REIREI 14
E na Kangaa ni Kukurei te Atua n Ara Taromauri?
E maroroakinaki n te reirei are mai mwaina bwa a aki bane Aaro ni kakukureia te Atua. Ma ti boni kona n taromauria ara tia Karikiriki n te aro ae na kukurei iai. Tera “te aeka n taromauri [ke, n Aro]” ae e kukurei iai? (Iakobo 1:27, te kabwarabwara mai nano) Iangoi ana reirei te Baibara.
1. E riai ni boto i aon tera ara taromauri?
E riai ni boto ara taromauri i aon te Baibara. E kangai Iesu nakon te Atua: “Bon te koaua am taeka.” (Ioane 17:17) Tabeua Aaro a tarariaoa te koaua man ana Taeka te Atua ae e kaira koreana, ae te Baibara. A onea mwina n aia reirei aomata ao n aia katei. Ma e aki kukurei Iehova irouia naake a “kakeaa ana tua te Atua.” (Wareka Mareko 7:9.) N te itera teuana, ti kakimwareireia nanona ngkana ti kabotoa ara taromauri i aon te Baibara ao n ongeaba n te kaetieti are iai.
2. Ti na kangaa n taromauria Iehova n te aro ae riai?
Ti riai n taromauria Iehova n tii ngaia kioina ngkai bon ara tia Karikiriki. (Te Kaotioti 4:11) Nanon aei bwa ti riai n tangiria ao n taromauria n tii ngaia, n aki kabongana te bouannanti teuana, te banna, ke te kanikina teuana.—Wareka Itaia 42:8.
E riai ara taromauri n ‘itiaki ao ni butimwaeaki’ iroun Iehova. (I-Rom 12:1) Nanon aei bwa ti riai n ongeaba nakon ana kaetieti ibukin te aroaro ni maiu ae riai. N te katoto, te koraki aika tangira Iehova a tangiri naba ana kaetieti ibukin te mare ao a ongeaba iai. Ao a rarawa nakoni mwakuri aika karuanikai, n aroni kamanenaan te baakee, ke kabonganaan te drug n te aro ae aki riai, ke te kamanging. a
3. E aera ngkai ti riai ni kaai n taromauria Iehova ma raora n te onimaki?
N ara botaki n taromauri ae katoa wiki e reke iai ara tai ni “karaoiroa Iehova . . . i buakoia aomata aika ikotaki.” (Taian Areru 111:1, 2) Te anga teuana ae ti karaoa iai aei, boni man ara anene ni karaoiroa te Atua. (Wareka Taian Areru 104:33.) E tuangira Iehova bwa ti na kaakaei botaki n taromauri ibukina bwa e tangirira ao e ataia ae ti kona ni karekea iai te maiu are aki toki. Ngkana ti kaei botaki n taromauri aikai, ti a kaungaaki iai i marenara ma taari.
REIAKINA AE BATI RIKI
Nora bukina ngkai e aki kukurei Iehova ni kabonganaani katotongani bwaai n te taromauri. Reiakini aanga aika kakawaki aika ti kona ni karaoiroa iai te Atua.
4. Ti aki riai ni kabonganai katotongani bwaai n ara taromauri
Ti kangaa n ataia ae karaoan anne e na aki kukurei iai te Atua? Kaota te TAAMNEI, ao maroroakina te titiraki aei.
-
Tera are riki ngke a kataia tabeman ana aomata te Atua ake a karakinaki n te Baibara, n taromauria te Atua ni kabonganaan te bouannanti?
A kataia tabeman aomata ni kaania te Atua n aroia ni kabonganai katotongani bwaai n aia taromauri. Ma e kona n raroa riki te Atua mairouia aomata ni karaoan anne? Wareka Te Otinako 20:4-6 ao Taian Areru 106:35, 36, ao maroroakin titiraki aikai:
-
Baikara bwaai ke katotongani bwaai aika ko a tia n noriia iai aomata ni kabonganai n aia taromauri?
-
Tera ana namakin Iehova ni kabonganaani katotongani bwaai?
-
Tera am iango ni kabonganaani katotongani bwaai?
5. E kainaomataira man iango aika kewe taromaurian Iehova n tii ngaia
Nora aron taromaurian Iehova ae kukurei iai ni kona ni kainaomataira man iango aika kewe. Kaota te TAAMNEI.
Wareka Taian Areru 91:14, ao maroroakina te titiraki aei:
-
Tera ae beritanna Iehova bwa e na karaoia ibukira ngkana ti kaota tangirana n arora n taromauria n tii ngaia?
6. Ti taromauria te Atua n ara botaki n taromauri n te ekaretia
Ti karaoiroa Iehova ao ti kaungaira i marenara, n arora n anene ao ni kaekaeka ni bobotaki n te ekaretia. Wareka Taian Areru 22:22, ao maroroakin titiraki aikai:
-
Ko unga n taiani kaeka ake ni bobotaki n taromauri?
-
Ko kani katauraoa am kaeka?
7. E kukurei Iehova ngkana ti tibwaa reireiara
A bati aanga aika ti kona n tibwai iai koaua man te Baibara nakoia aomata. Wareka Taian Areru 9:1 ao 34:1, ao maroroakina te titiraki aei:
-
Tera reireiam man te Baibara ae ko kan tibwaia nakon temanna?
A TAKU TABEMAN: “E kangaanga kakukureian te Atua.”
-
Tera ngkoe am iango?
KAKIMOTOTOANA
Ti kakukureia ara tia Karikiriki ngkana ti taromauria n tii ngaia, ngkana ti karaoiroia ni bobotaki n te ekaretia, ao ngkana ti tibwai baike ti a tia n reiakin nakoia aomata.
Kauring
-
Ti na kangaa n taromauria te Atua n te aro ae e na kukurei iai?
-
E aera ngkai ti riai n taromauria Iehova n tii ngaia?
-
E aera ngkai ti riai n ikotaki n taromauria te Atua, ma naake a kani kakukureia?
NORI NABA AIKAI
Reiakina arom ni kona n anga am kaeka ni bobotaki n taromauri n te ekaretia.
“Karaoiroa Iehova i Buakon te Botaki n Aomata” (Te Taua-n-Tantani, Tianuare 2019)
Nora aron te ataeinimwaane temanna ni kakabwaiaaki mani kaeani bobotaki n taromauri n te ekaretia, e ngae ngke e aki bebete irouna.
A bati aomata aika kakoauaa bwa e tei te kaibangaki ibukia Kristian, ma ti riai ni kamanena n ara taromauri?
a A na maroroakinaki baikai n reirei aika imwina.
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
