REIREI 57
Tera Arom Ngkana Ko Karaoa te Bure ae Kakaiaki?
E ngae ngke ko rangi n tangira Iehova ao ko kataia n tuka karaoani baike a na karawawataa, ma ko boni kona naba ni karaoi kairua. Ma e ngae n anne, a kakaiaki riki buure ake tabeua nakon ake tabeua. (1 I-Korinto 6:9, 10) Ngkana ko karaoa te bure ae kakaiaki, uringnga bwa e aki katoka tangiram Iehova, ma e tauraoi ni kabwaraa am bure ao ni buokiko.
1. Tera ae ti riai ni karaoia bwa e aonga ni kabwarai ara bure Iehova?
A rangi n rawawata nanoia naake a tangira Iehova n iangoan ae a a tia ni karaoa te bure ae kakaiaki. Ma a karekea raun nanoia n ana berita Iehova nakoia ana aomata ae kangai: “E ngae ngkana ai aron te kunnikai ae uraroo ami bure, ma a na kamainainaaki n aron te tino.” (Itaia 1:18) Ngkana ti rairi nanora ni koaua ao Iehova e na boni kabwarai ara bure. Ti na kangaa n rairi nanora? Ngkana ti raraoma ni koaua n te bwai ae ti karaoia, ti katoka karaoan ae buakaka ao ni bubutiia Iehova bwa e na kabwarai ara bure. Ti kakorakoraira naba ni bitii ara iango ma anuara aika bubuaka aika kairiri nakoni karaoan te bure, ao ti kataia ni maiuakin ana kaetieti Iehova aika itiaki.—Wareka Itaia 55:6, 7.
2. E kangaa Iehova ni kamanenaia unimwaane ni buokira ngkana ti karaoa te bure?
E tuangira Iehova bwa ti na “weteiia unimwaanen te ekaretia” ngkana ti karaoa te bure ae kakaiaki. (Wareka Iakobo 5:14, 15.) Mwaane aika mwiokoaki aikai, a tangira Iehova ao ana tiibu. A katauaki bwa taani buokira ni kanakoraoa ara iraorao ma Iehova.—I-Karatia 6:1.
A kangaa ni buokira unimwaane ngkana ti karaoa te bure ae kakaiaki? A na kaetiira uoman ke teniman unimwaane, ni kamanenaan ana reirei ni kairiri te Baibara. A na anganira naba taeka n ibuobuoki aika a manena ao kaungaunga aika a na buokira n rarawa nakoni manga karaoan te bure. A kona n taui mairoura mwioko tabeua n te ekaretia ni karokoa te tai are ti a manga marurung iai ni bwaai n taamnei. Ibukini kamanoan te ekaretia mani kariri aika karuanikai, a kabaneaki irouia unimwaane naake a karaoa te bure ae kakaiaki ao aki rairi nanoia.
REIAKINA AE BATI RIKI
Reiakina riki aron Iehova ni buokira ngkana ti karaoa te bure ae kakaiaki, ao kakaitau iai.
3. Kaotan ara bure e buokira ni kamarurungira
E rawawata nanon Iehova ngkana iai te bure ae ti karaoia, ngaia are ti riai ni kaotia nakoina. Wareka Taian Areru 32:1-5, ao maroroakina te titiraki aei:
-
E aera ngkai e raoiroi iroura bwa ti na kaotii ara bure nakon Iehova n onean mwin ae ti na kataia ni karabai?
Irarikini kaotan ara bure nakon Iehova, ti riai ni bubutii buokara mairouia unimwaane bwa ti aonga ni karekea kabebeteara. Kaota te TAAMNEI, ao maroroakina te titiraki aei.
-
N aron ae oti n te taamnei, a kangaa unimwaane ni buoka Canon bwa e na okira Iehova?
Ti riai ni kaotii raoi nanora ao ni bwaina te koaua nakoia unimwaane ngkai a tauraoi ni buokira. Wareka Iakobo 5:16, ao maroroakina te titiraki aei:
-
E aera ngkai e na bebete buokara irouia unimwaane ngkana ti bwaina te koaua?
Kaota am bure, bwaina te koaua nakoia unimwaane, ao butimwaea ana ibuobuoki Iehova ae tatangira
4. E buokaki te tia bure ni kabaneakina
Ngkana e rawa n iri ana kaetieti Iehova te aomata are e karaoa te bure ae kakaiaki, e nang aki riki ngkanne bwa kaain te ekaretia. E a kabaneaki ao ti aki riai n iraorao ma ngaia ke ni kakaraki ma ngaia. Wareka 1 I-Korinto 5:6, 11 ao 2 Ioane 9-11, ao maroroakina te titiraki aei:
-
N aron te iiti ae karika te burawa, e na kangaa te iraorao ma te tia bure ae aki raira nanona n rota te ekaretia?
A bati aika kabaneaki aika a a tia n okira te ekaretia ibukina bwa a buokaki n te reirei ni kaetieti, e ngae ngke e kammaraki ma a ataia ae te bwai are a karaoia e boni kairua. (Taian Areru 141:5) Kaota te TAAMNEI, ao maroroakina te titiraki aei.
-
N te taamnei aei, e kangaa ni buokaki Sonja ngke e kabaneaki?
E kangaa te babaire ibukini kabaneakin temanna . . .
-
ni karinea aran Iehova?
-
ni kaotia bwa e akoi Iehova ao e tatangira?
5. E kabwarai ara bure Iehova ngkana ti rairi nanora
E kamanena Iesu te kaikonaki ni buokira bwa ti na ota n ana namakin Iehova ngkana iai ae raira nanona. Wareka Ruka 15:1-7, ao maroroakina te titiraki aei:
-
Tera reireiam n aei ibukin Iehova?
Wareka Etekiera 33:11, ao maroroakina te titiraki aei:
-
Tera te bwai ae kakawaki ae ti riai ni karaoia ni kaotia iai bwa ti bon raraoma ni koaua?
E tabeakinia raoi ana tiibu Iehova, n aron te tia kawakintiibu
A TAKU TABEMAN: “I maaku ngkana I tuangia unimwaane au bure, mwina I kabaneaki.”
-
Tera ae ko na taekinna nakon te aomata ae namakina anne?
KAKIMOTOTOANA
Ngkana ti karaoa te bure ae kakaiaki ma ti raraoma ni koaua iai ao ti motinnanoia bwa ti na katoka karaoan ae buakaka, ao Iehova e na boni kabwarai ara bure.
Kauring
-
E aera bwa e raoiroi iroura kaotan ara bure nakon Iehova?
-
Tera ae ti riai ni karaoia bwa a aonga ni kabwaraaki ara bure?
-
Ngkana ti karaoa te bure ae kakaiaki, e aera bwa ti riai n ukera buokara mairouia unimwaane?
NORI NABA AIKAI
Nora aron Iehova ni kaota te aeka n nanoanga are e kabwarabwaraaki n Itaia 1:18, nakon te mwaane temanna.
A na kangaa ni kakabwaiaaki aomata n te babaire ibukin te kabaneaki?
“Bukina Ngkai te Kabaneaki Bon te Babaire ae Tatangira” (Te Taua-n-Tantani, Eberi 15, 2015)
Noria bwa ko na kangaa ni kabwarabwaraa te babaire ibukin te kabaneaki nakon ae tiaki te tia Kakoaua.
“A Katinanikuia Naake Aikoa Kaaina Aia Aro Ana Tia Kakoaua Iehova?” (Te kaongora n jw.org)
N te rongorongo ae “I a Riai n Okira Iehova,” nora bukina ngkai e namakinna te mwaane ae e a tia n tiotionako man te koaua aei, bwa e kaokia Iehova.
“E Bitii Maiuia Aomata te Baibara” (Te Taua-n-Tantani, Eberi 1, 2012)
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
