REIREI 25

Tera Ana Kantaninga te Atua Ibukira?

KAMAIUA

E kakoauaaki n te Baibara ae e ‘kimototo maiun te aomata ao e on n te rawawata.’ (Iobi 14:1) Anne ae e tangiria te Atua ibukira? Ngkana tiaki, ao tera ana kantaninga ibukira? E na koro bukina? Iangoi kaeka aika karaunano man te Baibara.

1. Aekakira aron te maiu ae e tangiria Iehova ibukira?

E tangirira Iehova bwa e na reke iroura te maiu ae te kabanea n tamaroa. Ngke e karikiia ara moan aomata ake Atam ma Ewa, ao e kamaekaia n te bwaretaiti ae tikauarerei, ae te onnaroka ae Eten. Ao “te Atua e kakabwaiaia ao e taku nakoia: ‘Kam na kabatiaia ami kariki ao kamwaitingkami, kaona te aonnaba ao taua arona.’ ” (Karikani Bwaai 1:28) E tangiriia Iehova bwa a na karikiia natiia, a na karika te aonnaba ni kabutaa bwa te bwaretaiti, ao a na tararuaia maan. Ana kantaninga bwa a na bane aomata ni kororaoi marurungia ao ni maiu n aki toki.

E ngae ngke e aki koro bukin anne, a ma e aki bitaki ana kantaninga te Atua. (Itaia 46:10, 11) E teimatoa naba n tangiria aomata aika ongeaba bwa a na maiu n aki toki ao ni kororaoi.—Wareka Te Kaotioti 21:3, 4.

2. Ti na kangaa ni karekea te maiu ae manena ngkai?

E karikira Iehova ma ‘ataakin ae ti kainnanoa te Atua,’ ae nanonaki naba iai kani kinaakina ao taromauriana. (Wareka Mataio 5:3-6.) E tangiria bwa e na kaan ara iraorao ma ngaia, ti “na nakonako ni kawaina nako, [ao ti] na tangiria,” ao ni beku irouna “ma [nanora] ni kabane.” (Te Tua-Kaua 10:12; Taian Areru 25:14) Ni karaoan anne, ti na boni kukurei ni koaua e ngae ngke iai ara kangaanga. Taromaurian Iehova e anganira te maiu ae rangi ni manena ao te kantaninga.

REIAKINA AE BATI RIKI

Nora aron ana tangira ae bati Iehova ngke e katauraoa te aonnaba aei ibukira, ao te bae taekinaki n ana Taeka ibukini manenan te maiu aei.

3. Iai ana kantaninga ae tamaroa Iehova ibukia aomata

Kaota te TAAMNEI, ao maroroakina te titiraki aei.

TAAMNEI: Bukin Tera Bwa E Karika te Aonnaba te Atua?—Mwakorona (1:41)

E aera ngke e karika ara aonnaba ae tamaroa aei te Atua?

Wareka Te Minita 3:11, ao maroroakina te titiraki aei:

Tera reireiam man aei ibukin Iehova?

4. E aki bibitaki ana kantaninga Iehova

Wareka Taian Areru 37:11, 29 ao Itaia 55:11, ao maroroakina te titiraki aei:

Ti kangaa n ataia ae e aki bitaki ana kantaninga Iehova ibukira?

E kona ni manga onobwaiaki te auti ae e a uruaki. N aron naba anne, e na onobwaiaki mwin aia mwakuri n urubwai aomata iroun te Atua ibukia te koraki aika tangiria

5. E manena maiura ngkai ti taromauria Iehova

Ti kona ni kukurei n ataakin raoi manenan te maiu aei. Kaota te TAAMNEI, ao maroroakina te titiraki aei.

TAAMNEI: I a Ataa Manenan te Maiu Aei (5:03)

E kangaa Terumi ni kakabwaiaaki man reiakinan manenan te maiu aei?

Wareka Te Minita 12:13, ao maroroakina te titiraki aei:

Ibukina bwa e a tia Iehova ni karaoa ae bati ibukira, ti na kangaa ni kaotia bwa ti kakaitau iai?

E KONA NI KANGAI TEMANNA: “Tera raoi manenan te maiu aei?”

Ko na kangaa ni kaeka?

KAKIMOTOTOANA

E tangirira Iehova bwa ti na kimwareirei n aki toki n te aonnaba aei n te aro ae kororaoi. Ngkana ti taromauria ma nanora ni kabane, e na boni manena maiura ae ngkai naba.