REIREI 34

Ti na Kangaa ni Kaotia Bwa Ti Tangira Iehova?

KAMAIUA

Ko namakinna ae ko a rikirake ni kaan ma te Atua, mangke ko moana am reirei n te Baibara? Ko tangiria bwa e na ririkirake ni kaan riki reitakim ma ngaia? Ngkana eng, ao uringa aei, e na korakora riki tangiram ma akoam iroun Iehova, ngkana e noria bwa e rikirake ni korakora tangirana iroum. Ko na kangaa ni kaotia bwa ko tangiria?

1. Ti na kangaa ni kaotia nakon Iehova bwa ti tangiria?

Ti kaotia bwa ti tangira Iehova n ongeabara irouna. (Wareka 1 Ioane 5:3.) E aki kairoroa temanna bwa e na ongeaba irouna. Ma e anganira inaomatara n rineia bwa ti na ongeaba irouna ke ti na aki. Bukin tera? E tangiria Iehova bwa ti na ‘ongeaba ma nanora ni koaua.’ (I-Rom 6:17) Ae nanona, e tangiria bwa ko na ongeaba irouna, tiaki ibukina bwa ko riai ni karaoia, ma ibukina bwa ko tangiria. E katauraoaki Itera 3 ao 4 n te boki aei ibukini buokam ni kaota tangiran Iehova, n arom ni karaoi baika e na kukurei iai ao n rawa ni kaunna.

2. E aera ngkai e kona ni kangaanga kaotan tangiran Iehova iroura?

“A bati ana kangaanga te aomata ae raoiroi.” (Taian Areru 34:19) Ti bane ni kabokorakora ma aki kororaoira. Ao tao iai naba ara kangaanga ibukin te mwane, te ribuaka, ao bwaai riki tabeua. Ngkana ti karawawataaki, e kona ni kangaanga iroura karaoan ae e tangiria mairoura Iehova, ibukina bwa e bebete riki touan te kawai ae kairua. Ma ngkana ko kakaonimaki ni karaoa ae e tangiria Iehova, ko a kaotia bwa ko tangiria riki nakoni bwaai ni kabane. Ao ko katerea bwa ko kakaonimaki ni koaua nakoina. Ibukin anne, e na kakaonimaki naba ni koaua nakoim. E na bon aki kitaniko.—Wareka Taian Areru 4:3.

REIAKINA AE BATI RIKI

Neneria bwa e aera ngkai e kakawaki ongeabam nakon Iehova, ao noria bwa tera ae kona ni buokiko n teimatoa ni kakaonimaki nakoina.

3. Te kauntaeka ae ko irekereke naba iai

E oti n te boki ae Iobi ana bukibuki teuana Tatan, ae e aki tii bukina iai Iobi, ma e bukinia naba naake a kani beku iroun Iehova. Wareka Iobi 1:1, 6–2:10, ao maroroakin titiraki aikai:

Tera bukin ongeaban Iobi iroun Iehova, n aron ae taku Tatan?—Nora Iobi 1:9-11.
Tera are e bukinia iai aomata nako Tatan, n ikotaki naba ma ngkoe?—Nora Iobi 2:4.

Wareka Iobi 27:5b, ao maroroakina te titiraki aei:

E kangaa Iobi ni kaotia bwa e tangira Iehova ni koaua?

E kaotia Iobi bwa e tangira Iehova, n arona n teimatoa ni kakaonimaki ni koaua nakoina

Ti kaotia bwa ti tangira Iehova ngkana ti teimatoa ni kakaonimaki ni koaua nakoina

4. Kakimwareireia nanon Iehova

Wareka Taeka N Rabakau 27:11, ao maroroakin titiraki aikai:

Tera ana namakin Iehova ngkana ko bwaina te wanawana ao n ongeaba irouna? Bukin tera?

5. Ko kona ni kakaonimaki ni koaua nakon Iehova

Ti kairaki n tangiran Iehova bwa ti na tataekinna nakoia tabemwaang. Ti kairaki n ara kakaonimaki ni koaua nakoina bwa ti na ongeaba irouna e ngae ngke e aki bebete. Kaota te TAAMNEI, ao maroroakin titiraki aikai.

TAAMNEI: Teei Ibukin Am Onimaki n Aki Ongea Kaitaraam (5:09)

Ko a tia n namakinna ae e kangaanga taekinan Iehova nakoia tabemwaang?
N te taamnei aei, tera are e buoka Grayson bwa e na tokanikai i aoni maakuna?

E bebete riki te kakaonimaki ni koaua nakon Iehova ngkana ti tangiri baika e tangiri ao ngkana ti ribai baika e ribai. Wareka Taian Areru 97:10, ao maroroakin titiraki aikai:

N aron ae ko a tia n reiakinna, baikara bwaai tabeua aika e tangiri Iehova? Baikara bwaai tabeua aika e ribai?
Ko na kangaa n reireiniko tangiran te bwai ae raoiroi ao ribaan te bwai ae buakaka?

6. Ti kakabwaiaaki ngkana ti ongeaba iroun Iehova

E tamaroa n taai nako te ongeaba iroun Iehova. Wareka Itaia 48:17, 18, ao maroroakin titiraki aikai:

N am iango ti kona ni kakoauaa ae Iehova e ataa ae te kabanea n raoiroi ibukira n taai nako? Bukin tera?
Tera kakabwaiaam man reiakinan te Baibara ao taekan te Atua ae koaua ae Iehova?

A TAKU TABEMAN: “E aki tabe te Atua ma baika I karaoi.”