e kaitaraa te aine aei ao e taku nakon Timon: “Ko nora te aine aei? I rin n am auti, ao ko aki anganai te ran ibukin tebokani waeu. Ma e kamwaimwai waeu te aine aei n rannimatana, ao e kamwaui n irana. Ko aki kaboria ma ngai ngke ko butimwaeai, ma e aki toki te aine aei ni kaboria ma waeu boni mangke I moa n rin. Ko aki kabwaroa te bwaa i atuu, ma e kabwaroa te bwaa ae boiarara i waeu te aine aei.” E noria Iesu bwa e kaota raraomana ni koaua te aine aei ibukini maiuna ae buakaka. Ngaia are e a motikia ni kangai: “N na tuangko, e ngae ngke a bati ana bure ma a a kabwaraaki, ibukina bwa e korakora ana tangira. Ma ane e kabwaraaki ana bure ae karako, ao e uarereke ana tangira.”​—Ruka 7:44-47.

E aki nanonna Iesu bwa e aki ribaa te buakaka. Ma te bwai ae riki, e katereterea Iesu bwa e atataiaomata nakoia aomata aika karaoa te bure ae kakaiaki, ngkana a a manga kaotia bwa a raraoma ni koaua iai ma ni kawara Kristo bwa a na kabebeteaki irouna. E a rangi ni kabebeteaki nanon te aine aei ngke e a kangai Iesu nakoina: “A a kabwaraaki am bure. . . . E kamaiuko am onimaki, naako ma te rau.”​—Ruka 7:48, 50.