N tain te abue n te ririki 30 C.E., ao e a nako Ierutarem Iesu. A bati aomata ake a roko n te kaawa ibukin te Toa ae te Riao. A anga naba aia karea te man n te tembora, bwa kanoan naba te bukamaru aei. Tabeman a kairiia aia man, ma ake tabeman a kabooi i Ierutarem.

Ngke e roko Iesu n te tembora, e a noriia aomata aika kaboonakoi maan. A karekemwane ibukia n te auti are tataromauriaki iai Iehova! Tera aron Iesu? E karaoa ana kai ni kataere man te roobu, ao e kaotinakoia tiibu ao kaao man te tembora. E karangai aia tabora taan raimwane ao e kabwaroi aia  mwane i aontano. Ao e taku nakoia taani kaboonakoi taobe: ‘Uotiinako baikai mai ikai! Tai karika umwan Tamau bwa te tabo ni karekemwane!’

A mimi aomata ake n te tembora n te baere e karaoia Iesu. Ao taan rimwina a uringa te taetae ni burabeti ibukin te Mesia, are kangai: ‘E na korakora ingaingan nanou ibukin umwan Iehova.’

Imwina riki n te ririki 33 C.E., e a manga kaitiaka naba te tembora Iesu, n te kauatai. E aki kariaia temanna bwa e na kamatauningaa umwan Tamana.