E a kaoia ngkai Iesu taan rimwina ake aman ake Betero, Anterea, Iakobo, ao Ioane bwa a na riki bwa taan akawa aika konaia aomata. A a bane n nako n te tinakoka i Kaberenaum n te bongi n Taabati. E reireinia aomata Iesu n te tinakoka, ao a a manga mimi naba n arona n angareirei, bwa e reireinia n ai aron temanna ae mwaaka ao tiaki n ai aroia taani koroboki.

E roko te aomata ae taniaki irouia taimonio n te bongi n Taabati anne. N rokona ikanne, e a takarua naba ni kangai: “Tera am bwai iroura Iesu ae te I-Natareta? Ko nakomai bwa ko na kamaunaira? I boni kinako, bwa ngkoe Teuare Tabu are mairoun te Atua!” E boaaki iroun Iesu te taimonio are e taua aron teuarei ao e taku: “Tai karongoa, ao otinako mairouna!”​—Mareko 1:24, 25.

N te tai anne e a kabwakaa teuarei i aontano te taimonio aei bwa e na kaatikitiki ao n takarua n te bwanaa ae korakora. Ma e otinako te taimonio mairouna “n aki kaikoakia.” (Ruka 4:35) A mimi aomata ake a teitei i rarikina, ao a titiraki ni kangai: “Tera te baei? Iai mwaakana naba n tua te bwai teuana nakoia taimonio, ao a ongo irouna.” (Mareko 1:27) E teretere bwa e a butanako rongorongon te bae kamimi aei i aoni Kariraia.

E a kitana te tinakoka Iesu ma taan rimwina nakoni mwengan Timon ke Betero. E rangi n aoraki tinani buuni Betero bwa e korakora kabuebuena ao a a bubutiia Iesu bwa e na buokia. Ngaia are e kawaria Iesu ao e taua baina ao e kateirakea. E marurung naba ngkekei ao e a mena i rarikin Iesu ma taan rimwina, bwa tao e katauraoa kanaia.

Tao ngke e a bung taai ao a a roko aomata aika bati ni kawara ana auti Betero ma aia aoraki. N te tai ae waekoa ao e a taraa n ae a a bane aomatan te kaawa n tei i matan te mataroa. Bukin tera? A kani kamarurungaki. A a boni “bane aomata ni kairiia aia aoraki nakoina, aika kakaokoro nako aorakia. Ao a bane ni marurung ngke e kaaki baina i aoia n tatabemania nako.” (Ruka 4:40) Eng, n aki ongeia bwa tera aorakia ma e boni buokiia n aron are e a kaman taekinaki. (Itaia 53:4) E kainaomataia naba aomata ake a taniaki irouia taimonio. Ngke a otinako taimonio aika buakaka ao a takarua ni kangai: “Boni ngkoe Natin te Atua.” (Ruka 4:41) Ma e boaiia Iesu ao e aki kariaia bwa a na manga taetae riki. A ataia ae Iesu bon te Kristo, ma e aki tangiriia bwa a na taraaki bwa aongkoa a beku ibukin te Atua ae koaua.