Iai n te aba ae Turia te teinnaine ae uarereke ae raroanako mani mwengana. E kairakinako neiei mairouia ana utu iroun ana taanga ni buaka Turia ao e a riki ngkai bwa ana toro buun te mataniwi n te taanga ni buaka ae Naaman. E taromauria Iehova te teinnaine aei e ngae ngke a aki karaoa anne kaain rarikina.

Iai aorakini kunin Naaman ae rangi ni kakamaaku, ao e maraki iai n taai nako. E boni kani buoka teuaei te teinnaine aei. E taku nakoni buun Naaman: ‘I ataa te aomata ae kona ni kamarurunga buum. Iai i Iteraera ana burabeti Iehova ae arana Eritai. E kona ni katoka aorakini buum.’

E tuanga buuna neiei ana taeka te teinnaine aei. E kukurei Naaman ni katai bwaai nako ngaia are e a nakon ana auti Eritai i Iteraera. E kantaningaia Naaman bwa e na butimwaeia Eritai n aroni butimwaean te aomata ae kakannato. Ma n oneani mwin are e na taetae ma Naaman, e kanakoa ana toro bwa e na butimwaea  Naaman ao n anganna ana rongorongo aei: ‘Naako tebokiko itiua te tai n te Karaanga ae Ioretan ao e a toki naba aorakim.’

E rangi n un Naaman ao e taku: ‘I taku bwa e na katoka aorakiu te burabeti aei ni wetean aran Atuana ao ni katiotioa baina i aou. Ma n oneani mwin anne, e tuangai bwa N na nakoni karaangan Iteraera. A raoiroi riki karaangan Turia. E aera I a aki tebotebo naba iai?’ E rangi n un Naaman, ao e kitana ana auti Eritai.

A buoka Naaman ana toro bwa e na iaiangoia riki. A taku nakoina: ‘Tiaki ko na boni karaoi bwaai nako bwa e aonga n toki aorakim? E rangi ni bebete te bwai ae e tuangko te burabeti. E aera ko aki karaoia?’ E ongo aia taeka naakai Naaman, ngaia are e a nakon te Karaanga ae Ioretan ao n tebo iai itiua te tai. Imwin otirakena n ana kaitiua n tai, e a bon toki naba aorakina. E rangi ni kakaitau teuaei ao e oki rikaaki ni karabwaa Eritai. E taku Naaman: ‘I a ataia ngkai bwa Iehova bon te Atua ae koaua.’ N am iango, tera ana namakin te teinnaine are uarereke arei ngke e a oki Naaman ao e a toki aorakina?