E a tia Iesu n angania aomata reirei aika rangi ni kakawaki ngke e amwarake n ana auti aia tia kairiri Baritaio. E reitaanako kawaina n nako Ierutarem, ao a a iria aomata aika uanao. Bukin tera? E koaua bwa a kan riki raoi bwa taan rimwina, n aki ongeia bwa baikara bwaai aika kona n tangiraki mairouia?

Ni mwanangaia anne, e a taekina te bwai teuana Iesu nakoia ae a kona ni kubanako iai tabeman: “Ane e nakoiu ao e aki ribaa tamana ma tinana ma buuna ma natina ma tarina ma mwaanena, ao bon oini maiuna, ao e aki kona n riki bwa te tia rimwiu.” (Ruka 14:26) Ma tera ae e nanonna ngke e taekina aei?

E aki taekinna Iesu bwa a na bane ake a riki bwa taan rimwina n ribaiia aia utu. Ma e nanona are e na uarereke riki tangiraia aia utu nakon tangiran Iesu, a na aki katotonga te mwaane are n ana kaikonaki are n te amwarake ni katairiki are e karautaeka nakon te kakao ae kakawaki kioina ngke e a tibwa tia ni mare. (Ruka 14:20) E taekinaki aia bakatibu I-Iutaia are Iakoba bwa e ‘ribaa’ Rea ao e tangira Rakera, ae nanona bwa e uarereke riki tangiran Rea nakon tarina are Rakera.​—Karikani Bwaai 29:31; kabwarabwara i nano.

Noria bwa e taekinna Iesu bwa e riai te tia rimwina n ribaa “bon oini maiuna,” ke boni ngaia. E nanonaki iai bwa e riai te tia rimwina ni koaua n tangira riki Iesu nakon tangiran oini maiuna, ike e a tauraoi naba ni kabuaa maiuna ngkana e riai. E teretere bwa bon te mwioko ae kakawaki te riki bwa te tia rimwini Kristo. Tiaki te bwai ae baireaki n aki akaka n aki iangoaki raoi.

E kona ni kaaitara ma te kangaanga ao te bwainikirinaki te tia rimwini Kristo bwa e taku Iesu: “Ane e aki uouota ana kai ni kammaraki ao n rimwiu ao e aki kona n riki bwa te tia rimwiu.” (Ruka 14:27) Eng, e riai te tia rimwin Iesu ni koaua n tauraoi n nanomwaaka i aan ribaakina n aron naba Iesu. E bon taekinna Iesu bwa e na mate i nanoni baia taani kairiribai nakoina.

Ngaia are a riai te koraki ake a iria n iangoa raoi ae nanonaki n te riki bwa te tia rimwini Kristo. E kamataataa aei Iesu n te kaikonaki ae kangai. “N te katoto, antai iroumi ae kani katea te taua, ae e na aki tekateka moa ni warebwaia te kabanemwane n noria bwa iai katiaana irouna ke akea? Bwa e kaawa ni kawenea aan te kateitei ao e a aki kona ni katiaa.” (Ruka 14:28, 29) Ngaia are imwain rikia bwa taan rimwin Iesu naake a iria nako Ierutarem, a riai n tia ni kamatoaa aia iango bwa a na karaoa mwiokoaia ma nanoia ni koaua. E kamataataa te iango anne n te kaikonaki riki teuana ae kangai:

“Te uea raa, ae e na mwaati nako ni buakana te uea temanna, ae e na aki tekateka moa ni kaai ni maroro ma tabemwaang bwa tao e kona ma ana tautia aika 10,000 ni kaitaraa aiana ma ana tautia aika 20,000? Ao ngkana e bon aki kona, ao e na kanakoia taan tei ibukina bwa a na bubutii karekean te raoi nakon teuarei ngkai e a oti ni mena i kiraroa.” E taku Iesu ngke e kamataataa te reirei aei: “N aron naba anne, akea temanna i buakomi ae e aki kaaki ana bwai ni kabane, ae e kona n riki bwa te tia rimwiu.”​—Ruka 14:31-​33.

E bon aki taekina anne Iesu tii ibukia te koraki ake a iria. A riai aomata nako ake a reiakina taekani Kristo n tauraoi ni karaoa ae e taekinna ikai. Nanona bwa a riai n tauraoi ni kabuai aia bwai ni kabane are bon aia bwai ao maiuia naba, ngkana a na riki bwa taan rimwina. E riai iangoana ao tataroakinana.

E a taekina ngkai Iesu te bwai are e maroroakinna n ana Kabwarabwara i aon te Maunga ngke e tuangia taan rimwina bwa “taoron te aonnaba” ngaiia. (Mataio 5:13) E bae n nanonna bwa n aron te taoro ae kateimatoa raoiroin te amwarake, a a tia naba taan rimwina ni karaoa te mwakuri ae karaoiroaki iai aroia aomata, ao ni kamanoia man ruanikain aia onimaki ao aroaro aika aki riai. Ngkai e a uakaan tokin ana mwakuri ni minita ao e taku: “E bon raoiroi te taoro, ma ngkana e a bua korakoran te taoro kam na taoronna ngkanne n tera?” (Ruka 14:34) A ataia naake a ongora irouna bwa taoro tabeua ake a tauraoi n aia tai, a bon aki itiaki ao n renganaki ma te tano ngaia are e uarereke manenana.

Ngaia are e kaotia Iesu bwa a riai naba taan rimwina ake a a rangi ni maan ni mwiokoaia aei n aki kariaia kerikaakini korakoran nanoia. Ngkana e riki anne, a na bon akea manenaia, n aron te taoro ae bua korakorana. A na bae ni kakanikoaki irouia kaain te aonnaba. Ma ae moamoa riki, a na aki tau n tei i matan te Atua, ao a na boni kabuakakaa arana. E katuruturua kakawakin totokoan rikin anne Iesu ni kangai: “Ane iai taningana n ongo, ao ke e ongo.”​—Ruka 14:35.