Imwini kaitiboon Iesu ma Mareta ao Maria i rarikini Betania ao a a nakon ruanimaten Rataro. Bon te nangananga ae rabunaki matana n te atibu. E tua Iesu ni kangai: “Kam na kanakoa te atibu.” E kaota tabeaiangana Mareta n akea ataakin te bwai are e nang karaoia Iesu. E taku: “Te Uea, e a bae ni boiboi ngkai, bwa ai ana kaabong aei.” Ma e tuangnga Iesu ni kangai: “Tiaki I a tia n tuangko are ngkana ko kakoauaa ao ko na nora mimitongin te Atua?”​—Ioane 11:39, 40.

Ngaia are e a kanakoaki te atibu. E euti ngkanne matana Iesu ao e tataro ni kangai: “Tamau, I kaitauko ngkai ko ongo irou. I ataia bwa ko bon ongongo irou, ma I taekina aei ibukia te koraki aika teibabaa aikai, bwa a aonga ni kakoauaa bwa ko boni kanakomaiai.” E mataata nakoia taan ongora n ana tataro Iesu bwa te bwai are e nang karaoia, boni mani mwaakan te Atua. E a takarua Iesu ni kangai: “Rataro, otinako!” Ao e otinako Rataro ma baina ao waena aika bautaki n te ninira ao ubuna ae niniraki n te kunnikai. E taku Iesu: “Kabwaraa ao kanakoa.”​—Ioane 11:41-​44.

A bon nora te kakai aei I-Iutaia aika bati ake a roko bwa a na kabebeteia Maria ma Mareta, ao a a onimakina Iesu. Ma a nako tabemwaang ao a tuangia Baritaio te bwai are e karaoia Iesu. A a tewea aia boowi Baritaio ma mataniwin ibonga n aia tabo ni boowi ae rietata I-Iutaia ae te Tanirim. Kaain naba te rabwata aei te ibonga ae rietata are Kaiaba. A boni bwaebwaeti tabeman mai buakoia ni kangai: “Tera ae ti na karaoia, bwa e a karaoi mwakuri aika bati aika kamimi te aomata aei? Ngkana ti katikua ma arona n te aro aei, ao a na bane n onimakinna te koraki, ao a na roko I-Rom n anaa ara tabo ma ara natannaomata.” (Ioane 11:47, 48) E ngae ngke a a tia n ongo taekan te bwai ni kakoaua n aron Iesu ni “karaoi mwakuri aika bati aika kamimi,” ma a aki kimwareirei mwaane aikai n te bwai are e a tia ni karaoia te Atua rinanon Iesu. Te bwai ae a tabeaianga riki iai bon nakoaia ao mwaakaia.

Kautakin Rataro man te mate e a riki bwa kaunaia ae korakora Tarukaio ake a aki kakoauaa te mangauti. E taku Kaiaba ae te Tarukaio: “Bon akea te bwai teuana ae kam ataia, ao kam aki iangoia bwa kam kabwaia riki ngkana e mate te aomata ae tii temanna ibukia aomata, nakon ae e na mauna te natannaomata ae bwanin.”​—Ioane 11:49, 50; Mwakuri 5:17; 23:8.

Ibukin nakoani Kaiaba ae tabu, e a kairaki iai iroun te Atua bwa e na taekina aei, are nanona bwa e aki taekina aei “n oin ana iango.” E nanonna Kaiaba bwa e riai n tiringaki Iesu bwa e aonga n aki manga kamangora mwaakaia ao aia kairiri mataniwin te Aro n Iutaia. Ma e katereaki naba n ana taetae ni burabeti Kaiaba te koaua ae ni maten Iesu, e a katauraoa iai te karea ni kaboomwi, tiaki tii ibukia I-Iutaia ma ibukia naba “natin nako te Atua aika uamae.”​—Ioane 11:51, 52.

E iranaki ana iango Kaiaba irouia kaain te Tanirim are a na bairea tiringan Iesu. E kona Nikotemo, ae kaain te Tanirim are raoraon Iesu ni kaota te babaire aei nakoina? E boni kitana naba ngkekei aonon Ierutarem Iesu ike e a totokoa iai matena imwain te tai are e baireia te Atua.