E a tibwa tia Iesu n taekina aroni kabonganaani kaubwain te aonnaba n te aro ae riai nakoia taan rimwina. Ma tiaki tii taan rimwina n ongora. A mena naba ikekei Baritaio, ao a bon riai ni kaaki i nanoia ana reirei ni kaetieti Iesu aei. Bukin tera? Ibukina bwa a “bakimwane.” Ngke a ongo ana taeka Iesu aikai ao “a a bwainingareia.”​—Ruka 15:2; 16:13, 14.

Ma e aki naba muti Iesu iai. E taku nakoia: “Boni ngkami te koraki aika kam karaoiroingkami i mataia aomata, ma e atai nanomi te Atua. Bwa te bwai are a iangoia aomata bwa e kakawaki, ao bon te bwai ae koro n ribaaki iroun te Atua.”​—Ruka 16:15.

A maan Baritaio n ‘iangoaki irouia aomata bwa a kakawaki,’ ma ngkai ao e nang riki te bitaki. A nang kamaamaeaki aomata ake a iangoaki bwa a kakawaki, ake a kaubwai, a kakannato, ke taani kairiri n te Aro. Ao a nang kateirakeaki aomata aika mangori ake a ataia bwa a kainnanoa te Atua. E katereterea Iesu bwa e na riki te bitaki ae korakora ngke e kangai:

“E tataekinaki te Tua ma aia taeka Burabeti ni karokoa ana tai Ioane. Ao ni moa mai ikanne, e a tataekinaki ana Tautaeka n Uea te Atua bwa te rongorongo ae raoiroi, ao a tebonna aomata n aekaia nako. Ni koauana, a kai mauna karawa ma aonnaba, nakon ae e na mauna manin te taeka teuana ae koreaki n te Tua, n aki kakoroaki moa bukina.” (Ruka 3:18; 16:16, 17) E kangaa n oti n ana taeka Iesu bwa e na riki te bitaki?

A kamoamoaia mataniwin te Aro n Iutaia n taku bwa a kawakina te Tua Rinanoni Mote. Uringnga are ngke e kanorabaa te mataki Iesu i Ierutarem, ao a kamoamoaia Baritaio n taku: “Ngaira taan rimwini Mote. Ti ataia bwa e a tia te Atua n taetae ma Mote.” (Ioane 9:13, 28, 29) Bon tii teuana te kantaninga ibukin te Tua are rinanoni Mote, bwa e na kairiia aika nanorinano nakon te Mesia are Iesu. Ao Ioane te tia Bwabetito e atonga Iesu bwa ana Tiibutetei te Atua. (Ioane 1:29-34) A ongora taekan “ana Tautaeka n Uea te Atua” I-Iutaia aika mangori ao riki aika maiu ni kainnano, ngke e moana ana mwakuri ni minita Ioane. Eng, bon iai “te rongorongo ae raoiroi” ibukia naake a kan tautaekanaki ao ni kakabwaiaaki n ana Tautaeka n Uea te Atua.

Tiaki nanona bwa e nang aki kakororaoaki te Tua Rinanoni Mote, ma e kairiri nakon te Mesia. Ma a aikoa ngkai kabaeaki iai aomata. N te katoto, e kariaiakaki n te Tua te buuraure ni bukina aika kakaokoro, ma ngkai e a kabwarabwaraa Iesu bwa “teuare buuraure ma buuna ao e a manga mare ma te aine temanna, e wene ni kimoa, ao teuare e a manga mare ma te aine are e buuraure buuna ma ngaia, e wene ni kimoa.” (Ruka 16:18) Ai boni kaunra tuua aikai irouia Baritaio aika rangi ni karakaraka!

E a taekina ngkai Iesu te kaikonaki teuana are e a kaota te bitaki ae korakora ae e a riki. Bon taekaia mwaane aika uoman, aika korakora bitakin aroaroia ke baika riki nakoia. N ongoraean te kaikonaki aei, ao kakauringnga are iai i buakoia taan ongora Baritaio aika bakimwane ake a iangoaki irouia aomata bwa a kakawaki.

E taku Iesu: “Iai te aomata temanna ae kaubwai ae kukunnikainna ni kunnikai aika bobuaka booia, ao e kukukurei ni katoabong ni baika moanibaa n tamaroa. Ma iai te aomata ae te tia bubutii ae arana Rataro, ae e ninikiraki ni mataroan ana oo teuarei, ao e onrake n te kaboa, ao e kani kangaea n tamruru ake a bwaka man ana taibora teuare kaubwai. Ao a roroko naba kamea n newenewei kaboana.”​—Ruka 16:19-21.

A boni bakimwane Baritaio, ngaia are antai riki ngkanne ae e kainetiia Iesu ngke e taekina “teuare kaubwai”? A kani bwabwainia naba mataniwin te Aro n Iutaia aikai ni kunnikai aika bobuaka ma n tamaroa. Ao irarikin naba kaubwaia ake irouia, a taraa naba ni kaubwai ni mwiokoaia ke tabeia. Eng, ngke a kaikonakaki naakai bwa te aomata ae bwainna ni kunnikai n uea aika beboo, e kaotaki iai nakoaia aika kakannato, ao te rinen ae mainaina e kaota aia kan raoiroi i bon irouia.​—Taniera 5:7.

Tera aroia mataniwi aika kaubwai ma ni kainikatonga aikai n taraia aomata aika mangori? A kabuakakaia n iangoiia bwa ‛am ha·’aʹrets, ke kaain te aba (te aonnaba), aika aki ataa te Tua ao a aki tau n reireinaki taekana. (Ioane 7:49) E oti  anne man aron “te tia bubutii ae arana Rataro” are e kani kangaea naba n “tamruru ake a bwaka man ana taibora teuare kaubwai.” N aron Rataro ae e onrake n te kaboa, a taraaki naba aomata aika mangori bwa kaanga e aki kukurei te Atua irouia.

E a tia n riki te bwai ae kananokawaki aei i nanon tabeua te tai, ma e ataia Iesu ae e nang riki te bitaki ae korakora nakoia te koraki ake ai aron teuare kaubwai ao naake ai aron Rataro.

E reitia Iesu ni kabwarabwaraa te bitaki ae korakora aei. E taku: “Ao imwin tabeua te tai, e a mate teuare te tia bubutii ao e uotakinako irouia anera nako rarikin Aberaam. E mate naba teuare kaubwai ao e kaiiaki. Ao ngke e mena n te Ruanimate ao e maraki, ao e euti matana ao e nora Aberaam mai kiraroa ma Rataro i rarikina.”​—Ruka 16:22, 23.

A bon ataia naake a ongora iroun Iesu, bwa e a kamani mate Aberaam ao e a mena n te Ruanimate. E katereaki n te Baibara bwa akea ane e mena n te Ruanimate ke i Tiore, ae kona n noraaba ke n taetae, n ikotaki naba ma Aberaam. (Te Minita 9:5, 10) Tera ngkanne aia iango mataniwin te Aro aikai n ae e nanonna Iesu n ana kaikonaki? Tao tera ae e kaotia ibukia aomata aika mangori ao mataniwin te Aro aika bakimwane?

E a tibwa tia Iesu ni kaota te bitaki ngke e taekinna ae “e tataekinaki te Tua ma aia taeka Burabeti ni karokoa ana tai Ioane [te tia Bwabetito]. Ao ni moa mai ikanne, e a tataekinaki ana Tautaeka n Uea te Atua bwa te rongorongo ae raoiroi.” Boni man ana uarongorongo Ioane ao Iesu Kristo are a a mate iai Rataro ao teuare kaubwai ni kaineti ma baike a riki nakoia ke aroaroia rimoa, ao a karekei tibwangaia aika boou n ana taratara te Atua.

A a maan ni bakaineaki n aia onimaki aomata aika nanorinano ke aika maiu ni kainnano. Ma a buokaki ao a butimwaea te rongorongo ae taekan te Tautaeka n Uea are e moan tataekinaki iroun Ioane te tia Bwabetito ao imwina Iesu. A ananai ngkoa ‘tamruru man aia taibora’ mataniwin te Aro. Ma ngkai a kakaamwarakeaki n ana koaua te Baibara aika kakawaki, ai moarara riki baika raraoi ake e kabwarabwarai Iesu. Ai aron ae a a roko n te tabo ae rine i matan Iehova ae te Atua.

Ni kaitaraan anne, naake a kaaina te koraki ni kaubwai ao mataniwin te Aro aika kakannato, a rawa ni butimwaea rongorongon te Tautaeka n Uea are e tataekinna Ioane, ao are e uarongorongoia Iesu ni kabutaa te aba. (Mataio 3:1, 2; 4:17) A boni kaunaki ao ni kammarakaki n te rongorongo anne, are e a kaotaki iai ana motikitaeka te Atua ae ai aron te ai ae nang roko. (Mataio 3:7-12) A na rau nanoia mataniwin te Aro ake a bakimwane akekei ngke arona bwa a katoka aia mwakuri Iesu ma taan rimwina n tataekina ana rongorongo te Atua. Titeboo mataniwi akanne ma teuare kaubwai n te kaikonaki are e kangai: “Tamau ae Aberaam, nanoangaai ao kanakomaia Rataro bwa e na kateboa tabon tabonibaina n te ran, ma ni kamwaitoroa neweu, bwa I a korakai n te ai ae uramwaaka aei.”​—Ruka 16:24.

Ma e aki riki anne. A aki bitaki angia mataniwin te Aro aikai. A rawa n “ongo irouni Mote ma Burabeti” ake a riai ni kairaki n aia koroboki bwa a na butimwaea Iesu bwa te Mesia ao te Uea are e rineia te Atua. (Ruka 16:29, 31; I-Karatia 3:24) A aki naba kananorinanoia ni kariaia bwa e na anaaki nanoia irouia naake a maiu ni kainnano ake a butimwaea Iesu ao ni karekea ngkai akoaia iroun te Atua. Ma a aki kona taan rimwin Iesu ni kakeaa bongan te koaua ke ni kamamaraa, tii ibukin iran nanoia mataniwin te Aro aikai ke ibukini karauan nanoia. E katerea te koaua aei Iesu n ana kaikonaki, n taeka ake e taekin “Aberaam” nakon teuare kaubwai, ae kangai:

“Natiu, uringnga bwa ko rauaki ni baika raraoi i nanoni maium, ma a rereke baika bubuaka iroun Rataro. Ma n te tai aei e a kabebeteaki nanona ikai, ma ko a korakai ngkoe. Ao irarikini baikai ni kabane, iai naba te kinono ae rangi ni bubura ae kamenaaki i marenara ma ngkami, mangaia are te koraki ake a kan nakoimi mai ikai, a aki kona, ao a aki kona naba ni kawarira aomata mai ikanne.”​—Ruka 16:25, 26.

Ai riaira ao ai tonura ngkai e a riki te bitaki anne! E a kaaibibitaki iai aroaroia mataniwin te Aro aika kamoamoa ma naake a nanorinano ake a butimwaea amon Iesu, ao a kabebeteaki ma n tabeakinaki ni kaineti ma aia onimaki. (Mataio 11:28-30) E na teretere riki te bitaki aei imwin tabeua te namwakaina ngkana e a oneaki mwin te Berita n tua aei n te berita ae boou. (Ieremia 31:31-33; I-Korote 2:14; Ebera 8:7-13) Ngkana e nurakina taamneina te Atua n te bong are Bentekota 33 C.E., ao e nang mataata ngkanne ae bon taan rimwin Iesu aika karekea akoaia iroun te Atua, ao tiaki Baritaio ma kaain aia Aro.