REIREI 53

Rinea am Kaakibotu ae E Kukurei iai Iehova

KAMAIUA

Iehova bon “te Atua ae kukukurei.” (1 Timoteo 1:11) E tangirira bwa ti na kukurei ni maiura. E kukurei ngkana ti karekea ara tai ni motirawa man ara mwakuri. N te reirei aei ti na nora arora ni kamanena ara tai ni motirawa n aanga aika kakukurei ao ni karaunano, ao e kukurei naba iai Iehova.

1. Ti ae ti riai n uringnga ngkana ti rinea ara kaakibotu?

Tera ae ko kani kakaraoia ngkana ko motirawa? Tabeman a kani kamanena aia tai n motirawa n tiku ni mwengaia ni wareware n te boki, n ongongora n te katangitang, n taamnei ke ni mamataku n te Intanete. Tabeman a kukurei n takaakaro ma raoraoia n nako ni bikiniki, n uaua, ke ni karaoa te takaakaro riki teuana. N aki ongeia bwa tera ae ti tatangiria ma ti riai n taraia raoi bwa ara kaakibotu are ti rineia “e kukurei iai te Uea.” (I-Ebeto 5:10) E kakawaki ataakin aei ibukina bwa a bati kaakibotu aika taabangaki ngkai aika kaotaki iai baika e ribai Iehova n aron te tiritiri, te wene ni bure ke te tabunea. (Wareka Taian Areru 11:5.) Tera ae e na buokira n rinea ara kaakibotu ma te wanawana?

Ngkana ti rineiia raoraora aika tangira Iehova, a kona ni buokira ni kaania riki Iehova ao n rinei ara kaakibotu. N aron ae ti reiakinna n te reirei are mai mwaina, “ane e nakonako ma akana wanawana ao e na wanawana.” Ma ni kaitaraan anne, ngkana ti katoatai n iraorao ma aomata aika a aki tangiri ana kaetieti te Atua, ti “na rotakibuaka.”—Taeka N Rabakau 13:20.

2. E aera bwa e kakawaki tiatianakin ara tai ae ti kabanea n ara kaakibotu?

E ngae ngke e raoiroi ara kaakibotu ae ti rineia, ma ti riai n taratara raoi bwa ti na aki kabanea ara tai ae bati iai. Mwina e na aki tau ara tai ibukini baika kakawaki riki. E kaungaira te Baibara bwa ti na “kabonganai raoi [ara] tai ni kabane.”—Wareka I-Ebeto 5:15, 16.

REIAKINA AE BATI RIKI

Reiakina arom ni karaoi motinnano aika raraoi ibukin am kaakibotu.

3. Rarawa nakoni kaakibotu aika buakaka

E aera bwa ti riai n taratara raoi n rinean ara kaakibotu? Kaota te TAAMNEI, ao maroroakin titiraki aikai.

TAAMNEI: Tera te Kaakibotu ae I Riai n Rineia? (4:39)

E kangaa n titeboo takaakaro ni kaakibotu aika tiritiri i Rom rimoa ma kaakibotu tabeua ngkai?
N aron ae oti n te taamnei, tera ae e a ataia Danny ibukin te kaakibotu?

Wareka I-Rom 12:9, ao maroroakina te titiraki aei:

E na kangaa te kibu aei ni buokiko n rinea am kaakibotu?

Baikara bwaai tabeua aika e ribai Iehova? Wareka Taeka N Rabakau 6:16, ao I-Karatia 5:19-21. Imwini warekan te kibu teuana ma teuana, maroroakina te titiraki aei:

Baikara bwaai tabeua aika kaotaki ni kiibu aikai aika nonoraki n taiani kaakibotu ngkai?

Arom n rinea am kaakibotu ma te wanawana

Titirakiniko aei:

Iai n te kaakibotu aei te bwai ae e ribaia Iehova?
E anaa au tai ae bati ibukini karaoani baika kakawaki riki?
E na kaaniai riki ma aomata aika a aki tangira Iehova?

Ti kamanoaki riki ngkana ti kararoaira man te kabuanibwai. Anne bukina ae ti riai ni kararoaira man aeka ni kaakibotu aika ti kanamakinna bwa e na aki raoiroi ibukira

4. Kabongana raoi am tai ma te wanawana

Kaota te TAAMNEI, ao maroroakina te titiraki aei.

TAAMNEI: Tera ae Babane Riki Iai Am Tai? (2:45)

E ngae ngke e aki buakaka ana taamnei te tari te mwaane aei, ma e kangaa n rotaki n arona ni kabongana ana tai ni kaakibotu?

Wareka I-Biribi 1:10, ao maroroakina te titiraki aei:

Ti na kangaa ni buokaki n te kibu aei ni motinnanoia bwa mwaitira ara tai ae ti na kabanea n te kaakibotu?

5. Rinei kaakibotu aika raoiroi

E ngae ngke tabeua kaakibotu e aki kukurei iai Iehova ma bon iai naba aika e kukurei iai. Wareka Te Minita 8:15 ao I-Biribi 4:8, ao maroroakina te titiraki aei: