E katauraoi kaetieti aika moan te raoiroi Iesu ni karaoan aia uarongorongo ana abotoro ngke a waaki ni kakauoman. Ma e aki toki ikanne ana ­mwakuri. E anga te kauring nakoia ibukia taani kakaaitara ni kangai: “Noria! I kanakoingkami n ai aroia tiibu aika mena i buakoia kameaanti. . . . Tarataraingkami mairouia aomata bwa ane a na kateingkami n te boowi, ao a na kataereingkami i nanon aia tinakoka. Ao ane kam na katikaki nako mataia kowana ao ueea ibukiu.”​—Mataio 10:16-18.

Eng, a a kona ni kaaitara taan rimwin Iesu ma te bwainikirinaki ae korakora, ma e berita nakoia ni karaui nanoia ni kangai: “Ngkana a kateingkami i mataia, ao tai raraomaeakina aromi n taetae ao baike kam na taekin, bwa kam na anganaki ami taeka n te tai naba anne. Bwa kam aki taetae n tii ngkami ma e taetae taamnein Tamami iroumi.” E reitia Iesu ni kangai: “Ao mwaane a na anga tariia nakon te mate, ao taama a na anga natiia nakon te mate, ao a na teirake naati n ekiianako aia karo, ma n anga ngaiia nakon te mate. Ane kam na riribaaki irouia aomata ni kabane ibukin arau, ma ane e a tia n nanomwaaka ni karokoa te toki ao e na kamaiuaki.”​—Mataio 10:19-22.

Kioina ngkai e rangi ni kakawaki te uarongorongo, e a kamataataa Iesu bwa a riai ni wanawana taan rimwina bwa a aonga n teimatoa ni waakina te mwakuri aei. E taku: “Ngkana a bwainikiriningkami n te kaawa teuana, ao birinako nakon are teuana, bwa I tuangingkami te koaua bwa a na aki buta aia kaawa tibun Iteraera iroumi imwain rokon Natin te aomata.”​—Mataio 10:23.

Ai rianakora taiani kaetieti, kauring, ao kaungaunga ake e angania ana abotoro ake 12 Iesu! Ma ko kona ni kakaitau bwa a kaineti naba taeka akanne nakoia te koraki ake a na uataboa te mwakuri n uarongorongo imwini maten Iesu ao mangautina. E oti n ana taeka bwa taan rimwina a na “riribaaki irouia aomata ni kabane” ao tiaki tii irouia te koraki ake a uarongorongo abotoro nakoia. Irarikin anne, akea taekani katikaia abotoro nako mataia kowana ma ueea n tain te uarongorongo ae kimototo i Kariraia ke taekan tiringaia irouia kaain aia utu.

E teretere bwa e iaiangoi kanoan taai aika a na roko Iesu ngke e taekini baikai nakoia abotoro. Iangoa are e taekinna bwa e na aki buta aia aono n uarongorongoaki taan rimwina “imwain rokon Natin te aomata.” E kaotia bwa e na aki tia uarongorongoan Ana Tautaeka n Uea te Atua irouia taan rimwina, imwain rokon te Uea ae neboaki are Iesu Kristo are e na riki bwa te tia motikitaeka mairoun te Atua.

A aki riai ni mimi abotoro ngkana a kaitaraaki ni karaoan aia mwakuri n uarongorongo bwa e taku Iesu: “E aki kakannato riki nakon ana tia reirei te tia rimwina, ao e aki kakannato riki te toro nakon ana toka.” E teretere raoi ae e nanonna Iesu. E kaitaraa karawawataana ao bwainikirinana ibukin uarongorongoan Ana Tautaeka n Uea te Atua, ao a na boo naba ma anne taan rimwina. Ma e kaumakiia Iesu ni kangai: “Tai maakuia akana kona n tiringko ma a aki kona n tuka manga maium n te tai ae e na roko, ma ko na maaka teuare kona ni kamaunako i Keenna.”​—Mataio 10:24, 28.

E katea te katoto Iesu ni kaineti ma aei. E nanomwaaka n aki maaka te mate nakon are e na uruana kakaonimakina nakon Iehova ae korakora mwaakana. E kona te Atua ae Moan te Mwaaka ni kamauna ‘maiun te aomata’ (ae kantaningaani manga maiuna nakon taai aika a na roko) ke e kona ni manga kauta te aomata anne bwa e na nora kakimwareirein te maiu are aki toki. Ai boni karaunanora aei nakoia abotoro!

E kaikonaka Iesu ana mwamwannano te Atua nakoia taan rimwina n te aro aei: “Tiaki a kabooaki uoman mannikiba aika tibaaro n te maibibi ni mwane ae uarereke? Ma bon akea temanna i buakoia ae e na bwaka i aontano n aki ataaki iroun Tamami. . . . Mangaia ae tai maaku, bwa kam kakawaki riki nakoia tibaaro aika mwaiti.”​—Mataio 10:29, 31.

A na bwenauaaki kaain te utu n te rongorongo are a tataekinna taan rimwin Iesu, iai aika a na butimwaeia ao iai aika a na aki. E kabwarabwaraa Iesu ni kangai: “Tai taku bwa I roko bwa N na uota te rau nakon te aonnaba.” Eng, e kainnanoaki te ninikoria iroun temanna kaain te utu bwa e na butimwaea te koaua man te Baibara. E taku Iesu: “Ane e tangira riki tamana ke tinana nakoiu, e aki tau n riki bwa te tia rimwiu, ao ane e tangira riki natina te mwaane ke te aine nakoiu, e aki tau n riki bwa te tia rimwiu.”​—Mataio 10:34, 37.

Ma iai tabeman aika a butimwaeiia taan rimwina. E taku: “Ane e anga tii te mwangko n ran ae mwaitoro nakon temanna mai buakoia aika mangori aikai ibukina bwa e atongaki bwa te tia rimwiu, ao I tuangingkami te koaua bwa e na bon aki kabuaa kaniwangana.”​—Mataio 10:42.

Ngke a a taubobonga raoi ana abotoro Iesu n taiani kaetieti, ni kauring, ao ni kaungaaia, ao a a nako “ni kabutaa te aono arei n rinanon te kaawa teuana ma teuana, n tataekina te rongorongo ae raoiroi ao ni katoki aoraki n taabo nako.”​—Ruka 9:6.