E a butanako rongorongon Ieriko nakoia natannaomata ake tabeua i Kanaan. A a baireia aia uea bwa a na ikotaki ni buakania tibun Iteraera. Ma e reke aia iango ae kaokoro kaaini Kibeon. A bwainia ni kunnikai aika mangaingai, ao a nakon Iotua ma n taku: ‘Ti roko man te aba ae raroanako. Ti ongo taekan Iehova ma bwaai ni kabane ake e karaoi ibukimi i Aikubita ao i Moaba. Berita bwa kam na aki buakanira, ao ti na riki bwa ami toro.’

E kakoauaia Iotua ao e kariaia ae a na aki buakania. Tenibong imwina, e a ataia ae a aki roko man te aba ae raroanako. Boni kaaini Kanaan. E titirakinia ngkanne kaaini Kibeon Iotua ni kangai: ‘E aera kam kekeweira?’ A kaeka ni kangai: ‘Ti maaku! Ti ataia ae e buaka ibukimi Iehova ae Atuami. Taiaoka tai tiringira.’ E kawakina ana berita Iotua ao e aki tiringia.

E aki maan imwina, ao a a kakamaakaki kaaini Kibeon irouia ueani Kanaan ake niman ma aia taanga ni buaka. Ao e a mwananga Iotua ma ana taanga ni buaka ni kangainaa bwa e na kamaiuia. E  waaki te buaka n te ingabong are imwina. Ao a a bane ni birinako kaaini Kanaan nakoni kawai nako. Ao Iehova e kabwakaa i aoia te karau ae te aiti aika bubura, n taabo ake a birinako nako iai. E bubutii ngkanne Iotua nakon Iehova bwa e na tei taai n aki kakammwakuri. E aera ngke e bubutiia Iehova bwa e na karaoa aei, ngkai e tuai man tei taai n aki kakammwakuri mai mwaina? Ibukina bwa e onimakina Iehova Iotua. E bon aki bung taai n te bong anne ni karokoa tiaia tibun Iteraera ni kataenikaiia ueani Kanaan ma aia taanga ni buaka.