A kawara Barao Mote ma Aaron n tuangnga ana rongorongo te Atua aei: ‘Ngkana ko aki kanakoia au aomata, N na karokoia naango nako aon te aba.’ A a tikubara naango aika mwaitikurikuri n aia auti kaain Aikubita aika kaubwai ao aika maiu ni kainnano. E a buta aon te aba n te nango. Ma akea te nango n te aba ae Koten are a maeka iai tibun Iteraera. Ni moa man te kaaua n rekenikai aei ao a a tii rotaki iai kaain Aikubita. E bubutii Barao ni kangai: ‘Bubutiia Iehova bwa e na kanakoia naango aikai. A a kona n nako ami aomata.’ Ma ngke e a kanakoi naango Iehova, e a manga bita ana iango Barao. E na reke n ningai reireiani Barao?

E taku Iehova: ‘Ngkana e aki kanakoia au aomata Barao, ao a na aoraki ao ni mate aia man kaain Aikubita.’ N te bong are imwina, a a mate maan, ma a aki mate aia man tibun Iteraera. E teimatoa n imanono Barao ao e aki kan ongo.

Imwina, e a tuanga Mote Iehova bwa e na oki nakoni Barao ao e na karerake te mannang. Ao a bitaki mannang n riki bwa bubun te tano n te ea ao e bwaka i aoia kaain Aikubita ni kabane. Ao a a riki bwa kinaka aika kammaraki i aoia ni kabane ma aia man. Ma e bon rawa naba Barao ni kanakoia tibun Iteraera.

E kaokiia Mote ma Aaron Iehova nakoni Barao ma Ana rongorongo aei: ‘Ko bon rawa naba ni kanakoia au aomata? E na bwaka te karau ae te aiti  n ningabong i aon te aba.’ N te bong are imwina, e a kabwakaa Iehova te karau ae te aiti ma te baa, ao te ai. Bon te bong ae buaka ae te kabanea ni korakora i aon Aikubita ae tuai man riiriki mangkoa. A bane ni mate kaai ma aroka ma a aki rotaki ake i Koten. E taku Barao: ‘Bubutiia Iehova bwa e na katokia! Ao kam a kona n nako.’ Ma ngke e a toki te karau ae te aiti ma te karau, ao e a bita naba ana iango Barao.

E taku ngkanne Mote: ‘A nang roko ngkai rokati ni kang nikirani baike a tiku imwin te karau ae te aiti.’ A kang nikirani bwaai ni kabane ake i aoni kaai ma tawaana mirion ma mirion rokati. E bubutii ni kangai Barao: ‘Butiia Iehova bwa e na kanakoia rokati aikai.’ Ma imwini kanakoaia rokati iroun Iehova, e bon teimatoa naba n imanono Barao.

E taku Iehova nakoni Mote: “Arora baim nako karawa.” Ao akea bwa e a rotongitong karawa. A aikoa kona n nora te aomata ke te bwai teuana kaain Aikubita i nanon tenibong. Ma tii tibun Iteraera ae e oota aia auti.

E taku Barao nakoni Mote: ‘Ko a kona n nako ma am aomata. Ma tii katikuia ami man ikai.’ E taku Mote: ‘Ti riai ni kairiia ara man bwa ti aonga n angakarea iai nakon Atuara.’ E a rangi n un Barao ao e takarua ni kangai: ‘Naako mai matau! Ngkana I a manga noriko ao N na tiringko.’